Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 14: Liʼakxilhka xtakanajla Abrahán

Takgalhtawakga 14: Liʼakxilhka xtakanajla Abrahán

¿AKXILHPAT tuku tlawama Abrahán? Chipanit akgtum cuchillo, chu tasiyay pi namakgniy xkgawasa. ¿Tuku xlakata? Pulana kaʼakxilhwi la Abrahán chu Sara kgalhikgolh xkgawasakan.

Abrahán makamastama Isaac

Kalakapastakti, Dios xkamaxkinit xtachuwin pi xʼama kamaxkiy chatum kgawasa. Pero uma tuku xkawaninit lu tuwa xtasiyay pi chuna nalay, xlakata Abrahán chu Sara lakgkgolotsina xwankgonit. Pero Abrahán xkanajlay pi Dios tlan tlaway tuku nilay tlawakan. Wa xlakata, ¿la kgalhikgolh xkgawasakan?

Akxni Dios kamaxkilh xtachuwin pi nakgalhikgoy xkgawasakan titaxtulh akgtum kata. Chu akxni Abrahán xkgalhiy 100 kata chu Sara 90, kgalhikgolh chatum aktsu skgata xtukuwani Isaac. ¡Dios tlawalh chuna la xwaninit Abrahán!

Pero akxni akglhuwata kata xkgalhiy Isaac, Jehová liʼakxilhli xtakanajla Abrahán. Wanilh: ¡Abrahán! Chu Abrahán kgalhtinalh: ¡Unu kwi! Alistalh Dios wanilh: Kamakaxti minkgawasa Isaac nema kaj chatum kgalhiya, chu kapit anta ksipi nema nakmasiyaniyan. Chu anta kamakgni minkgawasa chu kakilitlawani akgtum tamakamastan.

¡Uma tuku Dios wanilh Abrahán lu lilipuwa, xlakata lu xpaxkiy xkgawasa! Kalakapastakti, Dios xmaxkinit xtachuwin pi xkamanan Abrahán xʼama kamaxkiy xtiyat Canaán. Pero komo xmakgnilh Isaac, ¿la xʼama kamaxki tiyat? Abrahán kgalhakgaxmatnilh Dios maski nixkatsiy tuku xlakata chuna wanilh.

Akxni chalh Abrahán anta ksipi chilh xkgawasa chu mamilh niku limastakan tamakamastan nema xtlawanit. Alistalh maxtulh xcuchillo xlakata namakgniy xkgawasa. Pero akxni xʼamaja makgniy xkgawasa xʼángel Dios wanilh: ¡Abrahán, Abrahán! Chu Abrahán kgalhtilh: ¡Unu kwi!

Dios wanilh: Nitu katlawani minkgawasa. Uku kkatsilh pi xlikana kinkanajlaniya, xlakata xpinpat kimakamaxkiya minkgawasa.

¡Abrahán lu tliwakga xkanajlaniy Dios! Xkanajlay pi Jehová putum tlan tlaway tuku lakaskin chu tlan xmalakastakwanilh Isaac. Pero Dios nixlikana xlakaskin pi Abrahán xmakgnilh Isaac, Dios tlawalh pi xtalakgnutayalh tantum borrego chu wanilh Abrahán pi wa borrego kamakamastalh chu ni Isaac.

Génesis 21:1-7; 22:1-18.



Takgalhskinin

  • ¿Tukuya tachuwin maxkilh Dios Abrahán, chu la makgantaxtulh?
  • Chuna la tasiyay kdibujo, ¿la liʼakxilhli Dios xtakanajla Abrahán?
  • ¿Tuku tlawalh Abrahán maski nixkatsi tuku xlakata chuna xlimapakgsimaka?
  • ¿Tuku lalh akxni Abrahán maxtulh xcuchillo xlakata namakgniy xkgawasa?
  • ¿La xwi xtakanajla Abrahán?
  • ¿Tuku maxkilh Dios Abrahán xlakata tlan xtlawalh xtamakamastan, chu la maxkilh?

Amakgapitsi takgalhskinin

  • Kalikgalhtawakga Génesis 21:1-7.

    ¿Tuku xlakata Abrahán circuncidartlawalh xkgawasa xliʼakgtsayan kilhtamaku? (Gén. 17:10-12; 21:4.)

  • Kalikgalhtawakga Génesis 22:1-18.

    ¿La limasiyalh Isaac pi xtlaway tuku xlimapakgsikan? Chu uma la tlawalh Isaac, ¿tuku xkilhchanima nema tlakg xlakaskinka xʼama kgantaxtuy? (Gén. 22:7-9; 1 Cor. 5:7; Fili. 2:8, 9.)