Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Ja Juʼun Cholumani  |  Julio bʼa 2015

¿Wan maʼ xa naʼa ajyi?

¿Wan maʼ xa naʼa ajyi?

¿Jastal ja molinoʼik ayiʼoje bʼa snaje ja bʼa tyempo najate?

Ja naʼitsik bʼa tyempo najate ayni yiʼoje chaʼ bʼa skʼulajel harina. Ja sjuchʼjel jastik junuki jani ja aʼtel wa skʼulan kʼakʼu kʼakʼu ja ixuke ma ja mosoʼik bʼa naʼitsi. Ja srwidoʼil ja yajni wane juchʼulaneli kʼotel jun senya ja bʼa jastik wa skʼulane kʼakʼu kʼakʼu (Éxodo 11:5; Jeremías 25:10).

Taʼubʼal dibujoʼik sok kʼulubʼal tonik ja bʼa poko Egipto bʼa wa sjeʼa jastal wa x-aʼtijiye soka tikʼe chaʼ it. Ayiʼoj jun lechan ton bʼa yokʼantik sok jun skʼabʼ bʼa sjuchʼjel. Ja aʼtijumi wa xkoʼ mekʼan sok wa syama xchabʼil skʼabʼ ja skʼabʼ chaʼi. Tixa wa xyaʼa yip bʼa wa xya nokinajuk bʼa sjuchʼjel ja sbʼakʼ jastik junuki. Jastalni wa xyala jun juʼun, ja skʼabʼ chaʼi ayiʼoj junuk chabʼe ma chane kilo ja yalali. Ta aykʼa maʼ makʼjisok ja kʼabʼ chaʼi, oj bʼobʼ chamuk (Jueces 9:50-54).

Ja chaʼi jelni tʼilan ja bʼa sakʼanile ja pamilyaʼiki. Ja yuj, ja Biblia wa xyala: «Mokni maʼ yikan jun molino bʼa kʼabʼal ma ja skʼabʼ molino jastal jun senya bʼa oj tupxuk ja jas wa xmajxi, pes yujni ja senya jaw jach jastal yijelkan ja jasa mas tʼilan wa xmakuni ja bʼa sakʼanil jun ixuk winik» (Deuteronomio 24:6).

¿Jas wa xkʼan yal ja Jesukristo tey bʼa sniʼ skʼujol ja Tatali?

Ja Biblia wa xyala ja Jesukristo «ti ni ay ja ba stzʼeel [bʼa sniʼ skʼujol] ja Tatal Diosi» (Juan 1:18). Ja it jaʼ wa staʼa tiʼal ja jastal jel kʼubʼan xyila sbʼaje ja Jesús soka sTati. Tini eleljan ja bʼa poko kostumbre yiʼoje bʼa koʼel tsʼelan yajni wa xwaʼye.

Ja bʼa skʼakʼu ja Jesús, ja judíoʼiki wa xkoye tsʼelan yajni oj waʼukeʼi bʼa sjoyanal jun kusan mesa. Spetsanil ja waʼumiki wa xkoye tsʼelan ja bʼa mesa sok wa xyawekan xijan jwera ja yokeʼi, wa xyawe yipuk ja xujkʼubʼe ja bʼa surdaʼil skʼabʼeʼi bʼa jun sen olomal. Bʼa jachuk, ja stojol skʼabʼeʼi mi jas wa xmakjisok. Jun juʼun wa xcholo: «Yajni wa xkoye tsʼelan jachuki, ja yolom jun winik wa xkan mojan bʼa sniʼ skʼujol ja smoj tey bʼa surdaʼi». Ja yujil, wa x-alxi jun ixuk winik tey bʼa «stzʼeel» ma bʼa sniʼ skʼujol ja smoji.

Ajyel tsʼelan bʼa stiʼ sat ja olomal bʼa pamilya ma ja lokwanum bʼa jun kʼini jelni chaʼanyabʼalil. Ja yuj, ja tsaʼanxta cena bʼa Jesús soka snebʼumaniki, ja maʼ ti ajyi tsʼelan bʼa sniʼ skʼujoli jani ja jekabʼanum Juan, ja ‹maʼ jel yaj wa xyabʼ› ja Jesús. Ja Biblia wa xyala ja Juan och tsʼelan «ba mero stzʼeel» ma bʼa sniʼ skʼujol bʼa oj yayi jun sjobʼjel (Juan 13:23-25; 21:20).