Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 101: Makgnikan Jesús

Takgalhtawakga 101: Makgnikan Jesús

¡KA’AKXILHTI uma lu lanka nitlan tuku lama! Makgnimaka Jesús. Xtokgowakakanit k’akgtum kiwi. Lixtokgokanit clavos kxmakan chu kxtantun. ¿Tiku chuna xtlawaputulh uma tuku nitlan?

Nima Jesús

Xlakata makgapitsi kristianos ni akxilhputunkgoy Jesús. ¿Katsiya wix tiku umakgolh tiku ni akxilhputunkgoy Jesús? Chatum tiku na ni akxilhputun wa Satanás Diablo. Wa tlawalh pi Adán chu Eva ni xkgalhakgaxmatnikgolh Jehová. Chu wa Satanás tlawalh pi wantiku ni’akxilhputunkgoy Jesús natlawakgoy uma lanka nitlan.

Akxni nina kxtokgowakakan anta kkiwi, tiku nix’akxilhputunkgoy Jesús katuwa tuku lu snun nitlan tlawanikgolh. ¿Lakapastaka pi minkgolh k’Getsemaní chu linkgolh? ¿Tiku xwankgonit uma tiku nix’akxilhputunkgoy? Wa tiku pulalinkgoy takanajla. Ka’akxilhwi tuku lalh alistalh.

Akxni wantiku pulalinkgoy takanajla linkgolh Jesús, x’apóstoles tsalakgolh. Pekuankgolh chu xakstu makgxtakgkgolh Jesús. Pero x’apóstoles Pedro chu Juan ni makgat ankgolh. Stalanitilhakgoy xlakata nakatsikgoy tuku na’akgspulay Jesús.

Sacerdotes linikgoy Jesús tama kgolo Anás wantiku xapuxku sacerdote xwanit. Tama lhuwa kristianos nimakgapalakgolh anta. Alistalh linkgoy kxchik Caifás, wantiku uku xapuxku sacerdote. Anta wilakgolh lhuwa pulalinanin xla takanajla.

Anta kxchik Caifás makgalhapalimaka Jesús. Kaliminka makgapitsi lakchixkuwin xlakata nawankgoy tuku nixaxlikana xlakata Jesús. Putum pulalinanin wankgoy: Kamakgniw Jesús. Tsukukgolh lakachujmanikgoy Jesús chu lakgakgaximikgolh.

Akxni chuna xtlawanimakgolh Jesús, Pedro laya kkilhtin. Uma tsisni lonkgnan wa xlakata kristianos wilikgoy lhkuyat. Akxni skgomakgoka, chatum skiti akxilhli Pedro chu wan: Uma chixku na xtalapulay Jesús.

Pedro wan: Nixlikana, akit nitu akxtum xaktalapulay Jesús.

Makgtutu wanikgoy Pedro pi na xtalapulay Jesús. Pero akxni makgatunu kgalhskinkan, Pedro wan pi nixlikana. Akxni Pedro xlimakgtutu wa pi nixlikana, Jesús laka’akxilha. Pedro lu nitlan limakgkatsiy xlakata akgsaninalh, alh chu tsukulh tasay.

Tsisa viernes, akxni taxtulh Chichini, sacerdotes linkgolh Jesús anta niku tamakxtumikan, kxlakatin Sanedrín. Anta unu tsukukgolh lilakkaxlakgoy tuku natlawanikgoy. Linikgolh Poncio Pilato mapakgsina xalak tiyat xalak Judea.

Wanikgoy Pilato: Uma chixku lu lixkajni likatsiy. Kamakgniw. Pilato pulana tlawanilh takgalhskinin Jesús, chu wan: Akit ni kakxilha komo wi tuku nitlan tlawanit. Chu malininalh anta niku wi Herodes Antipas, mapakgsina tiku xalak Galilea, wantiku anta wi kJerusalén. Uma na ni’akxilha komo Jesús wi tuku nitlan tlawanit chu maspitnipa Pilato.

Pilato makgxtakgputun Jesús. Pero wantiku ni akxilhputunkgoy Jesús lakaskinkgoy pi kamakgxtakgka Barrabás chatum kgalhana tiku wi kpulachin. Chu uku ay chan tastunut akxni Pilato maxtulh Jesús anta kkilhtin. Pilato kawani kristianos: ¡Ka’akxilhtit mi mapakgsinakan! Pero xalakpuxku sacerdotes wankgoy: ¡Kamakgni, kamakgni! Chuna Barrabás maxtuka chu Jesús linka xlakata namakgnikan.

