Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 90: Tachuwinama puskat niku xkgatnankan

Takgalhtawakga 90: Tachuwinama puskat niku xkgatnankan

JESÚS jaxma lakatsu niku xkgatnankan anta kSamaria. Kstalaninanin ankgonit tamawakgoy tuku nawakgoy anta kkachikin. Chu puskat tiku tachuwinama minit xkgata. Jesús waniy puskat: Kakintawa chuchut.

Jesús tachuwinama chatum puskat li Samaria

Puskat nixmakanajla pi xmakgskima chuchut. ¿Katsiya wix tuku xlakata nixmakanjla? Jesús li Judá chu xla li Samaria. Li Judá nixka’akxilhputunkgoy li Samaria. ¡Nipara xkatachuwinankgoy! Pero Jesús kapaxkiy putum kristianos maski alakatanu xalanin. Jesús waniy: Komo wix xkatsi tiku akit, wix xkimakgskinti chuchut nema mastay latamat chu akit xakmaxkin.

Puskat wan: Kinpuxku unu niku makutukan chuchut lu pulhman chu wix nipara kgalhiya tuku nalimakutuya. ¿Niku natiyaya chuchut wa nema mastay latamat?

Jesús waniy: Komo nalikgotnana uma chuchut nema tajuma unu, nakgalhputiparaya. Pero chuchut nema akit kmastay tlan natlaway pi nikxni naniya.

Puskat wan: Kinpuxku, ¡kakimaxki chuchut nema wix wana! Chu chuna nialh makgtum ktikgalhputilh. Chu nialh akxni ktimilh xkgata unu.

Uma puskat lakpuwan pi Jesús lichuwinama chuchut nema likgotnankan. Pero Jesús lichuwinama wantuku xaxlikana xlakata Dios chu xtamapakgsin chu uma la chuchut nema mastay latamat. Nema tlan tlaway pi nikxni nanikan.

Chu uku Jesús waniy puskat: Kakitasani minchixku chu katampara.

Puskat wan: Akit nikkgalhiy kinchixku.

Tlan la kgalhtinanti wan Jesús. Pero kgalhkitsis lakchixkuwin tikgalhinita chu chixku wantiku tawila ni minchixku.

Puskat nikatsi tuku nawan xlakata putum tuku wanima Jesús xaxlikana. ¿La katsilh Jesús uma tuku wanilh? Jesús xkatsiy xlakata wa Dios xmalakgachanitancha wantiku xwankanit pi x’ama min, chu Dios xmakatsiniy. Akxni kstalaninanin Jesús chinkgolh, xlakan nila makanajlakgoy pi Jesús tachuwinama li Samaria.

¿Tuku kinkamasiyaniyan uma? Kinkamasiyaniyan pi Jesús tlan kalikatsiniy putum kristianos maski xa’alakatanu xalanin o atanu xcolorkan. Akinin nachuna kilitlawatkan, ni nalakpuwanaw pi achatum kristiano nitlan likatsiy kaj xlakata alakatanu xala o tanu xcolor. Jesús lakaskin pi putum kristianos nalakgapaskgoy tuku xaxlikana wantuku tlan tlaway pi nikxni nanikan. Chu akinin na kilimakgtayatkan kristianos nalakgapaskgoy uma tuku xaxlikana.

Juan 4:5-43; 17:3.



Takgalhskinin

  • ¿Tuku xlakata Jesús anta wi lakatsu niku xkgatnankan kSamaria chu tuku wanima chatum puskat tiku minit xkgata?
  • ¿Tuku xlakata puskat nila makanajla xlakata Jesús tachuwinama, tuku waniy Jesús chu tuku xlakata tachuwinan?
  • ¿Tukuya chuchut lakpuwan puskat pi Jesús lichuwinama pero Jesús tukuya chuchut kilhchanima?
  • ¿Tuku xlakata puskat nikatsiy tuku nawan xlakata Jesús putum katsiy la lilama, chu tuku xlakata xkatsi Jesús?
  • ¿Tuku kinkamasiyaniyan uma takgalhchuwin?

Amakgapitsi takgalhskinin

  • Kalikgalhtawakga Juan 4:5-43.

    Chuna la tlawalh Jesús, ¿la kili’akxilhatkan kristianos tiku xa’alakatanu chu tiku atanu xcolor chu tiku kgalhikgoy tumin chu tiku nikgalhikgoy tumin? (Juan 4:9; 1 Cor. 9:22; 1 Tim. 2:3, 4; Tito 2:11.)

    ¿Tuku tasikulunalin xlakata Dios makgamakglhtinan wantiku kstalanina Jesús wan? (Juan 4:14; Isa. 58:11; 2 Cor. 4:16.)

    Chuna la tlawalh puskat xalak Samaria xalakata tunkun lichuwinalh tuku xmasiyanikanit, ¿la nachuna kilimasiyatkan pi lipaxuwayaw xlakata tuku katsimaw? (Juan 4:7, 28; Mat. 6:33; Luc. 10:40-42.)