Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 81: Lipawamakgolh xtamakgtay Jehová

Takgalhtawakga 81: Lipawamakgolh xtamakgtay Jehová

AKGLHUWA mil kristianos taxtukgocha kBabilonia xlakata na’ankgoy kJerusalén. Pero akxni chankgolh kJerusalén putum talakxtlawanit. Nitiku lama anta. Li Israel nasastitlawaparakgoy tuku anta x’anan.

Wantuku na pulana tlawakgolh akxni chankgolh wa anta niku namakamaxkikgoy Jehová xtamakamastankan xla animales. Ni makgas titaxtulh kilhtamaku li Israel tsukukgolh tlawakgoy templo. Pero wantiku nixka’akxilhputun wantiku lakatsu xwilakgolh xkamakgapekuanputunkgoy xlakata nialh natlawakgoy templo. Titaxtulh kilhtamaku, wantiku nixka’akxilhputun li Israel tlawakgolh pi mapakgsina xalak Persia katlawalh akgtum tamapakgsin xlakata nialh natlawakan templo.

Titaxtulh akgkutujun kata akxni li Israel taxtukgocha kBabilonia. Dios kamalakgachalh xpalakachuwinanin Ageo chu Zacarías xlakata nakawaniy kristianos pi kakaxtlawaparakgolh templo. Li Israel lipawankgoy Jehová chu kgalhakgaxmatkgoy. Chu tsukuparakgolh tlawakgoy templo. Maski limapakgsin wan pi nikatlawakgolh.

Wa xlakata chatum soldado xtukuwani Tatenai xalak Persia milh chu kakgalhskilh tiku kamaxkilh talakaskin xlakata natlawakgoy templo. Li Israel kgalhtikgolh, kBabilonia kinkawanin Ciro: Kapitit kJerusalén chu katlawaparatit xtemplo Dios Jehová.

Tatenai malakgachalh tatsokgni anta kBabilonia chu kgalhskininalh komo xlikana Ciro chuna tiwa akxni xlama. Tunkun milh akgtum tatsokgni nema makamincha mapakgsina xalak Persia. Chu anta kxtatsokgni wa pi xlikana. Chu na tsokgli: Kakamaxkitit talakaskin li Israel katlawakgolh xtemplo xDioskan. Chu kkamapakgsiyan pi kakamakgtayatit. Akxni aya titaxtulh akgtati kata tlawakgoka templo chu li Israel lu paxuwakgoy.

Titaxtulh 48 kata akxni titlawakgoka xtemplo Jehová. Tiku lamakgolh anta kJerusalén xalakglimaxkganin kkachikin chu xtemplo Dios nistlan tasiyakgoy. Anta kBabilonia chatum li Israel xtukuwani Esdras katsicha pi xtemplo Dios xalak Jerusalén likaxtlawat. ¿Katsiya tuku tlawalh?

Esdras alh akxilha Artajerjes mapakgsina xalak Persia, uma mapakgsina tiku tlan likatsi maxkiy lhuwa tamaskiwin Esdras xlakata nalin kJerusalén. Esdras kaskini Israelitas wantiku wilakgolh kBabilonia pi kamakgtayakgolh chu max 6,000 wankgoy pi namakgtayakgoy. Linkgoy oro, plata chu atanu tuku lhuwa xtapalh.

Esdras lilakgaputsay xlakata ktiji anan lakchixkuwin tiku lixkajni likatsikgoy. Umakgolh lakchixkuwin max nakamakgkgalhanankgoy chu na max nakamakgnikgoy. Wa xlakata Esdras kamamakxtumi kristianos chuna la akxilha kdibujo. Chu alistalh tsukukgolh tlawanikgoy oración Jehová xlakata nakamakgtaya akxni na’ankgoy kJerusalén.

Esdras chu kristianos tlawamakgo oración

Jehová kamakgtaya. Akxni titaxtulh akgtati papa’ tlan chankgolh kJerusalén. Uma kinkamasiyaniyan pi Jehová tlan kamakgtaya tiku lipawankgoy, ¿nixlikana?

Esdras, capítulos 2 asta 8.



Takgalhskinin

  • ¿La xlilhuwa kristianos taxtukgocha kBabilonia chu ankgolh kJerusalén, pero la xwi anta akxni chankgolh?
  • ¿Tuku tsukukgolh tlawakgoy li Israel akxni chankgolh kJerusalén, pero tuku tlawagolh wantiku nixka’akxilhputunkgoy?
  • ¿Tiku Ageo chu Zacarías chu tuku kawaniy kristianos?
  • ¿Tuku xlakata Tatenai malakgachalh akgtum tatsokgni kBabilonia chu tuku wanika akxni kgalhtika xtatsokgni?
  • ¿Tuku tlawalh Esdras akxni katsilh pi xtalakaskin nakaxtlawakan xtemplo Dios?
  • Chuna la tasiyay kdibujo, ¿tuku skinilh Esdras Jehová kx’oración? ¿La litasiyalh pi Jehová kgalhtilh x’oración, chu tuku kinkamasiyaniyan uma?

Amakgapitsi takgalhskinin

  • Kalikgalhtawakga Esdras 3:1-13.

    Komo anta niku wilaw ni anan congregación xla xtatayananin Jehová, ¿tuku ni namakgxtakgaw chu chuntiya natlawayaw? (Esd. 3:3, 6; Hech. 17:16, 17; Heb. 13:15.)

  • Kalikgalhtawakga Esdras 4:1-7.

    ¿Tukuya li’akxilhtit kawilinilh xkachikin Jehová Zorobabel xlakata ni natamalakgxtumikgoy xtakanajlakan atanu takanajla akxni nakakninanikgoy Dios? (Éxo. 34:12; 1 Cor. 15:33; 2 Cor. 6:14-17.)

  • Kalikgalhtawakga Esdras 5:1-5, 17 chu 6:1-22.

    ¿Tuku xlakata nila malakgachokgokgolh taskujut akxni xkaxtlawamaka templo tiku nixka’akxilhputunkgoy li Israel? (Esd. 5:5; Isa. 54:17.)

    Akxni wintiku lakatayay xtaskujut Dios, ¿la kamakgtayay lakgkgolotsin xalak congregación xala uku chuna la titlawakgolh lakgkgolotsin li Judíos akxni putsakgolh xtamakgtay Jehová? (Esd. 6:14; Sal. 32:8; Rom. 8:31; Sant. 1:5.)

  • Kalikgalhtawakga Esdras 8:21-23, 28-36.

    Akxni wi tuku lu xlakaskinka nalakapastakaw natlawayaw kkilatamatkan, ¿tuku na tlan natlawayaw chuna la titlawalh Esdras? (Esd. 8:23; Sal. 127:1; Pro. 10:22; Sant. 4:13-15.)