Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 18: Jacob alh kHarán

Takgalhtawakga 18: Jacob alh kHarán

¿KALAKGAPASA uma lakchixkuwin tiku tachuwinamakgolh Jacob? Akxni akglhuwata kilhtamaku xtitaxtunit, Jacob katatanokglhli lakchixkuwin lakatsu niku kamakgotnikan animales. Xkuentajtlawamakgolh xborregojkan. Jacob kakgalhskilh: ¿Niku xala wixin?

Xlakan kgalhtinankgolh, xalak Harán.

¿Lakgapasatit Labán?, kgalhskininalh Jacob.

Klakgapasaw, kgalhtinankgolh. Kaʼakxilhti aminacha xtsumat Raquel, kuentajtlawanima xborregos. ¿Akxilhpat Raquel talakatsuwima?

Jacob lakgapasa Raquel

Akxni Jacob akxilhli Raquel pi xlimin xborregos xla xkuku Labán, alh chu matakgenulh chiwix nema xlikgalhtalakanit chuchut xlakata tlan xkgotnankgolh borregos. Alistalh Jacob lakatsukli Raquel chu wanilh pi xpariente. Raquel snun lipaxuwalh, lakapara alh kchik chu wanilh xtlat tuku lalh.

Labán lu lipaxawalh xlakata Jacob anta xʼama makgtawilay xchik. Chu akxni Jacob wanilh pi xtatamakgaxtokgputun Raquel, Labán lu lipaxuwalh. Pero Labán wanilh Jacob pi kataskujli akgtujun kata xlakata tlan xmaxkilh Raquel. Xlakata Jacob lu xpaxkiy Raquel, chuna tlawalh. Pero akxni chalh kilhtamaku akxni xʼama tatamakgaxtokga Raquel, ¿katsiya tuku lalh?

Labán maxkilh Jacob Lea xapuxku xtsumat, chu ni maxkilh Raquel. Akxni Jacob talakkaxlapa pi naskujnipara akgtujun kata, Labán na maxkilh Raquel xlakata na xpuskat nawan. Akxni tama kilhtamaku Dios xmastay talakaskin pi chalhuwa xlakpuskatin xkgalhikgolh lakchixkuwin. Pero uku kaj chatum xlikgalhitkan, chuna la wan Biblia.

Génesis 29:1-30.



Takgalhskinin

  • ¿Tuku xtukuwani uma tsumat nema wi kdibujo, chu la makgtayalh Jacob?
  • ¿Tuku wa natlaway Jacob xlakata tlan natatamakgaxtokga Raquel?
  • ¿Tuku tlawalh Labán akxni chalh kilhtamaku xlakata Jacob chu Raquel xlatatamakgaxtokgkgolh?
  • ¿Tuku tlawalh Jacob xlakata tlan xtamakgaxtokgli Raquel?

Amakgapitsi takgalhskinin

  • Kalikgalhtawakga Génesis 29:1-30.

    Maski Labán akgskgawilh Jacob, ¿la limasiyalh Jacob pi xatlan chixku xwanit chu tuku kinkamasiyaniyan? (Gén. 25:27; 29:26-28; Mat. 5:37.)

    ¿La limasiyalh Jacob pi ni lakxtum xaxlikana tapaxkit chu tapaxkit nema ni lu xaxlikana? (Gén. 29:18, 20, 30; Cant. de Cant. 8:6.)

    ¿La xkawanikan kgalhtati lakpuskatin nema alistalh takgalhilh kamanan Jacob? (Gén. 29:23, 24, 28, 29.)