Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 20: Dina putsalh taʼakglhuwit

Takgalhtawakga 20: Dina putsalh taʼakglhuwit

¿AKXILHPAT tiku ama kalakgapaxialhnan Dina? Ama kalakgapaxialhnan laktsuman xalak Canaán. ¿Pi tlan xʼakxilha Jacob xtlat Dina nakalakgapaxialhnan ama laktsuman? Xlakata nakatsiyaw komo tlan xʼakxilha, nakinkamakgtayayan nalakapastakaw tuku xlakpuwan Abrahán chu Isaac xlakata lakpuskatin xalak Canaán.

Dina kalakgapaxialhnama laktsuman xalak Canaán

¿Xlakgatiy Abrahán pi xkgawasa Isaac xtatamakgaxtokgli tsumat xalak Canaán? Ni. ¿Xlakgatiy Isaac chu Rebeca pi xkgawasa Jacob xtatamakgaxtokgli tsumat xalak Canaán? Ni. ¿Katsiya tuku xlakata?

Xlakata tama kristianos xalak Canaán xkakninanikgoy dioses nixaxlikana. Nixatlan kristianos xwankgonit xlakata nakatatamakgaxtokgkan chu na ni xatlan kristianos xlakata lu tlan nakatalalinkan. Wa uma likatsiyaw pi Jacob ni xlakgatiy pi Dina nakatalalin tama laktsuman xalak Canaán.

Chuna Dina putsalh takglhuwit. ¿Akxilhpat kdibujo tama chixku xalak Canaán, wantiku akxilhma Dina? Xtukuwani Siquem. Akgtum kilhtamaku akxni Dina milh kalakgapaxialhnan, Siquem mafuerzajlinilh natatamay Dina. Uma tuku tlawalh nitlan, xlakata kaj watiya tiku latatamakgaxtokgnit tlan latatamay. Uma tuku nitlan tlawanilh Siquem Dina, litsukulh lhuwa taʼakglhuwit.

Akxni xnatalan kawanika tuku xakgspulunit Dina, snun lisitsikgolh. Xchatiykan Simeón chu Leví, lu sitsikgolh asta tiyakgolh xespadas chu tsekg tanukgocha kkachikin. Simeón, Leví chu xnatalan makgnikgolh Siquem chu putum amakgapitsi lakchixkuwin. Jacob snun lisitsilh xlakata uma lanka nitlan tuku tlawakgolh xkamanan.

¿La lakatsukulh uma taʼakglhuwit? Xlakata Dina lu tlan xkatalalin tiku ni xtlawakgoy tuku Dios xlakaskin. Akinin ni nakatalalinaw tama kristianos tiku ni tlawakgoy tuku Dios lakaskin, ¿nixlikana?

Génesis 34:1-31.



Takgalhskinin

  • ¿Tuku xlakata Abrahán chu Isaac ni xlakaskinkgoy pi xkamanan natatamakgaxtokgkgoy tiku xalak Canaán?
  • ¿Xlakgatiy Jacob pi Dina kakatalalilh laktsuman xalak kCanaán?
  • ¿Tuku xtukuwani tama chixku nema akxilhma Dina, chu tuku lu nitlan tlawalh?
  • ¿Tuku tlawakgolh Simeón chu Leví akxni katsikgolh tuku xakgspulanit Dina?
  • ¿Tlan akxilhli Jacob wantuku tlawakgolh Simeón chu Leví?
  • ¿Tuku litsukulh xtaʼakglhuwit uma familia?

Amakgapitsi takgalhskinin

  • Kalikgalhtawakga Génesis 34:1-31.

    Kawanti, ¿kaj makgtum kalakgapaxialhnalh Dina laktsuman xalak Canaán? (Gén. 34:1.)

    ¿Tuku xlakata Dina na xkuenta xlakata Siquem mafuerzalinilh natatamay? (Gál. 6:7.)

    ¿La limasiyakgoy lakgkgawasan chu laktsuman, pi xlikana kuenta tlawakgoy xlakata ni nakaʼakgspulay chuna la akgspulalh Dina? (Pro. 13:20; 1 Cor. 15:33; 1 Juan 5:19.)