Ja aʼtel wa xkʼulantikoni wa xbʼobʼ kʼulaxuk soka takʼin wa xyawe sok spetsanil skʼujole ja taʼumantiʼik bʼa Jyoba. Ja bʼa jtsomjeltikoni mi wa xkʼanxi takʼin, chomajkil mi wa xkʼanji oj jtuptikon ja diesmo (Mateo 10:7, 8). Ta aykʼa maʼ wa skʼana oj ya takʼin sok spetsanil skʼujol, oj bʼobʼ xchʼik bʼa junuk ja yal kajaʼik wa xtax ja bʼa naʼits wa xtsomo jbʼajtikoni. Mini wa x-alxi ja sbʼiʼil ja maʼ wa xyaʼa.

Ayni chʼikan jastik junuk bʼa jachuk mi jel wa xchʼakatikon takʼin. Ja bʼajtani, mey kiʼojtikon olomalik bʼa wa xtupjiye. Chomajkil, ja taʼumantiʼik bʼa Jyoba mi wala tupjitikon yuja wa xcholotikon ekʼ bʼa naʼits naʼitsi soka lugarik bʼa wa xtsomo jbʼajtikoni naka yal sensiyoʼik.

Ja takʼin wa xjekxi ja bʼa naʼitsik Betel yiʼoje ja taʼumantiʼik bʼa Jyoba wa xmakuni bʼa skoltajel ja matik wan ekʼel sbʼaje desgrasyaʼi, jastal terremoto, niwan bʼutʼ jaʼ sok tuk jastal jaw. Chomajkil bʼa skoltajel ja misioneroʼiki soka biajanteʼiki, yajel kʼeʼuk naʼitsik bʼa tsomjelal ja bʼa paisik mi jel stakʼineʼi, skʼuljel imprimir sok sjekjel Bibliaʼik sok juʼunik elel bʼa Biblia.

Jujune ja ixuk winiki yeʼn oj spensaraʼuke ja janekʼ oj yaʼe ta wa skʼana oj xchʼik-e ja bʼa kaja bʼa gastoʼik bʼa kongregasyon, ma ja bʼa kaja bʼa aʼtel bʼa xcholjeli. Spetsanil ja ixawi wa x-axi kʼeʼuk jun sjuʼunil bʼa jujune ja kongregasyoniki sbʼaja janekʼ wa xchʼakxi ja takʼini bʼa oj bʼobʼ skʼel-e ja bʼa kongregasyon ta ay maʼ wa skʼana.