Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Ja Juʼun Cholumani (bʼa spaklajel)  |  Agosto bʼa 2016

Sjobʼjelik yiʼoj ja matik wa skʼumani

Sjobʼjelik yiʼoj ja matik wa skʼumani

¿Jas yuj ja skontraʼik ja Jesús jel yaweyi stʼilanil ja sakʼjel skʼabʼe?

Jani june ja bʼa jitsan jastik junuk kʼenajiye ja Jesús soka snebʼumanik yuja skontraʼiki. Ja ley bʼa Moisés wa xcholo jujuntik jasunuk bʼa wa xya kuxbʼuk jun ixuk winik ja bʼa stoyjel ja Dyos. Jujuntik ja bʼa jasunuk it jani yajni wa xyila ja xchamel jun ixuk, ja lepra ma ja syamjel ja skwerpo jun chante ma ixuk winik bʼa chamelxa. ¿Jasa oj skʼuluk june bʼa kʼotel yajkʼachil ekʼele sak? Ja Ley wa xcholo oj bʼobʼ yaweyi jun majtanal ja Dyos, wa xbʼobʼ sakʼjuke ma stsijujelyi (Levítico, kapituloʼik 11 man 15; Números, kapitulo 19).

Ja olomalik judío stsʼakbʼaweyi mas mandarik ja bʼa leyi. Jun libro wa xcholo jastal stsʼakbʼaweyi mas mandarik bʼa jastal jun ixuk winik wa xbʼobʼ kuxbʼuk sok jastal oj bʼobʼ ya kuxbʼuk ja tuki. Cha skʼulane jun lista bʼa jastik junuk wa xbʼobʼ pax kux soka miyuki. Cha sleʼawe yajkʼachil kostumbreʼik bʼa oj skʼuluke ja ixuk winik bʼa jachuk oj cha ajyuke sak.

Ja skontraʼik ja Jesús sjobʼoweyi: «Ja hua nebuman jumasa mi ni tʼun huas squitzʼahue ja scostumbre ja maʼ ecʼ pax ta cujtiqui. Pe scuxil scʼab huax huaaye tac. ¿Jasyuj jach huas scʼulane ba?» (Marcos 7:5). Ja olomalik judío mini kechan wane stajel tiʼal ja bʼa sakʼjel ja skʼabʼe bʼa kechan ajyel asyado. Ja yeʼnle stojbʼese jun yajkʼachil kostumbre bʼa stʼoljelyi jaʼ ja bʼa skʼabʼe ja ixuk winik matik oj waʼukeʼi. Ja libro taxta tiʼali wa xcholo ja olomalik judío wa xkʼeye kʼumal sbʼaja jas tikʼe yeʼtal oj axuk makunuk, jas tikʼe jaʼ, maʼ oj bʼobʼ stʼol sok bʼa man oj kʼot ja jaʼi yajni sakʼawe ja skʼabʼeʼi.

¿Jasa spensaraʼan ja Jesús sbʼaja leyik it bʼa ja yaʼuneje eluk ja ixuk winiki? Ja yeʼn yala yabʼ ja olomalik judío ja jas aji ekʼyi ja aluman Isaías yuja Jyoba yajni yala: «Ja huenlexi toj chab cara ayex. [...] Ja cristiano jumasa iti huas sea sbaje que huas squitzʼahuone. Jel tzamal ja scʼumalei, pero iday, ja scʼujolei, mi ni tʼun huas squitzʼahuone. Jaʼ bi ja ba sti jsati huas stzomo sbaje, pero lom ni juntiroa. Ja jas huane seejeli, spensar ni yenlea» (Marcos 7:6-8).