Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 100: Jesús k’Getsemaní

Takgalhtawakga 100: Jesús k’Getsemaní

AKXNI taxtukgocha anta kxlikilhmaktiy chiki Jesús chu x’apóstoles ankgolh k’Getsemaní. Unu makglhuwata kichinkgonit. Jesús kawani pi ni nalhtatakgoy chu katlawakgolh oración chu Jesús atsinu tlakg makgat alh, tatsokgostalh chu talakatalh kkatiyatni chu tsukulh tlaway oración.

Titaxtulh hora, Jesús minpa anta niku wilakgolh x’apóstoles. ¿Tuku lakpuwana wix pi tlawamakgolh? ¡Lhtatamakgolh! Makgtutu, Jesús kawani pi ni kalhtatakgolh pero akxni makgatunu xmin xlakan klhtatamakgolh. Akxni xa’awatiya taspitli Jesús kawaniy: ¿La tlan lhtatayatit wixin, akgtum tsisni la uma? Ay chanit hora akxni nakimakamastakan kxmakankan tiku niki’akxilhputunkgoy.

Akxnitiya tama kilhtamaku takgaxmatli pi xmimakgolh lhuwa kristianos. ¡Ka’akxilhtit! ¡Mimakgolh lakchixkuwin tiku liminkgoy espadas chu kiwi! Chu liminkgoy xmakgskgotkan. Akxni lakgtalakatsuwikgolh wintiku laktaxtulh niku xminkgoy amakgapitsi chu lakgmilh Jesús. Lakatsukli chuna la’akxilhpat anta unu kdibujo. ¡Uma chixku wa Judas Iscariote! ¿Tuku xlakata lakatsuka Jesús?

Judas makamasta Jesús

Chu Jesús kgalhskilh Judas: ¿Judas kilakatsukpat xlakata kilimakamastapat? Chuna, akxni lakatsukli kalimasiyanilh tama lakchixkuwin pi wa Jesús tiku xputsamakgolh. Wa xlakata wantiku ni’akxilhputunkgoy Jesús tlakg lakgtalakatsuwikgoy xlakata nachipakgoy. Pero Pedro nix’ama mastay talakaskin kaj chuntiya nalinkan Jesús. Maxtulh xespada nema liminit chu ka’aktinilh xtakgen tama chixku tiku lakatsu xya. Pero Jesús xamanilh xtakgen chu tunkun mapaksalh.

Jesús waniy Pedro: Kamaki mi espada. ¿Ni lakpuwana wix pi tlan nakskiniy kinTlat akglhuwa mil ángeles xlakata nakimakgtayakgoy? ¡Tlan kskinilh! Pero Jesús niskini Dios ángeles, xlakata katsiy pi ay chanit kilhtamaku akxni wantiku ni’akxilhputunkgoy nalinkgoy. Chu xla mastalh talakaskin chuna natlawakgoy. Ka’akxilhwi tuku akgspulalh Jesús alistalh.

Mateo 26:36-56; Lucas 22:39-53; Juan 18:1-12.



Takgalhskinin

  • ¿Niku ankgolh Jesús chu x’apóstoles akxni taxtukgocha kxakilhmaktiy chiki chu Jesús tuku kawani katlawakgolh?
  • ¿Tuku xtlawamakgolh x’apóstoles Jesús akxni taspitli chu niku makglit chuna ka’akgspulalh?
  • Chuna la tasiyay kdibujo, ¿tiku na chankgolh k’Getsemaní chu tuku tlawalh Judas Iscariote?
  • ¿Tuku xlakata Judas lakatsukli Jesús chu tuku tlawalh Pedro?
  • ¿Tuku wanilh Jesús Pedro chu tuku xlakata ni skinilh Dios namakamin maski kaj chatum ángel namakgtayay?

Amakgapitsi takgalhskinin

  • Kalikgalhtawakga Mateo 26:36-56.

    Chuna la Jesús kastakyawalh kstalaninanin, ¿tuku xlakata uma akgtum xatlan li’akxilhtit xlakata nachuna natlawakgoy lakgkgolotsin xalak congregación? (Mat. 20:25-28; 26:40, 41; Gál. 5:17; Efe. 4:29, 31, 32.)

    ¿La akxilha Jesús wantiku maklakaskin likan xlakata nalitlawaniy tuku nitlan achatum kristiano? (Mat. 26:52; Luc. 6:27, 28; Juan 18:36.)

  • Kalikgalhtawakga Lucas 22:39-53.

    Akxni chatum ángel tasiyanilh Jesús anta k’Getsemaní xlakata namatliwakglha, ¿xwamputun pi Jesús kxlajwanama xtakanajla? Kawanti (Luc. 22:41-43; Isa. 49:8; Mat. 4:10, 11; Heb. 5:7).

  • Kalikgalhtawakga Juan 18:1-12.

    ¿La kamakgtayalh Jesús x’apóstoles xlakata nitu nakatlawaniy tiku ni xka’akxilhputunkgoy chu la akinin nachuna kilitlawatkan? (Juan 10:11, 12; 18:1, 6-9; Heb. 13:6; Sant. 2:25.)