Hechos 18:1-28

  • Pablo lichuwinan Dios kCorinto (1-17)

  • Taspitpara kʼAntioquía xla Siria (18-22)

  • Pablo an kʼGalacia chu kFrigia (23)

  • Chatum tiku lu tlan xmaʼakgatekgsninan la xchuwinan xwanikan Apolos makgtayaka (24-28)

18  Alistalh, xla taxtucha kʼAtenas chu chilh kCorinto.  Chu tatanokglhli chatum judío tiku xwanikan Áquila, xla anta xlakachinit kPonto chu nina makgas xtaminitancha xpuskat* kʼItalia, xla xwanikan Priscila, xlakata Claudio xlimapakgsinanit pi putum judíos xtaxtukgocha kRoma. Wa xlakata kalakgalh,  chu xlakata na watiya tuku xliskuja, anta tamakgxtakgli kxchikkan chu akxtum xkataskuja, xlakata xlakan xtlawakgo laktsu chiki.*  Akgatunu Sábado xmasta akgtum taʼakgchuwin* ksinagoga* chu xkamakanajli judíos chu griegos.  Chu akxni Silas chu Timoteo minkgocha kMacedonia, Pablo limaxtulh putum xkilhtamaku xlakata nalichuwinan xtachuwin Dios, xkatachuwinan judíos xlakata nakalimasiyani pi Jesús wa Cristo.  Pero xlakan chuntiya talalakatakikgolh chu lixkajni wanikgolh, wa xlakata xla laktinkxli klhakgat chu kawanilh: «Minkuentajkan nawan komo ni nalakgtaxtuyatit. Akit ni ktililh kuenta. Lata uku nakan lichuwinan Dios kʼatanu kachikinin».  Wa xlakata, taxtucha anta* chu tanulh kxchik chatum chixku tiku xkakninani Dios xwanikan Ticio Justo, nema xchik xtakilhpastuka sinagoga.  Pero Crispo, xpulalina sinagoga, chu putum tiku xalak xchik kanajlanikgolh Malana. Chu lhuwa xalak Corinto tiku kgaxmatkgolh kanajlakgolh chu tamunukgolh.  Nachuna, katsisni Malana wanilh Pablo kʼakgtum tamalakawanin: «Ni kapekuanti, wata chuntiya kachuwinanti chu ni katakgalhtsekgti, 10  xlakata akit ktawilan chu niti katichipan xlakata natlawaniyan tuku nitlan; xlakata lhuwa latamanin kistalanimakgolh kʼuma kachikin». 11  Wa xlakata anta tamakgxtakgli akgtum kata chu akgchaxan papaʼ, xkamasiyanima xtachuwin Dios. 12  Akxni Galión gobernador* xwanit kʼAcaya, judíos akxtum lakkaxlakgolh natlawanikgo tuku nitlan Pablo chu linkgolh anta niku lakkaxtlawakan taʼakglhuwit, 13  xwankgo: «Uma chixku kamakanajlimakgolh latamanin nakakninanikgo Dios pero nichuna la wan limapakgsin». 14  Pero akxni Pablo xʼamaja chuwinan, Galión kawanilh judíos: «Komo xlikana xwa pi tuku tlawakanit ni xaʼakgstitum o lakatsalakanit limapakgsin, akit xaklimaxtulh kilhtamaku xlakata nakkakgaxmatniyan. 15  Pero komo wa litaʼakglhuwipatit tachuwin chu xlakata tukuwani chu xlakata milimapakgsinkan, wixin kalakkaxtlawatit. Akit ni klakputsananiputun uma». 16  Akxni wankgolh uma, katamakxtulh niku lakkaxtlawakan taʼakglhuwit. 17  Wa xlakata limakatum chipakgolh Sóstenes xpulalina sinagoga chu tsukukgolh kgaxikgo kxlakatin niku lakkaxtlawakan taʼakglhuwit. Pero Galión nipara tsinu xmakgtanu. 18  Pero akxni Pablo akglhuwata kilhtamaku xkatatamakgxtakgnit, kawanilh natalan pi xʼamaja chu tajulh kbarco xlakata naʼan kSiria, akxtum xkataʼan Priscila chu Áquila. Anta kCencreas tlawalh pi tutsu xʼakgsitka xlakata wi tuku xmalaknunit. 19  Akxni chankgolh kʼÉfeso, anta kamakgxtakgli Priscila chu Áquila; pero xla tanulh ksinagoga xlakata nakamakgtaya judíos naʼakgatekgskgo* Tatsokgni. 20  Maski chuntiya lu kskinimakgolh pi tlakg makgas xkatatamakgxtakgli, xla ni lakaskilh, 21  wata kawanilh pi xʼamaja chu na kawanilh: «Nakkalakgtaspitparayan komo Jehová lakaskin». Chu kʼÉfeso tajucha kbarco 22  chu taktalh kCesarea. Talakakxtulh* chu tilakgapaxialhnalh congregación chu alistalh chalh asta kʼAntioquía. 23  Akxni anta xtamakgxtakgnit makgapitsi kilhtamaku, takaxli chu katilakgapaxialhnalh akgatunu kachikinin kpaís xla Galacia chu Frigia, xkamatliwakglhtilha putum tamakgalhtawakgen. 24  Ama kilhtamaku, chatum judío tiku xlakachinit kʼAlejandría chu xwanikan Apolos, chalh kʼÉfeso; xla lu tlan xmaʼakgatekgsninan chuna la xchuwinan chu liwana xlakgapasa Tatsokgni. 25  Uma chixku xmasiyanikanit* xtiji Jehová, chu xlitsama tapaxuwan kaj xlakata espíritu santo, xlichuwinama chu lu aktanks xmasiyama xpalakata Jesús, pero kajwatiya xlakgapasa tamunut nema lichuwinalh Juan. 26  Ni xatakilhpekua tsukulh chuwinan ksinagoga, chu akxni kgaxmatnikgolh Priscila chu Áquila, linkgolh chu tlakg aktanks maʼakgatekgsnikgolh xtiji Dios. 27  Nachuna, xlakata xchamputun kʼAcaya, natalan katsokgnanikgolh tamakgalhtawakgen, kaskinikgolh pi xatapaxuwan xmakgamakglhtinankgolh. Wa xlakata akxni xla chalh, lu kamakgtayalh ama tiku xkanajlakgonit xpalakata xtalakgalhaman Dios nema ni anan xtachuna;* 28  xlakata ni xpekuan akxni liwana xmasiya kxlakatin latamanin pi xtamasiykan judíos nitlan xwankgonit, chu xkalimasiyani Tatsokgni pi Jesús wa Cristo.

Notas

Alakatanu wankan «xchat».
Uma max xlitlawakanit xmakgchixit animal.
O: «xkamakgtaya naʼakgatekgskgo».
Kaʼakxilhti glosario.
Uma kilhchanima, sinagoga.
Tukuwani romano wa procónsul. Kaʼakxilhti glosario.
Alakatanu wankan «natamakgachakgxi».
Tasiya pi anta kJerusalén.
O: «xliʼakgastakyawakanit».
O: «talakgalhaman nema ni kinkalakgchanan». Kaʼakxilhti glosario.