Hechos 8:1-40

  • Saulo putsastalani congregación (1-3)

  • Anta kSamaria lhuwa kanajlakgolh tuku xlichuwinan Felipe (4-13)

  • Pedro chu Juan kamalakgachaka kSamaria (14-17)

  • Simón tamawaputulh espíritu santo (18-25)

  • Eunuco xalak Etiopía (26-40)

8  Saulo matlanilh xlakata makgnika Esteban. Ama kilhtamaku lhuwa tsukuka putsastalanikan congregación nema xwi kJerusalén; chu putum tamakgalhtawakgen kamakgawanika kxtiyat Judea chu Samaria, kajwatiya apóstoles tamakgxtakgkgolh kJerusalén.  Pero lakchixkuwin tiku xpekuanikgo Dios linkgolh Esteban xlakata namaknukgo, chu lhuwa lakgtasakgolh.  Pero Saulo tsukulh katlawani lhuwa tuku nitlan tiku xalak congregación. Xafuerza xkatamakxtu kʼakgatunu chiki, xkaxwataxtu lakchixkuwin chu lakpuskatin chu xkalin kpulachin.  Pero tiku xkamaʼakgawanikanit xlichuwinantilhakgo xtachuwin Dios anta niku xʼankgo.  Ama kilhtamaku, Felipe milh kkachikin Samaria chu tsukulh kalitachuwinan xpalakata Cristo.  Lhuwa latamanin lu kuentajxtlawakgo tuku Felipe xwan. Xkgaxmatkgo tuku xwan chu xʼakxilhkgo milagro tuku xla xtlawa.  Lhuwa tiku xkalaktanuma xalaklixkajni espíritus, chu pixlanka* xkatasakgo akxni xtaxtukgo. Nachuna kamapaksaka tiku nila xtlawankgo chu tiku luntu xwankgonit.  Wa xlakata analh lhuwa tapaxuwan kʼama lanka kachikin.  Ama kilhtamaku klanka kachikin xlama chatum chixku tiku xwanikan Simón, xapulana lhuwa tuku xtlawa xlakata xmakgtayakgo demonios chu kaks xkamalakawani latamanin xalak Samaria, chu xwan pi xla lu xlakaskinka xlitaxtu. 10  Putum tiku nitu xlitaxtukgo chu asta tiku xlakaskinka xlitaxtukgo, kuentajxtlawanikgo chu xwankgo: «Lanka xlitliwakga Dios kgalhi uma chixku». 11  Wa xlakata kuentajxtlawanikgo xlakata makgasata kaks xkamalakawaninit tuku xtlawa xlakata xmakgtayakgo demonios. 12  Pero akxni kanajlanikgolh Felipe, tiku xlichuwinama xatlan tamakatsinin xla xTamapakgsin Dios chu xtukuwani Jesucristo, putum lakchixkuwin asta lakpuskatin xtamunumakgolh. 13  Simón na kanajlalh chu akxni xtamununita antiya tatamakgxtakgli Felipe; chu lu kaks xlilakawan akxni xʼakxilha milagros chu laklanka tuku xtatlawa. 14  Akxni apóstoles tiku xwilakgolh kJerusalén kgaxmatkgolh pi tiku xalak Samaria xmakgamakglhtinankgonit xtachuwin Dios, kamalakgachanikgolh Pedro chu Juan; 15  chu xlakan ankgolh chu tlawakgolh oraciones xlakata xmakglhtinankgolh espíritu santo. 16  Xlakata nitiku xkalakgchinit espíritu santo, kajwatiya xkamunukanit kxtukuwani Malana Jesús. 17  Wa xlakata kaʼakwilikgolh xmakankan chu xlakan makglhtinankgolh espíritu santo. 18  Ama kilhtamaku, akxni Simón akxilhli pi kamaxkika espíritu santo akxni apóstoles kaʼakwilikgolh xmakankan, kamalaknunilh tumin, 19  kawanilh: «Na kakimaxkitit uma litliwakga, xlakata putum tiku akit nakakwili kimakan namakglhtinan espíritu santo». 