Bʼa agosto bʼa 2013, ja Taʼumantiʼik bʼa Filipinas xchʼak stojbʼese jun naʼits bʼa tsomjelal jel chaʼanyabʼalil. ¿Jas yuj jel chaʼanyabʼalil? Yujni tsʼikwi ja mil naʼitsik kʼulubʼali stsʼakatal yuja jastal xchapuneje bʼa skʼulajeli. Ja kongregasyonik ja bʼa chonabʼ jaw, sok bʼa tuk, mini ayiʼoje ja jas wa xmakuni sok ja matik oj koltanukeʼi bʼa oj yawe kʼeʼuk naʼitsik bʼa tixa oj stsom sbʼaje. Sok ayni jujuntik kongregasyonik bʼa Filipinas bʼa skʼulane ja stsomjeleʼi bʼa snaj smoj-aljelik sok bʼa yal naʼitsik kʼulubʼal sok bambú.

Ja Tsome Tojwanum bʼa Taʼumantiʼik bʼa Jyoba yawe kujlajuk ja bʼa jabʼil 1999 jun programa bʼa yajel kʼeʼuk naʼitsik bʼa tsomjelal yuja wa nesesida bʼa wa xkʼanxi mas. Pes bʼa jitsan chonabʼik, jastal Filipinas, wanxta pojxel ja Taʼumantiʼiki. Ja programaʼik it jani bʼa skoltajel ja kongregasyonik ja bʼa chonabʼik mi jel xlajxiyujile soka takini. Ja kongregasyoniki wani xkoltaniye soka janekʼ wa xbʼobʼyujileʼi bʼa yajel kʼeʼuk Naʼitsik bʼa Tsomjelal, sok jaxa soka takʼin mi xlajxiyujile ti wa xjak bʼa tuk Taʼumantiʼik bʼa tuktukil chonabʼ soka skontribusyon wa xyaʼaweʼi. Chomajkil, ay kʼoleʼik aʼtijumik bʼa wanxa snaʼawe bʼa jachuk oj stoje sok oj koltanuke ja bʼa yajel kʼeʼuk ja Naʼitsik bʼa Tsomjelal. Ja bʼa Filipinas, ja tikʼe aʼtelik it kʼe bʼa Noviembre bʼa 2001.

Ja lluminado jun Taʼumantiʼ bʼa kongregasyon bʼa Marilao (bʼa slujmil ja Bulacan), bʼa kʼulaxi sok tsʼikwi ja mil Naʼitsik bʼa Tsomjelal. Ja yen yala: «Meran lek wa xkila ja keʼntiki juni meran tsome jmoj-aljel jbʼajtik. Jakye jitsan jmoj-aljeltik bʼa koltanel; ajyiye jitsan ixuk, winik, keremtik akʼixuk sok matik ayxa skʼujole. Aʼtjitikon lajan soka syajal ja kʼaʼuji sok jelni kabʼtikon kʼaʼuj. Pe anima jel yajtik kantikon yuja aʼteli, jelni gusto ajyitikon soka janekʼ lajxikujtikon skʼulajeli».

Ja jastal kongana aʼtiye ja Taʼumantiʼiki mi kechanta chamyilawe ja Taʼumantiʼik ja bʼa lugar jaw. Jun winik sbʼajin jun volteo bʼa wa xwaj yakan grava ja bʼa wane aʼteli yala: «Ja weʼnlexi lajansok jun yal nole xanichex. Ja petsanilex wanex aʼtel, mini bʼa jun lugar kilunej ja jastal it».

Chʼakta kʼeʼuk ja Naʼits bʼa Tsomjelal

Man kʼe ja aʼtel bʼa yajel kʼeʼuk sok man chʼaki mini ekʼ wake semana. Stsʼakatal yuja mi yiʼaj jitsan tyempo ja aʼteli, ja Taʼumantiʼik bʼa Marilao bʼobʼyujile ja xcholjel ja lekil rason sbʼaja sGobyerno ja Dyos, ja aʼtel mas tʼilan yuja tuki (Mateo 24:14).

Ja Ellen, jun Taʼumantiʼ ja bʼa lugar jaw, wa xcholo: «Ja poko naʼits bʼa tsomjeli mi la ochkotikon kibʼanaltikon, sok jitsan ixuk winik ti wa xkanye kulan bʼa jwera. Pe ja yajkʼachili jelni tsamal sok jelni lek ajyel. Ja wego jpetsaniltikon masni wa xkatikon el slekilal ja jas wa xjexi ja bʼa tsomjelaliki».