Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 87: Aktsu kgawasa Jesús wi ktemplo

Takgalhtawakga 87: Aktsu kgawasa Jesús wi ktemplo

KA’AKXILHTI aktsu kgawasa tiku katachuwinama lakchixkuwin tiku linkgoya kata. Xlakan makgalhtawakgananin kxtemplo Dios anta kJerusalén. Chu uma kgawasa wa Jesús. Ay lankata. La uku kgalhiy akgkutiy kata.

Makgalhtawakgananin nila makanajlakgoy xlakata Jesús lhuwa katsi xlakata Dios chu tuku tatsokgtawilanit kBiblia. Pero, ¿tuku xlakata na ni anta unu wilakgolh José chu María? ¿Niku wilakgolh? Ka’akxilhwi.

Aktsu kgawasa Jesús katachuwinama makgalhtawakgananin

Kata kata, José kalin kJerusalén xfamilia xlakata nawayankgoy nema nalilakapastakkgoy akxni li Israel taxtukgolh k’Egipto, uma taway xwanikan Pascua. Nazaret asta Jerusalén makgat xwanit. Niti xkgalhi putlaw nipara aviones. Tama kilhtamaku ninajtu x’anankgoy putlaw nipara aviones. Atsinu ni putum kristianos kaj xtlawankgoy, chu José chu xfamilia max akgtutu kilhtamaku xtlawankgoy xlakata nachankgoy kJerusalén.

La uku José ay chalhuwa kgalhi xlakkamanan. Wa xlakata José xlikuentajtlawat xnatalan Jesús nema tlakg xalaktsina. Uma kata, José, María chu xlakkamanan katataspitmaparakgolh kNazaret. Lakpuwankgoy pi Jesús katamima amakgapitsi kristianos. Pero akxni xkgotanunita putsakgolh chu ni tekgskgolh. ¡Putsakgoy anta niku xwilakgolh xparientes chu x’amigos pero ni anta xwi! Wa xlakata taspitparakgoy kJerusalén xlakata anta naputsakgoy.

Chu anta tekgskgolh. Kakgaxmatnima makgalhtawakgananin chu katlawanima takgalhskinin. Putum kristianos nila makanajlakgoy xlakata lu skgalala. Pero María waniy: Kinkgawasa, ¿tuku xlakata chuna tlawa? Mintlat chu akit snun klilakgaputsaw chu kkaputsaman.

Jesús kgalhtinalh: ¿Tuku xlakata kimputsapatit? ¿Nixkatsiyatit pi kilitawilat anta kxchik kinTlat?

Xlikana, Jesús xlakgatiy tawila anta niku tlakg nakatsini xlakata Dios. Akinin nachuna kilitlawatkan, ¿nixlilakana? Anta kNazaret, Jesús x’an ktamakxtumit kgatunu semana niku xkakninanikan Dios. Xlakata kuenta xtlaway, katsinilh lhuwa tuku lichuwinan Biblia. Nachuna katlawaw chuna la tlawalh Jesús.

Lucas 2:41-52; Mateo 13:53-56.



Takgalhskinin

  • ¿Niku akglit kata max xkgalhiy Jesús chuna la tasiyay kdibujo chu niku wi?
  • ¿Tuku katatlaway José xfamilia kata kata?
  • Akxni ay xtlawankgonita akgtum kilhtamaku akxni xtaspitmaparakgolh kxchikkan, ¿tuku xlakata José chu María taspitparakgolh kJerusalén?
  • ¿Niku tekgskgolh Jesús José chu María chu tuku xlakata nila xmakanajlakgoy kristianos xlakata Jesús?
  • ¿Tuku wani Jesús xtse?
  • ¿La tlan natlawayaw chuna la tlawalh Jesús, akxni katsinimaw xlakata Dios?

Amakgapitsi takgalhskinin

  • Kalikgalhtawakga Lucas 2:41-52.

    Limapakgsin nema maxkika Moisés kskin pi kaj lakchixkuwin x’ankgolh kfiestas nema xtlawakan kata kata, ¿tuku lu xatlan likxilhtit kawilinikgolh xalak tlatni xala uku José chu María? (Luc. 2:41; Deu. 16:16; 31:12; Pro. 22:6.)

    ¿Tuku lu xatlan likxilhtit kamaxkilh Jesús lakgkgawasan chu laktsuman xala uku xlakata la nalakgachixkuwilikgoy xtlatkan? (Luc. 2:51; Deu. 5:16; Pro. 23:22; Col. 3:20.)

  • Kalikgalhtawakga Mateo 13:53-56.

    ¿La xkawanikan kgalhtati xnatalan Jesús nema kalichuwinankan kBiblia chu la kamaklakaskinka chatiy xnatalan anta kcongregación xla kstalaninanin Cristo? (Mat. 13:55; Hech. 12:17; 15:6, 13; 21:18; Gál. 1:19; Sant. 1:1; Jud. 1.)