Hechos 28:1-31

  • Chankgo kMalta (1-6)

  • Mapaksakan xtlat Publio (7-10)

  • Ankgo kRoma (11-16)

  • Pablo katachuwinan judíos xalak Roma (17-29)

  • Pablo ni kilhpekuan akxni lichuwinan Dios akgtiy kata (30, 31)

28  Akxni xaktakutnitawa, kkatsiw pi ama isla xwanikan Malta.  Chu latamanin xalak ama isla* lu tlan kinkalikatsinikgon.* Mapasikgolh lhkuyat chu kimputumkan xatapaxuwan kinkamakgamakglhtinankgon xlakata xmima sen chu xlonkgnama.  Pero akxni Pablo pachu sakli xʼakgan kiwi chu mapulh, taxtulh tantum luwa xlakata kachichi xwanit chu makaxkalh.  Akxni latamanin xalak ama isla akxilhkgolh luwa pi xkgalhnuwaka kxmakan Pablo, tsukukgolh lawani: «Uma chixku max makgnina, chu maski lakgtaxtunilh pupunu, xaʼAkgstitum* ni maxkinit talakaskin chuntiya nalatama».  Pero Pablo tinkxʼaktilh luwa klhkuyat, chu maski xkalh nitu lanilh.  Pero xlakan xkgalhkgalhimakgolh pi xkulh o xalan xanin xtamacha. Pero akxni makgas xkgalhkgalhikgonita chu akxilhkgolh pi nitu lanilh, lakgpalikgolh xtapuwankan chu tsukukgolh lawanikgo pi chatum dios xwanit.  Chu anta klakatsunin xwilakgolh tiyat nema xtapakgsini mapakgsina xalak ama isla tiku xwanikan Publio; chu xla tlan kinkamakgamakglhtinan chu tlawalh pi anta xaktamakgxtakgwi akgtutu kilhtamaku.  Ama kilhtamaku, xtlat* Publio xma kxputama xlakata xtatatla, xkgalhi lhkuyat chu xkgalhnistima,* chu Pablo tanulh niku xma, tlawalh oración, chu akwililh xmakan, chu mapaksalh.  Akxni chuna lalh, amakgapitsin xalak ama isla tiku xtatatlakgo na tsukukgolh lakgminkgo Pablo chu xla kamapaksalh. 10  Chu xlakan limasiyakgolh pi xkinkapaxtikatsinikgoyan akxni kinkamaxkikgon lhuwa tamaskiwin,* chu akxni xakkamawa, kinkamaxkikgon putum tuku xakmaklakaskinaw chu mawakakgolh kbarco. 11  Akxni akgtutu papaʼ xaktamakgxtakgnitawa kʼisla, ktajuw kbarco nema kxkinkamun xtalhpittawilanit xlakapunkan xlakgkgawasan Zeus. Uma barco xalak Alejandría xwanit chu anta tamakgxtakgli kʼisla asta akxni titaxtulh lonkgni. 12  Anta ktitachokgow kSiracusa, kaj akgtutu kilhtamaku ktamakgxtakgwi; 13  chu akxni ktaxtuchaw anta, kchaw kRegio. Lichali tsukulh min un xalak sur, chu xliʼakgtiy kilhtamaku kchaw kPuteoli. 14  Unu kkatekgswi natalan, chu kinkawanikgon pi anta xakkatatamakgxtakgwi akgtujun kilhtamaku, chu alistalh kaw kRoma. 15  Akxni natalan xalak Roma kgaxmatkgolh pi anta xakamaw, minkgolh kinkapaxtokgkgoyan kPlaza niku Stanankan wanikan Apio chu Tres Tabernas.* Akxni Pablo lakgamakgat kaʼakxilhli paxtikatsinilh Dios, chu uma matliwakglhli. 16  Akxni kchaw kRoma, kaj chatum soldado tiku xkuentajtlawama tatamakgxtakgli kchiki niku Pablo rentarlinalh. 17  Pero xlituxama, Pablo kamatasaninalh xpulalinanin judíos. Akxni xtastokgkgonita, kawanilh: «Lakchixkuwin, natalan, maski akit ni ktlawaninit tuku nitlan kachikin, chu nitu klakatsalama xtalismaninkan xalakgmakgan kinatlatnikan, anta kJerusalén kinchipakancha chu kimakamastaka kxmakankan romanos. 