Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 92: Jesús kamalakastakwaniy tiku xnikgonit

Takgalhtawakga 92: Jesús kamalakastakwaniy tiku xnikgonit

AKTSU tsumat nema akxilhpat unu kdibujo x’akgkutiy kata. Jesús makgachipanit chu xtse chu xtlat lakatsu wilakgolh. ¿Katsiya wix tuku xlakata lu paxuwakgoy? Ka’akxilhwi

Jesús malakastakwaniy xtumat Jairo

Xtlat uma aktsu tsumat lu lanka xlakatsukut xtukuwani Jairo. Akgtum kilhtamaku, xtsumat tatatlalh chu mamika kputama. Pero nitsinu paksa wata tlakg snunan. Jairo chu xpuskat lu lilakgaputsakgoy xlakata tasiya pi xtsumatkan naniy. Chu kaj chatum xtsumatkan kgalhikgoy. Wa xlakata Jairo putsay Jesús. Jairo kgaxmatnit xlakata Jesús tlan tlaway tuku nila tamakanajla.

Akxni Jairo chalh niku xlamacha Jesús tsamakan. Pero Jairo kalakgstipatanulh kristianos chu talakgatsokgostanilh Jesús. Tasaskinilh Jesús chu waniy: Kintsumat lu tatatla, katat, katlawa akgtum lanka litlan chu kamapaksa. Jesús waniy pi na’an.

Anta ktiji lalakgxkgatikgokan xlakata talakatsuwiniputunkgoy Jesús. Xalan Jesús tayalh chu kgalhskininalh: ¿Tiku kixamalh? Jesús makgkatsilh pi taxtunilh xlitliwakga chu liwana katsiy pi wintiku xamalh. Pero, ¿tiku xamalh? Wa chatum puskat tiku ay akgkutiy kata tatatla. ¡Milh chu xamanilh xlhakgat Jesús chu paksli!

Uma tuku tlawalh Jesús, Jairo lu tlan limakgkatsiy xlakata akxilhli pi Jesús tlan kamapaksay tatatlanin. Pero akxni tama wi tiku milh makatsini chu waniy: Nialh kamakgatsankge Jesús. Mintsumat nilha. Jesús kgaxmatli uma chu waniy Jairo: Ni kalipuwanti, xla tlan natawilapara.

Akxni chankgolh kchik Jairo lipuwamakgolh chu tasamakgolh. Pero Jesús wan: Nialh katasatit. Aktsu tsumat nitu ninit kaj lhtatama. Pero kaj likgalhkgamanankgoy chu lilitsiyankgoy xlakata katsikgoy pi aktsu tsumat ninitta.

Jesús katatanulh kgalhtutu x’apóstoles, xtlat chu xtse aktsu tsumat anta niku xma. Chipanilh xmakan chu waniy: ¡Kataki! Chu aktsu tsumat lakastakwanalh, chuna la akxilha unu kdibujo. ¡Takilh chu tsukulh tlawan! Wa xlakata xtse chu xtlat lu lipaxawakgoy.

Uma niwa xapulana tiku malakastakwanilh. Wantiku xapulana malakastakwanilh wa xkgawasa chatum puskat xalak Naín tiku nialh xkgalhiy xchixku. Chu na malakastakwanilh Lázaro, xtala María chu Marta. Akxni Jesús namapakgsinan xlakata Dios wilinit nawan xlimapakgsina, nakamalakastakwaniy lhuwa kristianos. ¿Ni lu lipaxuwayaw uma?

Lucas 8:40-56; 7:11-17; Juan 11:17-44.



Takgalhskinin

  • ¿Tiku xtlat uma aktsu tsumat nema wi kdibujo chu tuku xlakata xlilipuwamakgolh xtlat chu xtse?
  • ¿Tuku tlawalh Jairo akxni lakgchalh Jesús?
  • ¿Tuku lalh ktiji akxni Jesús x’ama kchik Jairo chu tuku minka makatsinikan Jairo?
  • Anta kxchik Jairo, ¿tuku xlakata lilitsiyankgolh Jesús?
  • Akxni Jesús katatanulh kgalhtutu x’apóstoles, xtse chu xtlat niku xma aktsu tsumat, ¿tuku tlawalh Jesús?
  • ¿Tiku kristianos nema xnikgonitta na kamalakastakwanilh Jesús chu uma tuku tlawalh tuku kinkamasiyaniyan?

Amakgapitsi takgalhskinin

  • Kalikgalhtawakga Lucas 8:40-56.

    ¿Tuku xlakata tlan nawamaw pi Jesús lakgalhamalh chu tlan likatsinilh puskat wantiku xlakgstajtama chu tuku kamasini uma lakgkgolotsin xalak kcongregación? (Luc. 8:43, 44, 47, 48; Lev. 15:25-27; Mat. 9:12, 13; Col. 3:12-14.)

  • Kalikgalhtawakga Lucas 7:11-17.

    ¿La kamatliwakglha kristianos wantiku kanininit tiku xpaxkikgoy akxni katsikgoy la makgtayalh Jesús puskat xalak Naín tiku nialh xkgalhiy xchixku? (Luc. 7:13; 2 Cor. 1:3, 4; Heb. 4:15.)

  • Kalikgalhtawakga Juan 11:17-44.

    ¿La limasiyay Jesús pi luj chuna akinin lakgtasayaw akxni niy chatum tiku lu paxkiyaw? (Juan 11:33-36, 38; 2 Sam. 18:33; 19:1-4.)