Jel yaj juntiro yajni june ja bʼa mero jpamilyatik ma jun mero kamigotik wa x-aji eluk ja bʼa xchonabʼil ja Dyos yuja mi sutxi skʼujol soka smul. Ta wa xkisatik ja jas wa xyala ja Biblia ojni sjeʼ ja janekʼ wa xyajtaytik ja Dyos soka janekʼ wa xkʼana oj ajyukotik toj soka jas yaʼunej kulani. * Ja yujil, la kiltik jujuntik sjobʼjel sbʼaja it.

¿Jastalxa oj kiltik june maʼ mixa Taʼumantiʼuk? «Pero ta creyente cʼa ja maʼ huan sleejel ja smul soc ja ixuquei, mi ni sbejuc oja hualex que ja huermano xa bajex soc. Jach ni ja maʼ quechan yen huas scʼana que oj ajyuc lequi. Jaxa maʼ ti to ni yioj ja scʼulubal diosi, soc ja maʼ quechan huajel scʼujol huax xchono yabalil ja smoji, soc ja maʼ mi tox yaa can yuujel ja trago, [...] mas lec, actayic cani.» (1 Corintios 5:11.) Ja Biblia wa xya juljkʼujoltik: «Ta ay cʼa june [...] huan cʼax jac ja ba hua naji, ta tuc cʼa ja jas huan seejel soc ja jas huax naatic ja quentiqui, mi lomx hua ochuc ba hua naji. Mi la ochyex loil soc porque ta huan cʼa la och loil soc, huan tox huaj ahuabi, ti xa chʼicana soc ja mulal jahui» (2 Juan 9-11). Ja La Atalaya 15 bʼa noviembre bʼa 1981, slam 19, wa xyala: «Ja kechanta yajelyi ‹¡dyos!› jun ixuk winik bʼobʼta jani skʼeʼulabʼil bʼa oj yiʼa och skʼumajel sok bʼa oj kʼota wamigoʼuk. ¿Wana maʼ xkʼana oj jkʼuluktik jachuk sok june maʼ mixa Taʼumantiʼuk?». Yajni june mixa Taʼumantiʼuk, mixani xmojtaytik sok mi la ochtisok loʼil bʼa mini jun jasunuk bʼa Dyos sok mini ja bʼa jas wa xkʼulantiki.

¿Jel maʼ stʼilanil juntiro ja yajelkan skʼumajel soka smojtajeli? Jelniʼa, yujni ay tuktukil rasonik. Ja sbʼajtanili, jani wa xjeʼatik ja janekʼ wa xkʼana oj ajyukotik toj soka Dyos soka jas yaʼunej kulan ja bʼa smandari, ja Biblia. Jel xyajtaytik ja Jyoba ja yuj tolabida wa xkʼana oj jkʼuʼuktik ja smandari, anima ay ekʼele jel wokol juntiro bʼa keʼntik. Cha wa xnaʼatik ja Jyoba jel ja syajal  skʼujol sok toj lek ja jas wa skʼulan, sok spetsanil ja jas wa xyala ja bʼa sleyiki bʼajni jlekilaltik (Isaías 48:17; 1 Juan 5:3). Ja xchabʼil rason, jani ja mulanum mi sutxi skʼujoli wani xjomwaniʼa. Yajni mi xmojtaytiki wa xkoltani bʼa mok sjom-otik ja jastal wala taxtik soka Dyos sok jachuk wa xkatik ajyuk sak sok asyado ja kongregasyoni (1 Corintios 5:6, 7). Ja yoxil rason, ta wa xkiʼajtik ja jas yaʼunej kulan ja Jyoba ja bʼa Biblia bʼobʼta ojni ya el slekilal ja maʼ elelkani. Sok ta wa xkʼuʼantik ja jas wa xchapawe ja ansyanoʼiki ojni bʼobʼ nikjuk ja skʼujol ja mulanumi bʼa oj sutxuk, pes ja koltanel akʼubʼalyi yuja ansyanoʼiki mito xya el slekilal. Yajni xyila xchʼayata ja jastal wa xyila sbʼaj soka matik jel syajta sbʼajsoki, bʼobʼta «ti [oj] scʼul pensara», bʼa oj snaʼ kʼinal janekʼ xchaʼanil ja smuli sok jachuk oj kumxuk soka Jyoba (Lucas 15:17).

