Mateo 1:1-25

  • Xkilhtsukut Jesucristo (1-17)

  • Lakachilh Jesús (18-25)

1  Uma libro lichuwinan xlatamat Jesucristo,* xkgawasa David, xkgawasa Abrahán.   Xkgawasa Abrahán xwanikan Isaac;xkgawasa Isaac xwanikan Jacob;xkgawasa Jacob xwanikan Judá chu xnatalan;   xlakgkgawasan Judá xkawanikan Pérez chu Zérah, chu Tamar xtsekan* xwanit;xkgawasa Pérez xwanikan Hezrón;xkgawasa Hezrón xwanikan Ram;   xkgawasa Ram xwanikan Aminadab;xkgawasa Aminadab xwanikan Nahsón;xkgawasa Nahsón xwanikan Salmón;   xkgawasa Salmón xwanikan Boaz, chu wa Rahab xtse;xkgawasa Boaz xwanikan Obed, chu wa Rut xtse;xkgawasa Obed xwanikan Jesé;   xkgawasa Jesé xwanikan David tiku mapakgsina litaxtulh;xkgawasa David xwanikan Salomón, xtse Salomón wa tiku xpuskat Urías xwanit;   xkgawasa Salomón xwanikan Rehoboam;xkgawasa Rehoboam xwanikan Abías;xkgawasa Abías xwanikan Asá;   xkgawasa Asá xwanikan Jehosafat;xkgawasa Jehosafat xwanikan Jehoram;xkgawasa Jehoram xwanikan Uzías;   xkgawasa Uzías xwanikan Jotán;xkgawasa Jotán xwanikan Acaz;xkgawasa Acaz xwanikan Ezequías;  10  xkgawasa Ezequías xwanikan Manasés;xkgawasa Manasés xwanikan Amón;xkgawasa Amón xwanikan Josías;  11  xkgawasa Josías xwanikan Jeconías chu xnatalan, kkilhtamaku akxni kachilinkgoka kBabilonia.  12  Akxni xkachilinkgokanita kBabilonia, Jeconías kgalhilh chatum xkgawasa tiku xwanikan Sealtiel;xkgawasa Sealtiel xwanikan Zorobabel; 13  xkgawasa Zorobabel xwanikan Abiud;xkgawasa Abiud xwanikan Eliaquim;xkgawasa Eliaquim xwanikan Azor; 14  xkgawasa Azor xwanikan Sadoc;xkgawasa Sadoc xwanikan Aquim;xkgawasa Aquim xwanikan Eliud; 15  xkgawasa Eliud xwanikan Eleazar;xkgawasa Eleazar xwanikan Mattán;xkgawasa Mattán xwanikan Jacob; 16  xkgawasa Jacob xwanikan José, tiku xchixku María xwanit, chu María xtse Jesús xwanit, tiku wanikan Cristo. 17  Putum tiku tilatamakgolh, lata Abrahán asta David, kilhmakkutati* familias; lata David asta akxni kachilinkgoka kBabilonia, kilhmakkutati familias; lata akxni kachilinkgoka kBabilonia asta akxni chilh Cristo, kilhmakkutati familias. 18  Pero wa uma tuku lalh xlakata xlakachilh Jesucristo. Kilhtamaku akxni kskinkanita María xlakata natatamakgaxtokga José, kitaxtulh pi xʼama kgalhi skgata xlakata xlitliwakga espíritu santo,* akxni nina xtamakgaxtokgkgo. 19  Pero José, xchixku María, xaʼakgstitum xlikatsi chu ni xmamaxaniputun kxlakatin amakgapitsin, xlakpuwama kaj xatsekg nalakxtlawa xtamakgaxtokgat. 20  Pero akxni xlilakpuwanita xlakata uma, ¡kaʼakxilhti!, xʼángel Jehová* titasiyanilh José kxtamanixnat chu wanilh: «José, xkgawasa David, ni kapekuanti xlakata nalipina María mimpuskat kminchik, xlakata wa xlitliwakga espíritu santo tlawalh pi nakgalhi skgata. 21  Namalakachini chatum aktsu kgawasa, chu wix nalimapakuwiya Jesús,* xlakata xla nalakgmaxtu xkachikin kxtalakgalhinkan». 22  Putum uma chuna lalh xlakata nakgantaxtu tuku Jehová timalakpuwanilh nalichuwinan xpalakachuwina, akxni wa: 23  «¡Kaʼakxilhti! Tsumat nakgalhi skgata chu namalakachini chatum aktsu kgawasa, chu nalimapakuwikan Emmanuel», nema akxni matitaxtikan kʼatanu tachuwin, wamputun: «Kinkatawilan Dios». 24  Alistalh José lakastakwanalh kxtalhtata chu tlawalh la xʼángel Jehová xlimapakgsinit, chu lilh xpuskat* kxchik. 25  Pero ni tatalakgxtumilh xpuskat* asta akxni lakachilh aktsu kgawasa, chu limapakuwilh Jesús.

Notas

O: «Mesías; xaTalaksakni».
Alakatanu wankan «xnanakan».
Alakatanu wankan «pulakkutati».
O: «xlimakgatliwakga Dios».
Uma xlipulana niku tasiya xtukuwani Dios kversículos xla uma Biblia. Anta kTatsokgni xaGriego 241 min tukuwani, Jehová.
Uma tukuwani kxahebreo Jesúa o Josué, wamputun: «Jehová Lakgtaxtut».
Alakatanu wankan «xchat».
Alakatanu wankan «xchat».