Kaʼax ja bʼa sbʼaʼal

Kaʼax ja bʼa xchabʼil menú

Taʼumantiʼik bʼa Jyoba

tojol-abʼal

Ja Armada wa stsomo ja matik jel sgusto oj ajyuke libre

Ja Armada wa stsomo ja matik jel sgusto oj ajyuke libre

Ja bʼa 6 man 16 bʼa junio bʼa 2013, jitsan ixuk winik bʼa yibʼanal ja luʼumi kʼotye ja bʼa slugar wa xkʼot barkoʼik bʼa Ruán, wa xkan bʼa norte bʼa Francia, bʼa oj yil-e june ja bʼa tsomjelalik bʼa barko jel chaʼanyabʼalil wa xkʼulaxi: ja Armada (jitsan barkoʼik bʼa kʼakʼanel wa stsomo sbʼaj).

Yajni kʼeye ja bʼa barko sok wajumexa 120 kilometro ja bʼa yok jaʼ Sena, wa x-ekʼ bʼa stsʼeʼel ja lugar Normandía. Ja barkoʼik mas niwanik sok tsamalik ja bʼa luʼumi, yajni kʼotye ja bʼa lugar oj kʼulaxuk ja kʼini (7 kilometro sniwanil ja lugari) sjipawe koʼ bʼa yojol jaʼ ja niwakik takʼin slokulabʼil ja barko bʼa oj kʼotuke tekʼan. Bʼa junuk lajune kʼakʼu, ja ulatanumiki bʼobʼ kʼeʼuke bʼa jujuntik ja 45 barkoʼik mas jel naʼubʼal sbʼaj kʼotye ja bʼa kʼin jaw.

¿Pe jasa payjiye ja ixuk winik bʼa oj wajuke? Jastalni yala ja ma xchapa sok ya kujlajuk ja kʼin jaw, yiljel mojan ja niwan barkoʼik bʼa kʼakʼanel ay jas wa x-aji julskʼujole ja ixuk winiki. Sok bʼa jitsan ixuk winik, keremtik man matik ayxa skʼujole, wa x-aji spensaraʼuke bʼa najtil lugarik ja bʼa luʼumi sok bʼa ajyel libre.

Jitsan ulatanumik cha kʼot yabʼye ja tikʼe libreʼil wa xya ajyukotik snebʼjel ja smeranil bʼa Biblia (Juan 8:31, 32). Yajni yulataye ja lugar Ruán sok ekʼye ja bʼa yal skayeʼil bʼutʼel ixuk winiki, yilawe ja juʼunik yaʼuneje bʼa yal karrito ja taʼumantiʼik bʼa Jyoba ja bʼa ekʼele jaw. Yajni ja ulatanumiki ma ja matik wa x-aʼtijiye bʼa barko wa xwaj skʼel-e ja juʼuniki, wa x-alji yabʼye ayiʼe jach kʼebʼubʼal chikan jas juʼun elel bʼa Biblia. Jitsan jel lek yilawe ja La Atalaya el bʼa junio bʼa 2013 bʼa wa xyala sbʼaja jas tyempo oj chʼakuk ja ilkʼujolaneli. Chomajkil, lokjiye spetsanil awaj smaklaye jun loʼil elel bʼa Biblia oj ekʼ bʼa francés, inglés ma bʼa español.

Jujuntik ixuk winik yaʼawe tsʼakatal ja jasa skʼulane ja taʼumantiʼik bʼa Jyoba. Jun winik, yajni yila jujuntik Taʼumantiʼik tekʼane ekʼ ja bʼa kaye soka yal karrito bʼa wa xyaʼawe juʼuniki, yala: «¡Jel xyaki gusto wa xkilawex ja ili! Mi junukxta skʼuʼajel kiʼojtik, pe jelni cham xkila spetsanil ja matik toj aye soka skʼuʼajel yiʼojeʼi, jastalni ja weʼnlexi». Chabʼ winik awele xa yalawe yabʼ ja chawane Taʼumantiʼik ja it: «Jelni gusto oj bʼobʼ ajyanik soka aʼtel wanex skʼulajeli».