¿Jaxa ta jpamilyatik ja maʼ mixa Taʼumantiʼuki? Wani x-och probar ja jastal toj ayotik soka Jyoba yajni ja maʼ mixa Taʼumantiʼuki mero jchikʼel jbʼajtisok. Sbʼaja ekʼeleʼik it, ¿jastal oj kiltik ja maʼ mixa Taʼumantiʼuki? Anima mi xbʼobʼ cholxuk yibʼanal ja jastik oj bʼobʼ ekʼuki, la kiltik chabʼe.

Ayni ekʼele ja maʼ mixa Taʼumantiʼuki kʼotel mero jpamilyatik sok junta naʼits aytisok. Pe yuja mixa Taʼumantiʼuki mi wa stojolan mixa jpamilyaʼuk jbʼajtik, ja jastik wa xkʼulantik ja bʼa yojol ja pamilya soka jastal wa xkiʼaj jbʼajtisoki ojni bʼobʼ kʼulaxuka. Pe yuja mulanum yeʼn stsaʼunej oj skʼuts ja jastal wa xyila sbʼaj soka Jyoba, ja keʼntiki mini xbʼobʼ ochkotik loʼil soka mulanum bʼa mini jun jasunuk bʼa Dyos, pes yujni wa xkʼanatik toj oj ajyukotik soka Jyoba. Ta tikʼa oj ajyuk ja bʼa tsomjelal bʼa pamilya, mini jas oj bʼobʼ yale. Pe ta ja mulanumi yal nuxto ma tito ay bʼa yibʼ skʼabʼ ja snantati, ja nantataliki oj bʼobʼ xchap-e bʼa oj spaklaye lajan ja Biblia, pes yeʼnleni xchole bʼa oj stoj-e sok sjejelyi ja yuntikileʼi (Proverbios 6:20-22; 29:17). *

¿Pe jaxa ta mi junta naʼits ayotik soka mulanumi? Ta jachʼ kʼa, ojni jits jbʼajtik bʼa smojtajel, sok jaʼita oj jkʼumuktik ta aykʼa jun  jasunuk jel tʼilan oj kʼulaxuk ja bʼa pamilya. Mok jleʼtik modo bʼa oj jtatik loʼil sok jasunuk mey stʼilanil. Yuja wa xkʼana toj oj ajyukotik soka Jyoba soka xchonabʼili wani xkisatik lek ja mandar wa xyaʼa ja Biblia sbʼaja it. Ja yujil, yajni wala ajyitik kʼuʼabʼal soka mandar it bʼobʼta oj nikjuk ja skʼujol ja mulanumi sok oj bʼobʼ ya el slekilal soka tojelal akʼubʼalyiʼi (Hebreos 12:11). *

^ par. 1 Ja rasonik wa xyala ja Biblia sbʼaja matik mixa Taʼumantiʼuki jachʼ wa xkʼulaxi soka matik gana wa sjitsa sbʼaje ja bʼa xchonabʼil ja Dyosi.

^ par. 2 Bʼa oja nebʼ mas sbʼaja maʼ mixa Taʼumantiʼuk, pe yal nuxto ma tito ay bʼa yibʼ skʼabʼ ja snantati sok junta naʼits aye, kʼela ja La Atalaya 1 bʼa octubre bʼa 2001, slam 16 sok 17, soka 15 bʼa noviembre bʼa 1988, slam 20.

^ par. 3 Bʼa oja nebʼ mas sbʼaja rasonik wa xyaʼa ja Biblia sbʼaja maʼ mixa Taʼumantiʼuk bʼa mi junta naʼits ayotisoki, kʼela ja La Atalaya 15 bʼa abril bʼa 1988, slam 26 man 31, soka 15 bʼa noviembre bʼa 1981, slam 20 man 25.