Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

La ajyukotik ja bʼa syajal skʼujol ja Dyosi

Karta jakel bʼa Tsome Tojwanum

Karta jakel bʼa Tsome Tojwanum

Sbʼaja matik ayiʼoje syajal skʼujol soka Jyoba:

Ja Jesús yala: «[Ja weʼnlexi] oj ni anaex jasuncʼa mero smeranila porque ja smeranili, oj ya huajanic libre» (Juan 8:32). ¡Janekʼto wa xyaʼa kulan jkʼujoltik ja yaljelik it! Jachniʼa, wani xbʼobʼ jnatik ja smeranili, anima ti ayotik ja bʼa «stza‘anil kʼakʼu jumasa‘» jel wokoli bʼa bʼutʼel ja slejel abʼali (2 Timoteo 3:1, YD). Sok bʼobʼta wa xjuljkʼujoltik yajni jnebʼatik ja smeranil wa xtax bʼa Yabʼal ja Dyosi. ¡Jelni tsamal juntiro waj bʼa keʼntik!

Pe mi malanta snajel lek ja smeranili sok yaljel yabʼ tikʼanxta ja tuk sbʼaja it, cha tʼilani jachʼ oj jetik soka jmodotiki. Bʼa oj kʼulaxuk jachuk, jelni tʼilan oj ajyukotik ja bʼa syajal skʼujol ja Dyosi. Pe ¿jastal oj lajxukujtik ajyel ja bʼa syajal skʼujol ja Dyosi? Ja Jesús yaʼa ja sjakʼjel it ja ultimo akʼwal ajyi sakʼani, yajni yala yabʼ jachuk ja sjekabʼanum matik toj ajyiyeʼi: «Porque ta jach cʼa huanex, yuj ni huanex ni scʼuajel ja jmandari. Jach ni ayon soc ja jTat ja quen. Tola vida huax cʼuan ja smandari, jayuj huax naa lec que jel ja syajal scʼujol jmoqui» (Juan 15:10).

Ja bʼa teksto it kilatik ja Jesús bʼobʼ ajyuk ja bʼa syajal skʼujol ja Dyosi yuja skʼuʼan ja smandarik ja sTati. Sok cha jachni oj jkʼuluktik ja keʼntiki. Bʼa oj ajyukotik ja bʼa syajal skʼujol ja Dyosi, tʼilan oj katik makunuk ja smeranil bʼa spetsanil ja jas wa xkʼulantiki. Ja bʼa akʼwal jawi, ja Jesús cha yala: «Huan cʼa xa huabyex slugaril ja jas huax jea huilexi, huan cʼa xa cʼulanex, jel ni gusto oj ajyanica» (Juan 13:17).

Ja jas wa xmajlatikoni jani ja libro it a-skoltayotik bʼa yajel makunuk ja smeranili sok jachuk oj ajyukotik ja bʼa «syajal scʼujol ja Diosi. Qʼuelan jacan [...] [soka] jvidatic jau ba mi ni nunca huax chʼaqui» (Judas 21).

Tsome Tojwanum bʼa Taʼumantiʼik bʼa Jyoba