Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 99: Anta xlikilhmaktiy kchiki

Takgalhtawakga 99: Anta xlikilhmaktiy kchiki

UKU jueves ay tsiswanit, ay akgtiy kilhtamaku titaxtunit. Jesús chu kgalhkutiy x’apóstoles minkgonit anta unu kchiki kxakilhmaktiy xlakata nawakgoy taway nema wanikan Pascua. Chu wantiku tasiya kdibujo pi taxtuma xtukuwani Judas Iscariote. Ama kawaniy sacerdotes la natlawakgoy xlakata tlan nachipakgoy Jesús.

Xtaway kinPuxkukan Jesús

Likgotana xkalakganit sacerdotes chu kakgalhaskinilh: ¿Tuku nakilamaxkiyaw komo nakkamakgtayayan xlakata tlan nachipayatit Jesús? Sacerdotes wanikgolh: Puxamakaw tumin xaplata nakkamaxkiyan. Chu uku Judas kalakgama sacerdotes xlakata nakalin niku wi Jesús. ¡Lu lanka nitlan!, ¿nixlikana?

Taway nema wanikan pascua kgatsputli. Pero Jesús matsukima atanu taway nema ni anan xtachuna. Jesús kamaxki maktum kaxtalanchu x’apóstoles chu kawani: Kawatit uma kaxtalanchu wa nema kilhchanima kintiyatliwa nema nakmakamastay minpalakatakan. Jesús na tiyalh pukgotnu nema xkgalhiy vino chu kawani: Kawatit xlakata wa uma kilhchanima kinkgalhni nema nastajtamakgan minpalakatakan. Biblia waniy uma taway, xtaway kinPuxkukan Jesús.

Li Israel xwakgoy Pascua nema xlilakapastakkgoy akxni x’ángel Dios lakatsalalh xchikkan li Israel anta k’Egipto pero kamakgnilh xalakpuxkun xlakgkgawasakan li Egipto. Pero uku Jesús lakaskin pi kstalaninanin kalakapastakkgolh pi nakapalakaniy. Wa xlakata xla kawanilh pi nachuna katlawakgolh uma taway kata kata.

Akxni xwakgonitta uma taway nema wanikan Taway xla kinPuxkukan, Jesús kawaniy x’apóstoles pi ni kapekuankgolh chu lakgtliwakga kawilikgolh xtakanajlakan. Akxni ay kgatsputli, tsukukgolh tlinikgoy Dios chu taxtukgocha. Max liwakay itat tsisni uku. Ka’akxilhwi niku ankgolh.

Mateo 26:14-30; Lucas 22:1-39; Juan, capítulo 13 asta 17; 1 Corintios 11:20.



Takgalhskinin

  • Chuna la tasiyay kdibujo, ¿tuku xlakata Jesús chu kgalhkutiy x’apóstoles wilakgolh anta kxlikilhmaktiy chiki?
  • Chuna la tasiyay kdibujo, ¿tiku tama chixku tiku taxtuma chu tuku ama tlaway?
  • ¿Tuku xtukuwani taway ni anan xtachuna nema makilhtsukilh Jesús akxni ay xkgatsputnit taway nema wanikan pascua?
  • ¿Tuku xlilakapastakkgoy li Israel akxni xtlawakgoy pascua chu tuku x’ama kamalakapastakay kstalaninanin uma taway nema makilhtsukilh Jesús?
  • Akxni xtlawakgonitta Taway xla kinPuxkukan, ¿tuku kawaniy Jesús kstalaninanin chu tuku tlawakgolh xlakan?

Amakgapitsi takgalhskinin

  • Kalikgalhtawakga Mateo 26:14-30.

    ¿La limasiyay Mateo 26:15 pi akxni Judas makamastalh Jesús lu liwana lakapastakli?

    ¿Tlan xwanti pulaktiy tuku xlakata listajtamakgalh xkgalhni Jesús? (Mat. 26:27, 28; Jer. 31:31-33; Efe. 1:7; Heb. 9:19, 20.)

  • Kalikgalhtawakga Lucas 22:1-39.

    ¿Tuku xlakata tawan pi Satanás laktanulh kxnaku Judas? (Luc. 22:3; Juan 13:2; Hech. 1:24, 25.)

  • Kalikgalhtawakga Juan 13:1-20.

    Xlakata tuku wan Juan 13:2, ¿tlan naliwilikan Judas xlakata tuku tlawalh chu tuku kinkamasiyaniyan uma pi ni natlawayaw akinin kskujnin Dios? (Gén. 4:7; 2 Cor. 2:11; Gál. 6:1; Sant. 1:13, 14.)

    ¿Tuku lu xatlan likxilhtit kinkawilinin Jesús? (Juan 13:15; Mat. 23:11; 1 Ped. 2:21.)

  • Kalikgalhtawakga Juan 17:1-26.

    ¿Tuku xkilhchanima Jesús akxni kaskinilh kstalaninanin pi chatum nawankgoy? (Juan 17:11, 21-23; Rom. 13:8; 14:19; Col. 3:14.)