Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 17: Linatalan tiku akxtum lakachinkgolh pero nilakxtum

Takgalhtawakga 17: Linatalan tiku akxtum lakachinkgolh pero nilakxtum
Esaú

XCHATIYKAN lakgkgawasan tiku akxilhpat ni lakxtum, ¿nixlikana? ¿Katsiya tuku xtukuwanikan? Wantiku makgniy animales Esaú, chu wantiku kuentajtlawama borrego xtukuwani, Jacob.

Esaú chu Jacob akxtum lakachinkgolh, umakgolh lakgkgawasan xlakkaman Isaac chu Rebeca. Isaac lu paxkiy Esaú, xlakata xmakgniy animales chu xlimin liway kxchiki xlakata nawakgoy. Pero Rebeca tlakg xpaxkiy Jacob xlakata xatsatata xnaku xwanit chu tlan xlikatsiy.

Xtatajkan Abrahán xlamajku, katlawa la akxilhpat, lu xlipaxuwa Jacob akxni Abrahán xlichuwinan xlakata Jehová. Alistalh Abrahán nilh akxni xkgalhiy 175 kata, akxni linatalan tiku akxtum lakachinkgolh xkgalhikgoy akgkukitsis kata.

Akxni Esaú xkgalhiy 40 kata tatamakgaxtokgli chatiy lakpuskatin xalak Canaán. Uma lu kamakgalipuwa Isaac chu Rebeca, xlakata uma lakpuskatin nixkakninanikgoy Jehová.

Akgtum kilhtamaku wi tuku lalh, chu Esaú snun sitsinilh xtala Jacob. Chalh kilhtamaku akxni Isaac xʼama maxkiy akgtum tasikulunalin xapuxku xkgawasa. Xlakata Esaú xapuxku xwanit chu ni Jacob, Esaú xkgalhima namaxkikan tasikulunalin. Pero Esaú kstamaxkinitta Jacob xlipuxku chu wa Jacob xlakgchan namakglhtinan tama tasikulunalin. Nachuna akxni xchatiykan lakgkgawasan lakachinkgolh, Dios xwanitta pi Jacob xʼama makglhtinan tama tasikulunalin. Chu chuna kgantaxtulh. Isaac sikulanatlawalh Jacob.

Jacob

Alistalh, akxni Esaú katsilh uma, lu lisitsinilh Jacob. Lu snun xlisitsinit chu asta wa pi namakgniy Jacob. Akxni Rebeca katsilh uma lu lipuwa wa xlakata wanilh Isaac: Lu snun naklipuwan komo Jacob na natatawila chatum tsumat xalak Canaán.

Wa xlakata Isaac tasanilh xkgawasa Jacob chu wanilh: Ni natatawilaya chatum puskat xalak Canaán. Wata kapit kxchik mintata Betuel anta kHarán. Chu katatamakgaxtokgti chatum xtsumat minkuku Labán.

Jacob kgalhakgaxmatli xtlat chu tunkun alh makgat anta niku wilakgolh xparientes, kHarán.

Génesis 25:5-11, 20-34; 26:34, 35;27:1-46; 28:1-5; Hebreos 12:16, 17.



Takgalhskinin

  • ¿Tiku xwankgonit Esaú chu Jacob chu tuku tanu xkatlawa?
  • ¿Niku akglit kata xkgalhiy Esaú chu Jacob akxni nilh xtatajkan Abrahán?
  • ¿Tuku tlawalh Esaú nema kalimakgalipuwa xnatlatni?
  • ¿Tuku xlakata Esaú snun sitsinilh xtala Jacob?
  • ¿Tuku limapakgsilh Isaac xkgawasa Jacob?

Amakgapitsi takgalhskinin

  • Kalikgalhtawakga Génesis 25:5-11, 20-34.

    ¿Tuku xwanitta Jehová xlakata xlakkaman Rebeca? (Gén. 25:23.)

    ¿La xlakapastaka Jacob chu la xlakapastaka Esaú, xlakata tiku xlakgchan lipuxku? (Gén. 25:31-34.)

  • Kalikgalhtawakga Génesis 26:34, 35; 27:1-46, chu 28:1-5.

    ¿La litasiyalh pi Esaú kaj nitu xliʼakxilha tuku xla Dios? (Gén. 26:34, 35; 27:46.)

    Xlakata Jacob xmakglhtinalh xtasikulunalin Dios, ¿tuku wanilh Isaac natlaway? (Gén. 28:1-4.)

  • Kalikgalhtawakga Hebreos 12:16, 17.

    Xlakata tuku akgspulalh Esaú, ¿tuku kinkalimasiyaniyan tiku lakgmakgankgoy tuku xla Dios?