Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Ja Juʼun Cholumani (bʼa spaklajel)  |  Septiembre bʼa 2016

«Sakʼan ay ja yabʼal ja dyosi».

Sjobʼjelik yiʼoj ja matik wa skʼumani

Sjobʼjelik yiʼoj ja matik wa skʼumani

¿Jasa wa xkʼan yal ja Hebreos 4:12 yajni wa xyala «sakʼan ay ja yabʼal ja dyosi [sok] ay yip»?

Ja jas mas staʼa tiʼal ja Pablo wa xkoltani yabʼjel stojol bʼa jani kʼotel ja jas wa skʼana oj skʼuluk ja Dyos, jastalni wa xtax ja bʼa Biblia.

Ja bʼa juʼuntiki, tikʼan wa xkatik makunuk ja Hebreos 4:12 bʼa sjejel ja Biblia ayni yiʼoj ipal bʼa stukbʼesel ja jsakʼaniltiki. Soka xcholjel jaw stojolni aya. Pe cha jelni lek oj kabʼtik stojol jasa wan stajel tiʼal ja Pablo yajni stsʼijbʼan ja bersikulo it. Ja yeʼn wan stsatsankʼujolajel ja nebʼumanik bʼa kʼumal hebreo bʼa oj koltanuke ja bʼa jas wa skʼana oj skʼuluk ja Dyosi. Jitsan ja bʼa jastik oj skʼuluk ja Dyosi tini wa xcholo bʼa yabʼal. Ja bʼa ekʼele it, ja Pablo yala ja jastal ja Dyos ya eluk libre ja israʼelenyo ja bʼa Egipto. Ja yeʼnle ajyiyujile ja smajlajel bʼa oj ochuke bʼa jun luʼum jel xyaʼa chabʼ sok lech, bʼa jani kʼapubʼalyile yuja Dyosi. Ja tiw ojni yabʼye stsamalil ja meran jijleli (Éxodo 3:8; Deuteronomio 12:9, 10).

Jani jaw ja jasa wa skʼana ja Dyosi. Pe ja israʼelenyo mini sjeʼawe skʼuʼajel bʼa Jyoba sok mini ajyiye kʼuʼabʼal, ja yuj tʼusan mi spetsaniluke mi ochye ja bʼa sjijlel ja Dyosi (Números 14:30; Josué 14:6-10). Ama jachuk, ja Pablo yala «ay to bi modo jastal oj bob ajyucotic laman», wa xkʼan yal, ayto jun skʼapjelal bʼa ochel ja bʼa sjijlel ja Dyosi (Hebreos 3:16-19; 4:1). Ja skʼapjelal jaw tini chʼikan ja bʼa jas yaʼunej chijkajuk ja Dyos sbʼaja jas wa skʼana. Jastalni ja nebʼumanik bʼa kʼumal hebreo, ja keʼntiki wani xcha xbʼobʼ jkʼumuktik sbʼaja jas wa skʼana oj skʼuluk ja Dyosi sok koltanel. Bʼa yajel chiknajuk ja skʼapjel it ti wa xtax bʼa Yabʼal Dyos, ja Pablo ya makunuk xetʼanik bʼa Génesis 2:2 sok Salmo 95:11.

Wani xyakitik gusto snajel ja skʼapjelal bʼa ochel ja bʼa sjijlel ja Dyosi mitoni chʼayeluk. Wani xjipa jkʼujoltik bʼa ojto bʼobʼ ochkotik, jastalni wa xyala ja Biblia. Ja yuj jel xkʼujolantik bʼa ochel. ¿Jastal? Mini xleʼatik modo snochjel ja ley bʼa Moisés ma skʼulajel jastik bʼa lek kechan bʼa lek ayilotik ja Dyosi. Jani wa xkʼujolantik koltanel gusto lek ja bʼa jas wa skʼana oj skʼuluk ja Dyosi sok mini xkaʼatikan skʼulajel yuja wa xkʼuʼantik bʼa yeʼn. Jitsan kʼeta spaklaye ja Biblia sok snebʼjel sbʼaja jas yaʼunej chiknajuk ja Dyos sbʼaja jas wa skʼana. Ja it jel koltubʼale bʼa stukbʼesel ja tikʼe sakʼanil yiʼoje, bʼa ajyelyujile skʼuʼajel sok yijel jaʼ. Yibʼanal ja it wa sjeʼa «sakʼan ay ja yabʼal ja dyosi [sok] ay yip». Ja jas yaʼunej chijkajuk ja Dyos ja bʼa Biblia sbʼaja jas wa skʼana skʼulajeli stukbʼusnej ja jsakʼaniltiki sok mini oj kʼot tikʼan ja yipi.