Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 12: Kristianos tlawakgoy xatalhman chiki

Takgalhtawakga 12: Kristianos tlawakgoy xatalhman chiki

AKGLHUWA kata titaxtulh. Chu xkamanan Noé, lhuwa kamanan kgalhikgolh. Chu xkaman lakstakkgolh chu na kgalhikgolh xkamanan. Lakapara lhuwa kristianos analh Katiyatni.

Akxni tama kilhtamaku na xlama chatum kristiano xkgawasa xtanat Noé xwanit xtukuwani Nemrod. Xla lixkajni xlikatsiy, xkamakgniy animales chu lakchixkuwin. Nemrod na xakstu mapakgsina tlawaka, xlakata nakamapakgsiy amakgapitsi kristianos. Dios nitlan x’akxilha xtayat Nemrod.

Putum kristianos tama kilhtamaku kaj akgtum tachuwin xkgalhikgoy. Nemrod makxtum xkakgalhiputun kristianos chu chuna tlan makxtum xkamapakgsilh. ¿Katsiya wix tuku tlawalh? Kawanilh pi katlawakgolh akgtum kachikin chu anta xtlawakgolh talhman chiki. Anta unu kdibujo akxilhpat tlawamakgolh tabique.

Jehová nitlan akxilhli tama talhman chiki. Jehová xlakaskin pi x’ankgolh alakatanu chu xlatamakgolh xlikalanka Katiyatni. Pero xlakan wankgolh: ¡Katantit! Katlawaw akgtum kachikin chu akgtum talhman chiki chu xakgstin kachalh asta k’akgapun. ¡Chuna lu nakinkamaxkikanan lanka takaknin! Xlakaskinkgoy pi wa xkakakninanika chu ni Dios.

Wa xlakata Dios tlawalh pi kristianos nialh xtlawakgolh tama talhman chiki. ¿Katsiya wix tuku tlawalh Dios? Dios tlawalh pi kaj xalan xatipalhuwa xtalakgpalilh xtachuwinkan chu nialh kaj tipatum xchuwinankgolh. Nialh la’akgatekgsnikgolh. Wa xlakata xkachikinkan wanika Babel o Babilonia, wamputun «ni talakgatekgsnit».

Akxni chuna tilalh kristianos tsukukgolh ankgoy alakatanu. Wantiku xlakgatekgsnikgoy makxtum alakatanu ankgolh tawilakgoy.

Génesis 10:1, 8-10; 11:1-9.

Kristianos tlawamakgo xatalhman chiki


Takgalhskinin

  • ¿Tiku xwanit Nemrod chu la xakxilha Dios tama chixku?
  • ¿Tuku xlakata tlawamakgolh tabique lakchixkuwin tiku wilakgolh kdibujo?
  • ¿Tuku xlakata Jehová nitlan akxilha uma xatalhman chiki nema tlawamakgolh?
  • ¿Tuku tlawalh Dios xlakata nialh natlawakgoy xatalhman chiki?
  • ¿La wilinika xtukuwani tama xalanka kachikin, chu tuku wamputun tama tukuwani?
  • Akxni Jehová tlawalh pi nialh kalaʼakgatekgsnikgolh xtachuwinkan, ¿tuku tlawakgolh kristianos?

Amakgapitsi takgalhskinin

  • Kalikgalhtawakga Génesis 10:1, 8-10.

    ¿La xwanit xtayat Nemrod, chu tuku kinkawaniyan Biblia ni natlawayaw la xtlaway Nemrod? (Pro. 3:31.)

  • Kalikgalhtawakga Génesis 11:1-9.

    ¿Tuku xlakata xtlawamakgolh xatalhman chiki, chu tuku xlakata lu xlikana nitlan xʼama kataxtuni? (Gén. 11:4; Pro. 16:18; Juan 5:44.)