Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 21: Xnatalan José ni akxilhputunkgoy

Takgalhtawakga 21: Xnatalan José ni akxilhputunkgoy

¡KAʼAKXILHTI, tasiyay pi lu lakgaputsay chu niti makgtayay uma kgawasa! Wa José. Xnatalan stakgolh, tamawakgolh li Ismael wanti amakgolh kʼEgipto. Anta kaj skujni nalitaxtuy José. ¿Tuku xlakata tlawakgolh uma lu nitlan xtunatalan? Xlakata xlakgkatsananikgoy.

Stamakgo xnatalan José

Xtlatkan Jacob lu xpaxkiy José. Limasiyalh pi lu xpaxkiy akxni tlawanilh xalhman chu xastlan xlhakgat. Akxni xkgalhkawkan tlakg xanapuxkun xnatalan akxilhkgolh pi Jacob lu xpaxkiy José tsukukgolh lakgkatsananikgoy chu nialh xʼakxilhputunkgoy. Pero na xʼanan atanu tuku na ni xliakxilhputunkgoy.

José makgtuy manaxnalh. Manaxnalh pi xnatalan xtakilhputanimakgolh. Pero tlakg lisitsinikgolh akxni José kawanilh xtamanaxnat.

Akgtum kilhtamaku akxni xnatalan xkuentajtlawamakgolh xborrego xtlatkan, Jacob wanilh José pi kaʼalh kaʼakxilha komo tlan lamakgolh xnatalan. Akxni xnatalan akxilhkgolh pi xkalakgama José, makgapitsi wankgolh: ¡Kamakgniw! Pero xapuxku, Rubén wa: ¡Ni, nichuna katlawatit! Ni makgnikgolh, pero mujukgolh ktakgalhwaxni niku nitu xtajuma chuchut. Tawilakgolh chu tsukukgolh lakapastakkgoy tuku natlawanikgoy José.

Akxni tama xlakapastakmakgolh tuku natlawanikgoy José, minkgolh li Ismael. Judá kawanilh xtunatalan: Kaw kastamaxkiyaw li Ismael. Chu chuna tlawakgolh. ¡Puxum tumin xaplata listakgolh! ¡Lu ni lakgalhamankgolh chu lu nitlan likatsikgolh chuna la tlawakgolh!

¿Tuku wanikgolh xtlatkan? Makgnikgolh tantum cabra chu makglhuwa mukgolh xlhakgat José kxkgalhni tama cabra. Alistalh linikgolh xtlat chu wanikgolh: Ktekgswi uma lhakgat. Kaʼaxilhti, pi ni xla José.

Jacob akxilhli pi wa xlhakgat xkgawasa chu pixlanka tsukulh tasay chu wa: Tantum animal xaluku max makgnilh José. Chuna xlakaskinkgoy xnatalan kalakapastakli Jacob. Jacob lu lilipuwa. Chu akglhuwa kilhtamaku tasalh. Pero José nitu xninit. Naʼakxilhaw tuku lalh anta niku linka.

Génesis 37:1-35.



Takgalhskinin

  • ¿Tuku xlakata xlakgkatsananikgoy xnatalan José chu tuku tlawanikgolh?
  • ¿Tuku xtlawaniputunkgoy xnatalan José, pero Rubén tuku wa?
  • ¿Tuku tlawakgolh xnatalan José akxni xtitaxtumakgolh stananin li Ismael?
  • ¿Tuku tlawakgolh xnatalan José xlakata xtlat xlakpuwa pi xkgawasa xninit?

Amakgapitsi takgalhskinin

  • Kalikgalhtawakga Génesis 37:1-35.

    ¿La nachuna kilitlawatkan akinin kstalaninanin Cristo chuna la tlawalh José xlakata namakatsininanaw akxni nakatsiyaw pi kcongregación wi tiku nitlan xtayat? (Gén. 37:2; Lev. 5:1; 1 Cor. 1:11.)

    ¿Tuku xlakata stamakgankgolh xnatalan José? (Gén. 37:11, 18; Pro. 27:4; Sant. 3:14-16.)

    ¿La limasiyalh Jacob pi xlipuwan? (Gén. 37:35.)