Viernes akxni nina lu axkgotanuy, Jesús xtokgowakaka kkiwi. Anta kdibujo nila akxilha, pero anta kxpaxtunin Jesús na kaxtokgowakakanit chatiy makgninanin xlakata na anta nanikgoy. Pero akxni nina axniy Jesús, chatum makgnina wan: Kakilakapastakti akxni anta wilapi nawan kmintamapakgsin. Jesús kgalhtilh: Xlikana kwaniyan akxtum nakintatawilayapi anta kxakalipaxaw Katiyatni.

¡Lu snun lilakgatit tuku wanilh!, ¿nixlikana? ¿Katsiya tukuya xakalipaxaw Katiyatni lichuwinalh Jesús? ¿Niku xwi xakalipaxaw Katiyatni nema Dios xapulana xtlawanit? Chuna, kKatiyatni. Akxni Jesús namapakgsinan k’akgapun, namalakastakwaniy uma chixku xlakata nalatamay anta kxasasti xaKalipaxaw Katiyatni. Lu lilakgatit, ¿nixlikana?

Mateo 26:57-75; 27:1-50; Lucas 22:54-71; 23:1-49; Juan 18:12-40; 19:1-30.



Takgalhskinin

  • ¿Tiku tlawalh pi kamakgnika Jesús?
  • Akxni pulalinanin xla takanajla chipakgolh Jesús, ¿tuku tlawakgolh x’apóstoles?
  • ¿Tuku lalh anta kxchik xapuxku sacerdote xtukuwani Caifás?
  • ¿Tuku xlakata Pedro alh tasay?
  • Akxni limparaka Jesús kxlakatin Pilato, ¿tuku pixlanka wankgoy xalak puxku sacerdotes?
  • ¿Tuku akgspulalh Jesús tama kilhtamaku viernes akxni ni lu ax’kakgotanuy chu tuku wanilh makglakgalhina tiku kxtokgowakakanit anta kpaxtun?
  • ¿Niku natawila tama xakalipaxaw Katiyatni nema lichuwinalh Jesús?

Amakgapitsi takgalhskinin

  • Kalikgalhtawakga Mateo 26:57-75.

    ¿La limasiyakgolh wantiku tlakg xalakpuxku tiku xlakkaxtlawakgoy ta’akglhuwit li Judá pi lu laklixkajni xlikatsikgoy? (Mat. 26:59, 67, 68.)

  • Kalikgalhtawakga Mateo 27:1-50.

    ¿Tuku likatsiyaw pi maski Judas nitlan limakgkatsilh tuku nitlan xtlawanit ni lu xaxlikana nitlan xlimakgkatsi? (Mat. 27:3, 4; Mar. 3:29; 14:21; 2 Cor. 7:10, 11.)

  • Kalikgalhtawakga Lucas 22:54-71.

    ¿Tuku kinkamasiyaniyan xlakata Pedro wa pi nixlakgapasa Jesús tama katsisni akxni makamastaka chu chipaka? (Luc. 22:60-62; Mat. 26:31-35; 1 Cor. 10:12.)

  • Kalikgalhtawakga Lucas 23:1-49.

    ¿Tuku tlawalh Jesús akxni katuwa tuku nitlan xtlawanimaka maski nitu xtlawanit chu tuku kinkamasiyaniyan uma? (Luc. 23:33, 34; Rom. 12:17-19; 1 Ped. 2:23.)

  • Kalikgalhtawakga Juan 18:12-40.

    ¿Tuku kinkamasiyaniyan pi maski Pedro milh kilhtamaku kapekuanilh lakchixkuwin, tatliwakglhli xtakanajla chu lu xatlan apóstol wa? (Juan 18:25-27; 1 Cor. 4:2; 1 Ped. 3:14, 15; 5:8, 9.)

  • Kalikgalhtawakga Juan 19:1-30.

    ¿La xakxilha Jesús xlakata wantu tamaklakaskin chu kgalhi xtapalh? (Juan 2:1, 2, 9, 10; 19:23, 24; Mat. 6:31, 32; 8:20.)

    Akxni Jesús wa xa’awatiya xtachuwin, ¿la limasiyalh pi malankilh xtamapakgsin Jehová? (Juan 16:33; 19:30; 2 Ped. 3:14; 1 Juan 5:4.)