Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 89: Jesús katamakxtuy stananin ktemplo

Takgalhtawakga 89: Jesús katamakxtuy stananin ktemplo

JESÚS sitsinit chuna la tasiyay unu kdibujo, ¿nixlikana? ¿Katsiya tuku xlakata? Xlakata uma lakchixkuwin nema wilakgolh unu kxtemplo Dios kJerusalén, lu lhuwa tlajaputunkgoy tumin. Lu lhuwa kalitlajaputunkgoy tumin kristianos tiku unu minkgoy kakninanikgoy Dios.

Jesús kamakgpuspitma mesas niku wilakgo tumin

¿Akxilhpat laktsu toros, borregos chu palomas? Uma lakchixkuwin kastamakgolh unu ktemplo. ¿Katsiya wix tuku xlakata kastamakgolh? Wa xlakata li Israel maklakaskinkgoy akxni tlawanikgoy tamakamastan Dios.

Anta kxlimapakgsin Dios xwan pi akxni chatum li Israel xtlaway tuku nitlan, natlawaniy Dios akgtum tamakamastan. Li Israel na xtlawaparakgoy atanu tamakamastan. Pero, ¿niku xtiyakgolh palomas, borregos chu laktsu toros xlakata xmakamastakgolh?

Makgapitsi xkgalhikgoy palomas, borregos chu laktsu toros nema xlitlawakgoy xtamakamastankan. Pero amakgapitsi nixkgalhikgoy. Chu wi tiku lu makgat xwilakgolh ni lakatsu kJerusalén chu nila makgat xliminkgoyacha tuku namakamastakgoy ktemplo. Wa xlakata akxni xchinkgoy unu, xtamawakgoy laktsu toros, borregos o palomas. Pero uma lakchixkuwin lu taparaxla xlistanankgoy. Chu kalimakgkgalhanankgoy kristianos. Nachuna, nipara xlistanatkan unu kxtemplo Dios.

Wa xlakata Jesús lisitsilh. Kamakgpuspitli mesas niku wi tumin chu makgat malakgachalh tumin. Na tiyalh kgantum lazo chu kalitlakgaxtulh laktsu toro, borregos chu palomas. Chu kawanilh tiku kstamakgolh palomas: ¡Kakamaxtutit unu! Nialh kalitlajatit tumin xchik kintlat.

Makgapitsi kstalaninanin Jesús anta tatanumakgolh xtemplo Jerusalén. Nila makanajlakgoy akxni akxilhkgolh tuku xtlawama Jesús. Lakapastakkgolh tuku Biblia xlichuwinanit xlakata xKgawasa Dios: Pi napaxkiy xchik Dios xliputum xnaku.

Akxni anta unu wi Jesús kJerusalén xminit k’akgtum taway nema xlilakapastakkan akxni li Israel katamakxtuka k’Egipto, uma taway wanikan Pascua, lhuwa tlawalh tuku nila tamakanajla. Taxtucha kJudea chu taspitpa k’Galilea. Pero titaxtulh kxtiyat Samaria. Kakatsiw tuku lalh anta.

Juan 2:13-25; 4:3, 4.



Takgalhskinin

  • ¿Tuku xlakata kastakan laktsu toro, borregos chu palomas ktemplo?
  • ¿Tuku lisitsilh Jesús?
  • Chuna la tasiyay kdibujo, ¿tuku tlawama Jesús chu tuku kawanilh lakchixkuwin wantiku stakgoy palomas?
  • ¿Tuku lakapastakkgolh kstalaninanin Jesús akxni akxilhkgolh tuku xtlawama?
  • ¿Niku xtapakgsiy tiyat niku titaxtulh Jesús akxni taspitli k’Galilea?

Amakgapitsi takgalhskinin

  • Kalikgalhtawakga Juan 2:13-25.

    Chuna la Jesús lisitsilh xlakata kstanamaka ktemplo, ¿la kili’akxilhatkan akxni wi tiku stananputun anta kPukgalhtawakga niku tamakxtumiyaw? (Juan 2:15, 16; 1 Cor. 10:24, 31-33.)