18  Chu akxni xkinkgalhskinkgonita, xkimakgxtakgputunkgo xlakata ni xʼanan tuku xpalakata nakimakgnikan. 19  Pero judíos nitlan akxilhkgolh uma, wa xlakata kskilh pi wa César xkilakputsananilh pero ni xlakata nakliyawa tuku nitlan kinkachikin. 20  Xpalakata tuku Israel kgalhkgalhinit kilichikanit umakgolh cadenas, chu wa xlakata kkamatasaninan xlakata nakkatachuwinanan». 21  Xlakan kgalhtikgolh: «Nitu malakgachakanitancha tatsokgni kJudea, nipara chatum tala tiku minkgonitancha anta, nitu makatsininankgonit chu nitu lichuwinankgonit tuku nitlan mimpalakata. 22  Pero kkgaxmatputunaw pi wix nakilawaniyaw tuku lakpuwana, xlakata liwana kkatsiyaw pi uma xasasti takanajla, kaniwa nitlan lichuwinankan». 23  Alistalh lakkaxwilikgolh akgtum kilhtamaku xlakata natatamakxtumikgo, chu tlakg lhuwa tiku lakgminkgolh anta niku xtamakgxtakgma. Lata tsisa asta kakgotanun* kamaʼakgatekgsnilh uma chu liwana xkalitachuwinan xTamapakgsin Dios, limaklakaskilh tuku xwan xLimapakgsin Moisés chu tuku tsokgwilikgolh Palakachuwinanin xlakata xkanajlanikgolh Jesús. 24  Makgapitsi xkanajlanikgo tuku xla xkilhwama; amakgapitsin ni xkanajlanikgo. 25  Xlakata nialh akxtum tuku xlakpuwankgo tsukukgolh ankgo, chu Pablo kajwatiya uma tuku xkawani: «Lu xlikana tuku espíritu santo malakpuwanilh palakachuwina Isaías pi nakawani xalakgmakgan minatlatnikan, 26  chu wa: “Kapit kʼuma kachikin chu kawanti: «Xlikana pi nakgaxpatatit, pero ni katiʼakgatekgstit,* chu xlikana nalakawananatit, pero nitu katiʼakxilhtit. 27  Xlakata xnakujkan umakgolh latamanin xatsakat wanit, chu xtakgenkan* ni likgaxmatputunkgo, chu talakgatsikgonit xlakata nikxni naʼakxilhkgo, akgatapakgonit xlakata ni nakgaxmatkgo, chu ni naliʼakgatekgskgo xnakujkan tuku kilhchanima uma, chu nakilakgtaspitkgo chu akit nakkamapaksa»”. 28  Wa xlakata, liwana kakatsitit pi uma talakgmaxtut nema masta Dios kamalakgachanikanit tiku ni judíos; xlakata xlakan nakgaxmatkgo». 29  *—— 30  Chu Pablo anta tamakgxtakgli akgtiy kata kxchik niku xrentarli, chu xatapaxuwan xkamakgamakglhtinan putum tiku xlakgminkgo, 31  xkalitachuwinan xTamapakgsin Dios, chu ni xkilhpekuan akxni xkamasiyani xpalakata Malana Jesucristo chu niti xmachokgo.

Notas

Latamanin tiku ni xchuwinankgo griego.
O: «kinkalimasiyanikgon talakgalhaman nema kgalhikgo latamanin».
Xagriego, Díke, uma tachuwin max kilhchanima diosa tiku tlawa pi katatlawalh tuku xaʼakgstitum.
Alakatanu wankan «xtata o xtiku».
Alakatanu wankan «xkgalhnitantima».
Alakatanu wankan «tatain o talakgalhaman».
Niku tlan xwayankan chu tlan xjaxkan.
Alakatanu wankan «smalankgan».
Alakatanu wankan «katimakgachakgxitit».
Alakatanu wankan «xʼakgaxkgolhkan».
Kaʼakxilhti nota xla Mateo 17:​21.