Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 88: Juan munuy Jesús

Takgalhtawakga 88: Juan munuy Jesús

KA’AXILHTI paloma nema taktama chu lakgmima uma chixku. Uma chixku wa Jesús. La uku max puxumakaw kata kgalhiy. Chu tiku paxtuya wa Juan. Ay katsinitawa tsinu xlakata Juan. ¿Lakapastaka akxni María alh lakgapaxialhnan xparienta Elisabet chu aktsu skgata nema xwi kxpan tatsuwilh xlakata paxuwalh? Uma aktsu skgata nema ni a’xlakachin wa Juan. Pero, ¿tuku tlawamakgolh Juan chu Jesús uku?

Jesús tamunulh

Juan aku matsankgalh Jesús kxchuchut kkgalhtuchokgo wanikan Jordán. Akxni munukan chatum kristiano matsankgakan kchuchut chu alistalh makutukan. Wa uma tuku tlaway Juan, wa xlakata wanikan Juan tiku Mununan. Pero, ¿tuku xlakata Juan munulh Jesús?

Juan munulh xlakata Jesús lakgmilh chu skinilh pi kamanulh. Juan kamunuy kristianos tiku limasiyakgoy pi nitlan limakgkatsikgoy tuku nitlan tlawakgonit. Pero, ¿tlawanit Jesús tuku nitlan limakgkatsi? Ni, Jesús nikxni tlawalh tuku nitlan, xlakata wa xKgawasa Dios, nema minitancha anta k’akgapun. Wa xlakata wi tuku atanu Jesús lilakgminit Juan chu skini pi kamunulh. Ka’akxilhwi tuku xlakata.

Akxni Jesús ni a’xlakgmin Juan, xla xwakna xwanit. Chatum xwakna tlaway mesas, sillas chu laktsu putawilh. José, xchixku María, xwakna xwanit chu masiyanilh Jesús naxwaknan. Pero Dios nitu xlimalakgachanit xKgawasa kKatiyatni xlakata xwakna nawan. Dios lakaskin natlaway akgtum taskujut lu xlakaskinka chu la uku ay chanit kilhtamaku natlaway uma taskujut. Chu xlakata nalimasiyay pi minit tlaway xtalakaskin xTlat, skini Juan pi kamunulh. ¿Lipaxuway Dios uma tuku tlawalh Jesús?

Dios lipaxuway, xlakata akxni Jesús takutli kchuchut akgtum tachuwin takgaxmatcha k’akgapun chu xwan: Uma kinKgawasa wantiku kimakgapaxuway. Nachuna tasiyalh pi talakkilh akgapun chu tantum paloma taktalh anta niku wi Jesús. Pero uma nixlikana tantum paloma. Kaj tasiya pi tantum paloma. Uma wa xespíritu santo Dios.

La uku Jesús lhuwa tuku xlilakapastakat, wa xlakata an anta niku nitu anan chu anta tamakgxtakga tipuxum kilhtamaku. Akxni anta xwi, Satanás lakgan. Makgtutu xtlawaputun pi Jesús nixkgalhakgaxmatli xlimapakgsin Dios. Pero Jesús ni tlaway tuku skini Satanás.

Titaxtulh kilhtamaku Jesús taspitpa chu kalakgapasli makgapitsi lakchixkuwin tiku xapulana kstalaninanin o xtamakgalhtawakgen wankgolh. Makgapitsi xtukuwanikan: Andrés, Pedro (tiku na xwanikan Simón), Felipe, chu Natanael (nema na xwanikan Bartolomé). Jesús chu xtamakgalhtawakgen ankgolh kxtiyat Galilea. Chu tamakgxtakgkgolh kxkachikin Natanael, anta kCaná, niku xtamakgaxtokgmaka chu anta Jesús tlawalh xapulana nema nilay tamakanajlay. ¿Katsiya wix tuku tlawalh? Vino tlawalh chuchut.

Mateo 3:13-17; 4:1-11; 13:55; Marcos 6:3; Juan 1:29-51; 2:1-12.



Takgalhskinin

  • ¿Tiku chatiy lakchixkuwin nema wilakgolh kdibujo?
  • ¿La tlawakan akxni munukan chatum kristiano?
  • ¿Tiku kristianos kamunuy Juan?
  • ¿Tuku xlakata Jesús skini Juan pi kamunulh?
  • ¿La limasiyalh Dios pi lipaxuwalh xlakata Jesús tamunulh?
  • ¿Tuku lalh akxni Jesús alh tipuxum kilhtamaku anta niku nitu x’anan?
  • ¿Tuku xtukuwanikan makgapitsi xapulana kstalaninanin o xtamakgalhtawakgen Jesús chu tuku xapulana tuku nilay tamakanajlay nema tlawalh?

Amakgapitsi takgalhskinin

  • Kalikgalhtawakga Mateo 3:13-17.

    ¿Tuku likxilhtit kawilinilh Jesús xtamakgalhtawakgen xlakata tamunut? (Sal. 40:7, 8; Mat. 28:19, 20; Luc. 3:21, 22.)

  • Kalikgalhtawakga Mateo 4:1-11.

    Akxni katsiyaw la Jesús xlimaklakaskin xtachuwin Dios, ¿tuku xlakata kinkama’akgpuwantiniyan chali chali nalikgalhtawakgayaw Biblia? (Mat. 4:5-7; 2 Ped. 3:17, 18; 1 Juan 4:1.)

  • Kalikgalhtawakga Juan 1:29-51.

    Juan wantiku xMununan, ¿tiku kawanilh pi kastalanikgolh xtamakgalhtawakgen chu la akinin na tlan chuna natlawayaw? (Juan 1:29, 35, 36; 3:30; Mat. 23:10.)

  • Kalikgalhtawakga Juan 2:1-12.

    ¿La limasiyalh akxni Jesús tlawalh xapulana tuku nilay tamakanajlay, pi Jehová kamaxki Kskujnanin lhuwa tuku xatlan? (Juan 2:9, 10; Sal. 84:11; Sant. 1:17.)