Kaʼax ja bʼa sbʼaʼal

Kaʼax ja bʼa xchabʼil menú

Taʼumantiʼik bʼa Jyoba

tojol-abʼal

Ja Nigeria kʼetayuj 3,000 Naʼitsik bʼa Tsomjelal

Ja Nigeria kʼetayuj 3,000 Naʼitsik bʼa Tsomjelal

Ja sábado 1 bʼa marzo bʼa 2014, 823 ixuk winik gustoxta stsomo sbʼaje bʼa jun Naʼits bʼa Niwan Tsomjelal bʼa taʼumantiʼik bʼa Jyoba ja bʼa chonabʼ Benín (Nigeria) bʼa ay jas yawe julskʼujole. Masan yajni chapxi bʼa oj ajuk kʼeʼuk Naʼitsik bʼa Tsomjelal ja bʼa paisik mey lek stakʼine bʼa 1999, yaweta kʼeʼuk 3,000 lugarik bʼa tsomjelal ja bʼa país jaw.

Ja ajyi

Ja bʼa tsomjelal jaw xcholowe sbʼaja yibʼanal ja aʼtel kʼulaxel ja bʼa Nigeria man jabʼilikjan bʼa 1920 bʼa jachuk ja kongregasyoniki oj ajyuk yujile lugarik bʼa stoyjel ja Jyoba. Ja bʼajtanto tini wa stsomo sbʼaje bʼa naʼitsik jach majan sok lugarik jach tupubʼal. Jastalni ochelkan juʼun, ja bʼajtan lugar yawe makunuk kechanta bʼa skʼulajel tsomjelal jani ja naʼits aji kʼeʼuk ja bʼa chonabʼ Ilesha bʼa 1935. Ja bʼa jabʼil 1938 man 1990, jelni pojxi ja kongregasyoniki, pes kechan 14 ajyi sok kʼot ajyuk 2,681. Jitsan bʼa yeʼnle jelni wokol stajel jun lugar bʼa stsomjel sbʼaje. Bʼa jujuntik Naʼits bʼa Tsomjelal wa stsomo sbʼaje wake kongregasyon bʼa tuktukil ora. Bʼa tuk lugarik, ayni mi xchʼak ochuke ja bʼa yal naʼitsi, ja yuj ayni jujuntik ti wa xkanye tekʼan jwera sok ti wa x-ajyiye bʼa stsʼeʼel bentana bʼa oj bʼobʼ smaklaye. Tuk kongregasyonik ti wa stsomo sbʼaje bʼa majan naʼitsik ma bʼa eskwelaʼik.

Ja wego

Bʼa 1990, ja naʼits Betel bʼa taʼumantiʼik bʼa Jyoba kʼe yayi majan ja kongregasyonik takʼin nolubʼal bʼa yajel kʼeʼuk Naʼitsik bʼa Tsomjelal. Jaxa bʼa 1997, ja Kʼoleʼik matik wa skʼelawe bʼa yajel kʼeʼuk Naʼitsik bʼa Tsomjelal skoltunejexa 105 kongregasyonik bʼa skʼulajel naʼitsik ma stojbʼesel ja bʼa mi lekuk ayi. Bʼa 1997 man bʼa 1999, aji kʼeʼuk 13 Naʼitsik bʼa Tsomjelal. Sok ayni kechanta wa xyiʼaj stojbʼesel junuk 7 sok 15 kʼakʼu.

Anima jel wego xkʼulaxi ja naʼitsiki, pe aytoni skʼana mas yuja jel wan pojxel ja taʼumantiʼik bʼa Jyoba ja bʼa Nigeria. Ja bʼa abril bʼa 1998, ja Betel yala aytoni skʼana yajel kʼeʼuk 1,114 naʼitsik bʼa yibʼanal ja país jaw.

Ja bʼa tsomjelal jaw kʼulaxi bʼa chonabʼ Benín, ja Don Trost, june ja bʼa Olomal bʼa Betel bʼa Nigeria, yala: «¡Kʼotelni jun aʼtel jel niwan juntiro! Sok jpensaraʼantikon: ‹¿Jastal oj lajxukujtik?›». Ja sjobʼjel it axiyi sjakʼjel bʼa 1999, yajni ja Kʼoleʼik ixuk winik bʼa yajel kʼeʼuk Naʼitsik bʼa Tsomjelal bʼa ayni kʼole ayiʼoj wake ma waxake ixuk winik kʼe skoltaye ja kongregasyonik ja bʼa país jaw. Yuja jastal wa x-aji kʼeʼuk ja naʼitsiki mi jel wokoluk, wa xyawe kʼeʼuk junuk 17 ja bʼa ixawi ja bʼa tsaʼanxtajan 14 jabʼili.

Tsaʼan yajni yala yabʼ ja matik tsomani jel lek aʼtijele, ja Don Trost yala jeltoni jitsan ja wa skʼana oj axuk kʼeʼuki. Ja bʼa 2013, mas ja 8,000 ixuk winik ochye Taʼumantiʼik ja bʼa Nigeria. Ja Don Trost cha yala: «Bʼa oj ajyuk yujile bʼa oj stsom sbʼaje ja bʼa tyempo jakumi, tʼilani oj axuk kʼeʼuk 100 Naʼitsik bʼa Tsomjelal jabʼil jabʼil». Ja bʼa jabʼil 2013, kʼot staʼ ja 351,000 Taʼumantiʼik ja bʼa Nigeria, sok ayni mas ja 5,700 kongregasyon.