Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 23: Xtamanaxnat Faraón

Takgalhtawakga 23: Xtamanaxnat Faraón

AKGTIY kata titaxtulh, chu José tanumajku kpulachin. Chixku tiku xmaxkiy xvino Faraón nina lakapastaka José. Chalh kilhtamaku akgtum katsisni Faraón wi tuku manaxnalh, pero nixtachuna amakgapitsi tamanaxnat, chu xakstu xkgalhskinkan tuku wamputun xtamanaxnat. ¿Akxilhpat lhtatama? Lichali Faraón katasanilh tiku xalakgskgalalan tiku xwanikgoy tuku xwamputun xtamanaxnat chu kawanilh tuku limanaxnalh. Pero xlakan ni katsikgoy tuku xwamputun xtamanaxnat.

Chixku tiku xmaxkiy xvino Faraón aku lakapastakli José. Chu wanilh Faraón: Akxni akit xaktanuma kpulachin na anta xtanuma chatum kgawasa tiku tlan wan tuku wamputun tamanaxnat. Faraón tunkun matamakxtuninalh José.

Faraón wanilh José xtamanaxnat: Kukxilhli tantujun wakax xalakgkgon chu lakswan. Chu alistalh kukxilhli tantujun wakax xalak kgajkgala chu laklukutwa. Chu wakax xalak kgajkgala wakgolh wakax xalakgkgon.

Manixnama Faraón

Xlimakgtiy kmanaxnalh kukxilhli kgantum trigo chu pukgalhtujun xkgalhi niku xwi xtawakat chu xkgalhi xalakwan xtawakat chu xakatla. Na kukxilhli a kgantum trigo chu na pukgalhtujun xkgalhi niku xkgalhiy xtawakat pero xtawakat xalakskakni chu xalak tsatsina xwanit. Chu nema xkgalhi xtawakat xalak tsatsina tsukulh way nema xkgalhi xalakwan xtawakat.

José wanilh Faraón: Tama akgtiy mintamanaxnat kaj pulaktum tuku wamputun. Tantujun wakax xalakgkgon chu kgantum trigo nema pukgalhtujun xkgalhi niku xwi xtawakat xalakwan wamputun akgtujun kata, chu tantujun wakax xalak kgajkgala chu kgantum trigo nema pukgalhtujun xkgalhi niku xwi xtawakat xalakskakni wamputun a akgtujun kata. Naʼanan akgtujun kata akxni lhuwa taway naʼanan kʼEgipto. Chu alistalh naʼanan akgtujun kata akxni nilhuwa katiʼanalh taway kʼEgipto.

Wa xlakata José wanilh Faraón: Kaputsa chatum chixku tiku xaskgalala chu kamastokgli tuku nawakan tama akgtujun kata akxni lhuwa natamakgalay taway. Chuna, ni katinikgolh kristianos tama akgtujun kata akxni nachin tatsinksni.

Faraón tlan akxilhli xtachuwin José. Chu lilaksakli José xlakata kamakilh taway chu namamakgstokgwiliy. Alistalh José chalh xlikgalhtiy mapakgsina tlakg lanka xlakatsukut kʼEgipto.

Titaxtulh akgtsayan kata, akxni xʼanamaja tatsinksni José akxilhli makgapitsin lakchixkuwin. ¿Tiku tama lakchixkuwin? ¡Wa kgalhkaw xalakpuxku xnatalan José! Xtlatkan Jacob kamalakgachalh kʼEgipto xlakata sputma xtawaykan anta kxkachikinkan kCanaán. José kalakgapasli pero xnatalan nilakgapaskgolh José. ¿Katsiya wix tuku xlakata? Xlakata tlakg akglhuwata xkata uku, chu xlhakgat nixtachuna la pulana xwiliy.

José lakapastakli akxni aktsu kgawasa xwanit akxni tilimanaxnalh pi xnatalan xminkgonit talakgatsokgostakgoy. ¿Lakapastaka wix akxni likgalhtawakga tama? Wa xlakata akgatekgsli pi wa Dios wantiku malakgachalh kʼEgipto chu natlaway tuku lu xlakaskinka. ¿Tu lakpuwan wix pi tlawalh José? Kaʼakxilhwi.

Génesis 41:1-57; 42:1-8; 50:20.



Takgalhskinin

  • ¿Tuku akgspulalh Faraón akgtum katsisni?
  • ¿Tuku xlakata wantiku xmaxkiy xvino Faraón aku lakapastakli José?
  • Chuna la tasiyay kdibujo, ¿tuku pulaktiy tamanaxnat kgalhilh Faraón?
  • ¿Tuku wa José pi xkilhchanima tama tuku limanaxnalh Faraón?
  • Faraón xwi xlimapakgsina kʼEgipto, alistalh, ¿la chalh José xlikgalhtiy mapakgsina?
  • ¿Tuku xlakata ankgolh kʼEgipto xnatalan José, chu tuku xlakata ni lakgapaskgolh?
  • ¿Tukuya xtamanaxnat lakapastakli José, chu tuku makgtayalh nakatsi tuku xwamputun?

Amakgapitsi takgalhskinin

  • Kalikgalhtawakga Génesis 41:1-57.

    ¿José la malankilh Jehová chu ni lanka makgkatsika chu la nachuna tlan natlawakgoy kstalaninanin Cristo? (Gén. 41:16, 25, 28; Mat. 5:16; 1 Ped. 2:12.)

    Tama akgtujun kata akxni lhuwa xʼanan taway chu tama akgtujun kata akxni xʼanan tatsinksni kʼEgipto, ¿la kinkalimasiyaniyan uma xlakata la wi xtakatsinkan xlakata Dios tiku xaxlikana skujnanikgoy chu la wi xtakatsin tiku kaj wankgoy pi kstalaninanin Cristo? (Gén. 41:29, 30; Amós 8:11, 12.)

  • Kalikgalhtawakga Génesis 42:1-8 chu 50:20.

    Wantiku xaxlikana xkakninanin Jehová, ¿tlan natakilhputanikgoy chatum chixku xlakata nalimasiyakgoy pi lakgachixkuwilikgoy xlakata xmapakgsina, komo chuna talismani kxkachikin? (Gén. 42:6.)