Ja skʼuʼajel kiʼojtikon kechantani ti elel ja bʼa jas mero wa xyala ja Biblia. Ja yujil, yajni mas wa x-och kabʼtikon stojolili, wa xtukbʼestikon ja jas wa xkʼuʼantikoni. *

Ja yaljelik b’a Proverbios 4:18 wa skoltayotik yabʼjel stojolil jas yuj ja jel tʼilan stukbʼesel: «Ja sbʼej ja matik toj ayi jachʼ jastal ja ijlabʼ ja bʼa saʼan sakbʼeli, takal takal wa xkʼe chiknajuk mas man wa sakbʼiʼel ja kʼakʼu». Wa xkʼan kaltik, jastalni ja ijlabʼ ja bʼa saʼan sakbʼeli takal takal wa x-och kiltik kʼinal, ja Dyosi wan yajelyi chiknajuk takal takal ja smeranil ja yaʼtijumiki ja bʼa mero styempoʼili (1 Pedro 1:10-12). Sok ja Biblia yalunejni yeʼn ja Dyos oj ya kʼiʼuk ja snajel ja bʼa «stikʼanil ja tyempo» (Daniel 12:4).

Mini tuk oj kabʼtik ma oj chamjkʼujoltik yuja wa xtukbʼesxi ja jastik it. Ja yaʼtijumik Dyos bʼa tyempo najate ajyi yujile pensarik bʼa mi stojoliluk sok yilawe stʼilanil bʼa stukbʼesel ja jastal wa spensaraneʼi.

  • Ja Moisés skʼana oj yaʼ el libre ja israʼelenyo 40 jabʼil bʼajtan yuja bʼa tyempo yaʼunej kulan ja Dyosi (Hechos 7:23-25, 30, 35).

  • Ja jekabʼanumiki mini yabʼye stojolil ja jas alubʼal sbʼaja xchamelal soka sakʼwelal ja Mesiasi (Isaías 53:8-12; Mateo 16:21-23).

  • Jujuntik ja bʼajtan snochuman ja Kristo mini yabʼye stojolil sbʼaja yajni xjul ja skʼakʼujil ja Jyoba (2 Tesalonicenses 2:1, 2).

Soka tyempo, ja Dyosi stojo ja jastal wa spensaran ja yaʼtijumik bʼa tyempo najateʼi. Sok mi xkaʼatikonkan skʼanjel bʼa junxta oj skʼuluk soka keʼntikoni (Santiago 1:5).

^ par. 2 Mini b’a jleʼunejuktikon modo snakʼjel ja jas wa xtukbʼi. Jaʼukto maʼ, wa xkatikon och juʼun sok wa xkatikon chiknajuk bʼa oj snaʼ ja tuki. Jun sjejel, kaʼax sok tsʼijbʼan «Aclaración de creencias» ja bʼa índice bʼa juʼuntikon bʼa Internet.