Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 96: Jesús kamapaksay tatatlanin

Takgalhtawakga 96: Jesús kamapaksay tatatlanin

AKXNI Jesús xlapulay kkachikinin, xkamapaksay tatatlanin. Anta kkachikinin nema lakatsu xwilakgolh katsikgoka pi Jesús xmapaksanama. Wa xlakata liminikgoy tiku nila tatsuwikgoy, wantiku nila lakawanankgoy, tiku nila xtlawankgoy chu lhuwa tatatlanin. Chu Jesús putum kamapaksay.

Ay titaxtunitta akgtutu kata akxni Juan munulh Jesús. Chu Jesús kawaniy x’apóstoles pi nialh makgas na’an kJerusalén chu anta namakgnikan, natitaxtuy kilhtamaku chu xla nalakastakwanan. Pero la uku chuntiya kamapaksama tatatlanin.

Jesús mapakgsama chatum puskat

Akgtum kilhtamaku xmasiyanama ksábado. Sábado, kilhtamaku akxni li Judá jaxkgoy. Chu puskat wantiku akxilhpat kdibujo akgkutsayan kata nila xta’aktsaja. Wa xlakata Jesús mapaksalh chu uma puskat ta’aktsajli. ¡Ay paksnitta!

Xlakata mapaksanalh ksábado, pulalinanin xla takanajla lisitsikgolh. Chu chatum pulalina kawani kristianos: Wi akgchaxan kilhtamaku nema tlan skujkan. ¡Wa tama akgchaxan kilhtamaku tlan natanatit xlakata tlan nakamapaksakanatit chu ni sábado!

Pero Jesús kgalhtinalh: ¡Lixkajni likatsiyatit! Komo xkgalhputilh mi burrojkan, wixin xmakgotnitit maski sábado. Wa xlakata, ¿pi nikilimapaksat xwanit uma kgoxota puskat nema ay akgkutsayan kata xtatatlay maski sábado? Chuna la kgalhtinalh Jesús, kamamaxanilh uma lakchixkuwin tiku nitlan xlikatsikgoy.

Titaxtulh hora Jesús chu x’apóstoles amakgolh kJerusalén. Akxni ay lakatsu Jericó xwilakgolh, chatiy skiwayanin tiku nila lakawanankgoy wanikgolh Jesús: Jesús, kakilamakgtayaw.

Jesús katasanilh wantiku nila xlakawanankgoy chu kakgalhskilh: ¿Tuku lakaskinatit nakkatlawaniyan? Xlakan kgalhtinankgoy, kinpuxku klakaskinaw pi kakilamalakawaniw. Jesús kaxamanilh xlakgastapukan chu, ¡lakapara lakawanankgolh! ¿Katsiya wix tuku xlakata Jesús kamapaksay kristianos? Xlakata kapaxkiy kristianos chu na lakaskin pi nakanajlanikgoy. Uma limasiyay pi akxni namapakgsinan unu kKatiyatni nialhtiku katitatatlalh.

Mateo 15:30, 31; Lucas 13:10-17; Mateo 20:29-34.



Takgalhskinin

  • ¿Tuku tlawalh Jesús akxni xlapulay kkachikinin?
  • Akxni xtitaxtunitta akgtutu kata akxni xtamununitta Jesús, ¿tuku kawanilh x’apóstoles?
  • ¿Tiku tama kristianos nema wilakgolh anta kdibujo chu la makgtayalh Jesús chatum puskat?
  • ¿Tuku wa Jesús nema tlawalh pi kalimaxanankgolh wantiku xpulalinkgoy takanajla?
  • Akxni Jesús chu x’apóstoles lakatsu kJericó xwilakgolh, ¿la kamakgtayalh skiwayanin wantiku nila xlakawanankgoy?
  • ¿Tuku xlakata Jesús tlawalh lhuwa tuku nila tamakanajlay?

Amakgapitsi takgalhskinin

  • Kalikgalhtawakga Mateo 15:30, 31.

    ¿La masiyalh Jesús xlitliwakga Jehová nema nila tamakanajlay, chu la kililakapastakatkan xlakata la nawan kxasasti kakilhtamaku nema Jehová wanit pi nalimin? (Sal. 37:29; Isa. 33:24.)

  • Kalikgalhtawakga Lucas 13:10-17.

    ¿La limasiyay uma tuku nilay tamakanajlay nema tlawalh Jesús tama sábado xlakata la nakasikulanatlaway kristianos akxni namapakgsinan xa’akgtum Mil kata? (Luc. 13:10-13; Sal. 46:9; Mat. 12:8; Col. 2:16, 17; Apo. 21:1-4.)

  • Kalikgalhtawakga Mateo 20:29-34.

    ¿La limasiyalh Jesús pi xlimaxtuy kilhtamaku xlakata nakamakgtayay kristianos chu tuku kinkamasiyaniyan uma? (Deu. 15:7; Sant. 2:15, 16; 1 Juan 3:17.)