20  Pero Pedro wanilh: «Mimplata katalakgsputti, xlakata lakpuwanti pi tumin tlan nalimakglhtinana tuku kaj xachunata masta Dios. 21  Wix nitu lakgchanan xlakata uma, xlakata ni xaʼakgstitum minaku kxlakatin Dios. 22  Wa xlakata, kalakgpali uma tuku nitlan xtlawaputuna, chu katasaskini kʼoración Jehová, pi komo tlan, natapatikana xalixkajni mintalakapastakni tuku wi kminaku; 23  xlakata kakxilha pi litsamaya talakgsitsin chu putum kilhtamaku tlawaputuna tuku nitlan». 24  Simón kakgalhtilh: «Lu katasaskinitit Jehová kimpalakata xlakata ni nakilakgchin putum tuku wantit». 25  Wa xlakata akxni xlichuwinankgonita xtachuwin Jehová chu lakgatum xlichuwinankgonit xatlan tamakatsinin klaktsu kachikin xla Samaria, xlakan taspitparakgolh kJerusalén. 26  Pero xʼángel Jehová tachuwinalh Felipe chu wanilh: «Katakaxti chu kapit ksur, ktiji nema takta kJerusalén asta kʼGaza». (Uma wa tiji kxakaskakni tiyat). 27  Wa xlakata, xla takaxli chu alh chu ¡kaʼakxilhti!, chatum eunuco* xalak Etiopía, chixku tiku xkgalhi limapakgsin chu xlakskujnani mapakgsina puskat Candace xalak Etiopía, chu xla xlakgayawakanit putum tuku lhuwa xtapalh nema xkgalhi. Uma chixku xʼanit kJerusalén xlakata nakakninani Dios, 28  chu xla xtaspitma, chu xwi kxputlaw chu pixlanka xlikgalhtawakgama xtatsokgni palakachuwina Isaías. 29  Wa xlakata espíritu santo wanilh Felipe: «Kapit chu katalakatsuwini uma putlaw». 30  Felipe kgosnalh* kxpaxtun putlaw chu kgaxmatnilh pixlanka xlikgalhtawakgama xtatsokgni palakachuwina Isaías chu wanilh: «¿Xlikana akgatekgsa* tuku likgalhtawakgapat?». 31  Xla wanilh: «¿Pero la* tlan nakʼakgatekgsa* komo niti nakimasiyani?». Wa xlakata wanilh Felipe pi xtawakalh kputlaw chu akxtum xtatawi. 32  Ama kilhtamaku wa xlikgalhtawakgama pulaktum Tatsokgni niku wan: «La* borrego linka niku makgnika; chu la aktsu borrego nema nitu wan akxni makgsitmaka, nachuna xla nitu wan. 33  Akxni xmamaxanimaka, ni tlawanika tuku xaʼakgstitum. Xlakata xlatamat nalakgsputa kkatiyatni, ¿tiku nalichuwinan xlakata xkilhtsukut?». 34  Eunuco alistalh wanilh Felipe: «Katlawa litlan, kakiwani: ¿Tiku lichuwinama uma palakachuwina? ¿Wa xʼakstu lichuwinamaka, o lichuwinama atanu chixku?». 35  Felipe tsukulh chuwinan, chu limatsukinilh uma tatsokgni, litachuwinalh xatlan tamakatsinin xpalakata Jesús. 36  Alistalh, akxni xʼamakgolh ktiji, chankgolh niku xʼanan lhuwa chuchut, chu eunuco wa: «¡Kaʼakxilhti! Unu wi chuchut; ¿tuku tlawa pi nila naktamunu?». 37  *—— 38  Wa xlakata limapakgsinalh pi xmachokgoka putlaw, chu Felipe chu eunuco akxtum ankgolh kchuchut, chu Felipe munulh. 39  Akxni takutkgolh kchuchut xʼespíritu Jehová tunkun malakgachalh Felipe alakatanu, chu eunuco nialh akxilhli Felipe, pero lu xatapaxuwan alh kxtiji. 40  Pero Felipe tatakgscha kʼAsdod, chu titaxtulh kkachikinin chu xlichuwinantilha xatlan tamakatsinin kputum kachikinin asta chalh kCesarea.

Notas

Alakatanu wankan «akglhman».
Kaʼakxilhti glosario.
Alakatanu wankan «tsalanalh».
Alakatanu wankan «makgachakgxiya».
Alakatanu wankan «chi».
Alakatanu wankan «nakmakgachakgxi».
Alakatanu wankan «Chi».
Kaʼakxilhti nota xla Mateo 17:​21.