JOSÉ kajku xʼakgkutujun kata xkgalhiy akxni linka patajuy kʼEgipto. Anta staka, stamaxkika chatum chixku xtukuwani Potifar. Potifar kskujnaniy mapakgsina xalak Egipto, xtukuwani Faraón.

José tanuma kpulachin

José palha skujnaniy xmalana, Potifar. Wa xlakata, akxni José tlakg kgalhilh kata, Potifar limakgxtakgli nakuentajtlaway tuku xkgalhiy. Pero, ¿tuku xlakata José tanuma kpulachin? Wa xkuenta xpuskat Potifar.

Akxni José tlakg kgalhilh xkata lu xastlan chixku wa, chu xpuskat Potifar xlakaskin pi katatamalh. Pero José katsiy pi tama nitlan, chu ni tatamalh. Xpuskat Potifar snun sitsilh. Wa xlakata, akxni chilh xchixku akgskgawilh, chu wanilh: ¡Uma José lu lixkajni likatsiy xkimafuerzaliputun pi kaktatamalh! Potifar kanajlanilh xpuskat, chu snun sitsinilh José. Matamaknunalh kpulachin.

Chixku tiku xkakuentajtlawa tiku xtanumakgolh kpulachin, tunkun akxilhli pi José tlan xlikatsiy. Wa xlakata makuentajtlawika amakgapitsi tiku xtanumakgolh kpulachin. Alistalh Faraón pekua sitsinilh tiku xmuniy xvino chu na sitsinilh tiku xtlawaniy xkaxtalanchu chu kamatamaknuninalh kpulachin. Akgtum katsisni, xchatiykan manixnankgolh pero nixtachuna la amakgapitsi tamanaxnat, pero nixkatsikgolh tuku xwanputun xtamanaxnatkan. Lichali José kawanilh, kakiwanitit mintamanaxnatkan. Pero Dios makgtayalh José chu kawanilh tuku xwanputun tama xtamanaxnatkan.

Chixku tiku xmaxkiy xvino Faraón wanilh: Kaj akgtutu kilhtamaku natitaxtuy chu namaxtukana chu namujuniparaya xvino Faraón. Wa xlakata wanilh: Akxni nataxtuya nalixakgatliya Faraón kinpalakata, chu kakimakgtaya xlakata naktaxtuy. Pero xtlawana kaxtalanchu, wanilh: Kaj akgtutu kilhtamaku natitaxtuy Faraón namachukuktinan mi akgxekga.

Kaj akgtutu kilhtamaku titaxtulh chuna lalh la xwanit José. Faraón pixchukuktilh tiku xtlawaniy xkaxtalanchu. Pero wa tiku xmakiy xvino maxtuka kpulachin chu skujnanipa mapakgsina. ¡Pero patsankgalh José! Ni lixakgatlilh Faraón, wa xlakata José nina taxtulh kpulachin.

Génesis 39:1-23; 40:1-23.



Takgalhskinin

  • ¿Niku akglit kata xkgalhiy José akxni linka kʼEgipto, chu tuku lalh akxni chalh anta?
  • ¿Tuku xlakata tamaknuka kpulachin José?
  • ¿Tuku liyawaka José akxni xtanuma kpulachin?
  • ¿La kamakgtayalh José tiku xmaxkiy xvino Faraón chu tiku xtlawani xkaxtalanchu akxni xtanumakgolh kpulachin?
  • ¿Tuku nitlawalh tiku xmaxkiy xvino Faraón, akxni tamakxtuka kpulachin?

Amakgapitsi takgalhskinin

  • Kalikgalhtawakga Génesis 39:1-23.

    Akxni xlama José nitu xwi tatsokgni xlakata xlimapakgsin Dios niku xwan pi lanka talekgalhin tiku laʼakgskgawi pero, ¿tuku malakapastakalh natsalaniy xpuskat Potifar? (Gén. 2:24; 20:3; 39:9.)

  • Kalikgalhtawakga Génesis 40:1-23.

    Kawanti tuku limanaxnalh tiku xmaki xvino Faraón, chu na kawanti tuku wanilh Jehová José xlakata tuku xwamputun tama tamanaxnat. (Gén. 40:9-13)

    ¿Tuku limanaxnalh chixku tiku xtlawa kaxtalanchu, chu tuku xwanputun? (Gén. 40:16-19.)

    Skujni xalipaw chu xaskgalala xala uku, ¿la nachuna lakapastakkgoy chuna la xlakapastaknan José? (Gén. 40:8; Sal. 36:9; Juan 17:17; Hech. 17:2, 3.)

    ¿La stalanka kinkamakgatekgsayan Génesis 40:20 chuna la xliʼakxilhatkan kstalaninanin Cristo tamakatamitat xla kata? (Ecl. 7:1; Mar. 6:21-28.)