Kaʼax ja bʼa sbʼaʼal

Kaʼax ja bʼa xchabʼil menú

Taʼumantiʼik bʼa Jyoba

tojol-abʼal

Ja Tsome Tojwanum wa stsatsankʼujolane ja taʼumantiʼik bʼa Rusia soka Ucrania

Ja Tsome Tojwanum wa stsatsankʼujolane ja taʼumantiʼik bʼa Rusia soka Ucrania

«¡Wa xkabʼtikon jelxelxa ja yajtanel wa sjeʼawekitikoni!» Jach yala jun ixuk sbʼa Ucrania yajni chʼak yabʼ skʼumajel jun karta bʼa Tsome Tojwanum bʼa taʼumantiʼik bʼa Jyoba. Ja Stephen Lett, june je bʼa Tsome Tojwanumi, skʼuman ja karta it yajni yulatay ja Ucrania ja bʼa xchʼakulabʼil ja semana bʼa 10 sok 11 bʼa mayo 2014. Junuk 165,000 Taʼumantiʼik yabʼye ja jas yala.

Ja skʼumajel ja karta soka tuktukil loʼilik bʼa Biblia sutxi bʼa joʼe kʼumal sok aji ekʼuk bʼa junuk 700 Naʼits bʼa Tsomjelal bʼa yibʼanal ja chonabʼ Ucrania.

Ja junxta xchʼakulabʼil semana jaw, ja Mark Sanderson, cha june ja bʼa Tsome Tojwanumi, skʼuman ja junxta karta jaw bʼa jun tsomjelal bʼa Rusia. Ja programa sutxi bʼa 14 kʼumalik sok 180,413 Taʼumantiʼik bʼa mas ja 2,500 kongregasyonik bʼa Rusia sok Bielorrusia smaklaye ja tsomjelal.

Ja karta bʼa Tsome Tojwanumi jani wa xkʼot sbʼaj yibʼanal ja kongregasyonik bʼa Rusia soka Ucrania. Ja jmoj-aljeltik Sanderson skʼuman ja karta bʼa kʼumal ruso, soka Naʼits Betel yiʼoje ja Taʼumantiʼik bʼa Rusia stsʼijbʼane: «Ja kongregasyonik ja bʼa najatik lugar il, jelto ni tsamal yilawe jastal ja Tsome Tojwanumi wa xkiswaniye. Kabʼtikon lajansok stelawotikon tsats lek».

Ja xchol ja karta jani yajel kulan skʼujole sok stsatsankʼujolajel ja Taʼumantiʼik bʼa lugar jaw, pes yujni ja lugarik jaw jel ajyel kʼakʼanel sok tiroʼanel bʼa politika. Sloko ja Taʼumantiʼiki aʼajyuke toj sok snochjel ja rasonik bʼa Biblia bʼa mok xchʼik sbʼaje ja bʼa politika bʼa luʼumkʼinal it (Juan 17:16).

Soka jas wan ekʼeli, ja Tsome Tojwanum ya julskʼujol ja smoj-aljeliki ja stʼilanil bʼa yajel orasyon bʼa ajyel kʼubʼan soka Jyoba, ja spaklajel ja Yabʼali soka spensarajel sbʼaja it. Chomajkil, sloko bʼa a-sjip yentoril ja skʼujole sbʼaja jas skʼapunej ja Dyos bʼa anima chikan jas mi lekuk xjak sbʼaje mini oj bʼobʼ ya koʼuke luʼum (Isaías 54:17).

Ja bʼa xchʼakulabʼil ja karta wa xyala: «Jel xkʼanawextikon juntiro apetsanilex. Tolabida teyex bʼa jpensartikon sok tolabida wa xkʼanatikonyi ja Jyoba bʼa orasyon yuja weʼnlexi».

Sbʼaja it, ja Naʼits Betel bʼa Ucrania yala: «Ja jmoj-aljeltiki jelto ni tsamal yabʼye ja janekʼto yajtanel soka jastal sjeʼawe ja smodo ja Tsome Tojwanumi. Yuja jmoj-aljeltik Sanderson sok Lett yulatay ja Rusia soka Ucrania ja bʼa junxta xchʼakulabʼil semana ya chiknajuk ja jastal tsamal tsoman ay ja xchonabʼil ja Dyos sok sjeʼa ja jmoj-aljeltik ja janekʼto wa skʼanawe ja Jyoba soka Jesús. Jpetsaniltikon wa xpensaraʼantikon ja ulatanel it mero styempoʼil leka. Ja wego ayxa kiptikoni bʼa jastal kuchelkujtikon chikan jas wokol xjak jbʼajtikon ja bʼa yaʼteltajel ja Jyoba».