Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 78: Tatsokgni anta kpatsaps

Takgalhtawakga 78: Tatsokgni anta kpatsaps
Tatsokgni kpatsaps

¿TUKU lama unu? Umakgolh kristianos tlawamakgolh akgtum fiesta. Mapakgsina xalak Babilonia katatlawama fiesta lhuwa tiku laklanka mapakgsinanin. Chu maklakaskimakgolh copas nema litatlawanit oro chu plata chu na maklakaskima tazones nema kitiyakgonit kxtemplo Jehová anta kJerusalén. Xalan, taxtucha kkaunin akgtum makan chu tsukulh tsokgnan kpatsaps. Putum pekuankgolh.

Belsasar chu tiku ankgonit kxfiesta

Belsasar xtanat Nabucodonosor wa mapakgsina uku. Mapakgsina Belsasar palha tsukulh wan: Kalitantit xalakgskgalalan lakchixkuwin. Chu na wampa: Wantiku tlan nalikgalhtawakgay uma tatsokgni chu nakiwaniy tuku wamputun, lhuwa tuku nakmaskiwiy chu xlikgalhtutu natawila kkintamapakgsin. Pero xalakgskgalalan lakchixkuwin nila likgalhtawakgakgoy uma tatsokgni nema wi kpatsaps chu na nikatsikgoy tuku wamputun.

Xtse uma mapakgsina kgaxmatli pi palha xchuwinamakgolh chu tanulh niku xwayamaka. Chu waniy mapakgsina: Ni kapekuanti. Anta kmintamapakgsin wi chatum chixku tiku lakgapasa dioses xalak santos. Akxni mapakgsina xwanit mintata Nabucodonosor xpuxkukan tlawalh wantiku xalakgskgalalan lakchixkuwin. Xtukuwani Daniel. Kamatasaninanti chu Daniel nawaniyan tuku wamputun.

Wa xlakata lakapara liminka Daniel. Akxni chilh Daniel wa pi ni katimakglhtinalh katuwa tuku xmaskiwiputumaka, Daniel tsukulh waniy Belsasar tuku xlakata Jehová makglhtilh xtamapakgsin xtata. Jehová malakgaxokgelh xlakata tlanka xmakgkatsikan.

Daniel waniy Belsasar: Wix xkatsiya chuna la ti’akgspulalh Nabucodonosor chu chuntiya wix xatlanka makgkatsikana chuna la xwanit mintata. Kitiyanita kxtemplo Jehová xcopas chu xtazones chu wa lipokgotnanpatit. Malankipat dioses nema litatlawanit kiwi chu nema litatlawanit chiwix chu niwa malankipat kimalakatsukinakan Dios xala talhman. Wa xlakata Dios makamilh uma makan xlakata natsokga uma tachuwin.

Daniel wan: Uma tatsokgni wan MENÉ, MENÉ, TEKEL chu PARSÍN.

MENÉ wamputun pi Dios putlekgenit mintamapakgsin chu masputulha. TEKEL wamputun pulhkakanita kbalanza chu akxilhka pi nitlan likatsiya. PARSÍN wamputun pi mintamapakgsin kamakamaxkimaka li Media chu li Persia.

Chu akxni Daniel xchuwinamajku li Media chu li Persia tanukgolh kBabilonia xlakata namasputukgoy chu makgnikgolh Belsasar. ¡Tatsokgni nema wilika kpatsaps, akxnitiya tama katsisni kgantaxtulh! Chu li Israel, ¿tuku naka’akgspulay? Na’akxilhaw pero pulana nakatsiyaw tuku lanilh Daniel.

Daniel 5:1-31.



Takgalhskinin

  • ¿Tuku lalh akxni mapakgsina xalak Babilonia tlawalh fiesta chu xmaklakaskima copas chu tazones xalak kxtemplo Jehová nema xwilacha kJerusalén?
  • ¿Tuku kawani Belsasar wantiku xalakgskgalalan lakchixkuwin, pero tuku nila tlawakgoy?
  • ¿Tuku wanilh xtse Belsasar?
  • Chuna la waniy Daniel mapakgsina, ¿tuku xlakata Dios tlawalh pi akgtum makan katsokgnalh kpatsaps?
  • ¿Tuku wa Daniel pi wamputun tachuwin nema xtatsokgnit kpatsaps?
  • ¿Tuku lalh akxni xchuwinamajku Daniel?

Amakgapitsi takgalhskinin

  • Kalikgalhtawakga Daniel 5:1-31.

    Kawanti, ¿la nixtachuna xatlan tapekua nema kgalhinikan Dios chu tapekua nema xkgalhiy Belsasar akxni akxilhli tatsokgni kpatsaps? (Dan. 5:6, 7; Sal. 19:9; Rom. 8:35-39).

    ¿La limasiyalh Daniel pi ni xapekua xwanit akxni chuwinalh kxlakatin Belsasar chu kxlakatin laklanka mapakgsinanin? (Dan. 5:17, 18, 22, 26-28; Hech. 4:29.)

    Chuna la tatsokgnit kDaniel capítulo akgkitsis, ¿la litasiyay pi manwa Jehová mininiy namapakgsinan xlikalanka kakilhtamaku? (Dan. 4:17, 25; 5:21.)