Hechos 3:1-26

  • Pedro mapaksalh tiku kskiwayan chu nila xtlawan (1-10)

  • Akgchuwinan Pedro niku kxpaxtunin yakgolh talayaw xla Salomón (11-26)

    • «Natalakkaxwilipara putum tuku anan» (21)

    • Chatum palakachuwina chuna la Moisés (22)

3  Ama kilhtamaku, Pedro chu Juan xʼamakgolh ktemplo xlakata xchanita hora natlawakan oración, max kamakgtutu hora kakgotanun,*  chu xlimaka chatum chixku tiku nila xtlawan lata lakachilh. Chali chali anta xwilikan lakatsu kxmalakcha templo nema xwanikan xaStlan Malakcha, xlakata tlan xkaskinilh tumin tiku xtanukgo ktemplo.  Akxni ama chixku kalakglakachalh Pedro chu Juan pi xʼamakgolh tanukgo ktemplo, tsukulh kaskini tumin.  Pero Pedro chu Juan kaks lakaʼakxilhkgolh; alistalh Pedro wanilh: «Kakilaʼakxilhwi».  Wa xlakata xla kaks kaʼakxilhli, xlakata xkgalhkgalhima wi tuku xmaxkika.  Pero Pedro wa: «Plata chu oro ni kkgalhi, pero tuku kkgalhi wa tuku kmaxkiyan. ¡Kxtukuwani Jesucristo xalak Nazaret, katlawanti!».  Akxni chuna wa, makgachipalh kxpakgastakat* chu yawalh. Tunkun tatliwakglhli xtupixni chu xtantunin;  chu lakapala tayalh chu tsukulh tlawan chu katatanulh ktemplo, xtlawama chu xlinkxma chu xmalankitilha Dios.  Chu putum latamanin akxilhkgolh pi xtlawama chu xmalankima Dios. 10  Chu tsukukgolh lakgapaskgo pi wa uma chixku tiku anta xtawila kxaStlan xMalakcha templo xlakata xmaxkika tumin, chu lu kaks xlakawankgonit chu nila xkanajlakgo tuku xakgspulanit. 11  Chu akxni uma chixku xkamakgachipanitku Pedro chu Juan, putum latamanin lu kaks xlakawankgonit chu tokgosun* kalakgankgolh kxtankilhtin niku kxpaxtunin yakgolh talayaw xla Salomón. 12  Akxni Pedro akxilhli uma, kawanilh latamanin: «Lakchixkuwin xalak Israel, ¿tuku xlakata lu kaks lilakawanatit uma? Chu ¿tuku xlakata kaks kilaʼakxilhaw chu lakpuwampatit pi akinin ktlawaw pi xtlawalh uma chixku xlakata kilitliwakgakan o xlakata kskujnaniyaw Dios? 13  Wa xDios Abrahán, xla Isaac chu xla Jacob, xDioskan xalakgmakgan kinatlatnikan,* malankilh kSkujni, Jesús, tiku wixin lakgmakgantit chu makamaxkitit Pilato, maski xla xlakpuwanit namakgxtakga. 14  Chuna, wixin lakgmakgantit ama tiku xasanto chu xaʼakgstitum, chu wa skintit pi xkamaxkikantit chatum chixku tiku makgnina xwanit, 15  chu makgnitit Tiku laksakkanit namasta latamat. Pero Dios malakastakwanilh kkalinin, chu akinin kakxilhwi uma. 16  Chu xpalakata xtukuwani chu xlakata kkanajlaniyaw xtukuwani, tatliwakglhli uma chixku tiku wixin akxilhatit chu lakgapasatit. Takanajla nema kkgalhiniyaw, tlawanit pi kmilakatinkan, uma chixku napaksa xliputuminika. 17  Chu la uku, natalan,* kkatsi pi chuna tlawatit kaj xlakata ni xkatsiyatit, chuna la tlawakgolh mimapakgsinaninkan. 18  Pero Dios chuna putum makgantaxtilh tuku alipulana xlichuwinankgonit putum xpalakachuwinanin nema xla xkamakatsininit, pi xCristo xʼama patinan. 19  »Wa xlakata, kamakgxtakgtit mintalakgalhinkan chu kataspittit xlakata nakaxapanikanatit mintalakgalhinkan, xlakata namin kilhtamaku akxni Jehová nakamaxkiyan takaksni 20  chu namalakgachayacha Cristo tiku laksakkanit mimpalakatakan, wa Jesús. 21  Talakaskin pi xla natamakgxtakga kʼakgapun asta akxni nachan kilhtamaku natalakkaxwilipara putum tuku anan, tuku Dios makatsininalh nema lichuwinankgolh xasantos xpalakachuwinanin xalamakgasa. 22  Asta Moisés wa: “Jehová miDioskan nalaksaka mimpalakatakan chatum palakachuwina chuna la akit kxlakgstipankan minatalankan. Xlilat nakgaxpatatit putum tuku xla nakawaniyan. 23  Xlikana, putum tiku ni nakgaxmatni uma Palakachuwina, xliputuminika namalakgsputukan kxlakgstipan kachikin”. 24  Chu putum palakachuwinanin, lata Samuel chu tiku palakachuwinanin litaxtukgolh alistalh, xliputum tuku makatsininankgolh na liwana lichuwinankgolh umakgolh kilhtamaku. 25  Wixin xkamanan palakachuwinanin chu talakkaxlan nema Dios katatlawalh xalakgmakgan minatlatnikan, akxni wanilh Abrahán: “Chu kaj xlakata minkamanan,* natasikulunatlawakgo putum familias xalak katiyatni”. 26  Dios, akxni xmalakastakwaninita kSkujni, pulana wixin kamalakgachanin xlakata nakasikulunatlawayan chu nakamapanuniyan minchatunukan ni xatlan mintatlawkan».

Notas

Xagriego: «max xliʼakgnajatsa hora».
Alakatanu wankan «kxpakgkana».
Alakatanu wankan «tatsalh».
Alakatanu wankan «kinatatanikan o kinatikunan».
Alakatanu wankan «natakamanan».
Xagriego: «mintalhtsi».