UMA lakchixkuwin nema akxilhpat kamafuerzalinimaka naskujkgoy. ¡Kaʼakxilhti tama chixku makgsnokgma chatum skujni! Uma skujnin wa xfamilia Jacob, kawanikan li Israel. Chu wantiku kamafuerzalinima naskujkgoy wa li Egipto. Wa li Israel kaj kskujnin li Egipto katlawaka. ¿La chuna kitaxtulh uma?

Li Egipto kakgesnokgmakgo li Israel

Akglhuwa kata xalanka xfamilia Jacob lu xalipaxaw xlamakgolh kʼEgipto. Faraón xmapakgsinan, chu José wantiku xlikgalhtiy mapakgsina xalak Egipto xwanit, wa xkakuentajtlaway. Pero akxni nilh José. Chu achatum Faraón tiku ni xkapaxkiy li Israel tawi xlimapakgsina kʼEgipto.

Chu uma mapakgsina tiku lixkajni likatsiy kaj kskujnin katlawalh li Israel. Chu kamakuentajtlawalh lakchixkuwin tiku lixkajni likatsikgoy chu ni lakgalhamaninankgoy. Umakgolh lakchixkuwin xkamafuerzaliniy xlakata tliwakga naskujkgoy li Israel, xkamatlawikan kachikinin xla Faraón. Pero li Israel tlakg xtalhuwimakgolh. Akxni xtitaxtunit akglhuwa kilhtamaku li Egipto nixkatsikgoy tuku natlawakgoy xlakata tlakg xtalhuwimakgolh chu xlakapastakkgoy pi tlakg lakgtliwakga nawankgoy.

Li Egipto kakgesnokgmakgo li Israel

¿Katsiya wix tuku tlawalh Faraón? Kawanilh lakpuskatin wantiku xkamakgtayay lakpuskatin li Israel akxni xkgalhikgoy xlakgskgatan, chu kawanilh: Putum lakgkgawasan nema nalakachin nakamakgniyatit. Pero umakgolh lakpuskatin tlan xlikatsikgoy chu ni xmakgnikgoy lakgskgatan.

Wa xlakata Faraón kamapakgsilh kachikin chu kawanilh: Putum laktsu lakgkgawasan li Israel kamakgnitit. Kaj laktsu laktsumajan namakgxtakgatit. ¿Ni lu xalilakgaputsu uma tuku mapakgsinalh? Kaʼakxilhwi la lakgtaxtulh chatum aktsu kgawasa.

Exodus 1:6-22.



Takgalhskinin

  • ¿Tiku uma chixku chipanit lisnokgni nema wi kdibujo, chu tiku chixku nema makgsnokgmaka?
  • ¿Tuku kaʼakgspulalh li Israel akxni xninitta José?
  • ¿Tuku xlakata li Egipto tsukukgolh kapekuanikgoy li Israel?
  • ¿Tuku kalimapakgsilh Faraón lakpuskatin tiku xkamakgtayay lakpuskatin li Israel akxni xkgalhikgoy xlakgskgatankan?

Amakgapitsi takgalhskinin

  • Kalikgalhtawakga Éxodo 1:6-22.

    ¿La tsukulh makgantaxtiy Jehová wantuku xwaninit namaxkiy Abrahán? (Éxo. 1:7; Gén. 12:2; Hech. 7:17.)

    ¿La limasiyakgolh lakpuskatin tiku xkamakgtayay lakpuskatin li Israel akxni xkgalikgoy xlakgskgatan pi lanka xtapalh xakxilhkgoy latamat? (Éxo. 1:17; Gén. 9:6.)

    ¿La kamaxkika tasikulunalin lakpuskatin tiku xkamakgtayay lakpuskatin li Israel xlakata tlakg xpekuanikgoy Jehová nixawa mapakgsina xalak Egipto? (Éxo. 1:20, 21; Pro. 19:17.)

    ¿La litsakgsalh Satanás nalaktlaway xtalakaskin Jehová xlakata xkgawasa Abrahán nema xwaninit pi xʼama min? (Éxo. 1:22; Mat. 2:16.)