Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Sjejelik wa xbʼobʼa nebʼ ja bʼa Biblia

 SJEJEL 53

Mi xiw ja Jehoiadá

Mi xiw ja Jehoiadá

Ja Jezabel ajyi jun yakʼix sbʼiʼil Atalía sok jelni malo jastal snan. Ja Atalía nupani soka mandaranum bʼa Judá. Yajni cham ja statami, kʼe ya mandar ja skerem. Pe yajni cham ja skeremi, ja Atalía yeʼnxa kʼe ya mandar ja bʼa Judá. Bʼa mi maʼ oj sjapyi ja smandaraneli, sleʼa modo smiljel ja yuntikil ja mandaranumi sok spetsanil ja matik oj bʼobʼ slokʼolukani. ¡Cha smilani ja yijiki! Ja yuj, spetsanil wa xiwyeyuj.

Ja mero olomal bʼa sacerdote, ja Jehoiadá, soka xcheʼumi, ja Jehoseba, wani snaʼawe ja jas wan skʼulajel ja Atalía mini lekuk. Ja yuj, ama xiwela sbʼaj, snakʼawe june ja yij ja Atalía, jun yal alats sbʼiʼil Jehoás. Ti yawe kʼiʼuk bʼa templo.

Yajni ja Jehoás ayxa yiʼoj juke jabʼil, ja Jehoiadá stsomo yibʼanal ja olomalik bʼa talnanum soka levitaʼik. Yala yabʼye: «Talnayik ja spwertaʼik ja templo. Mokni maʼ wawex ochuk». Jaxa Jehoiadá ya slap ja skorona ja Jehoás bʼa yeʼnxa oj kʼot mandaranum ja bʼa Judá. Anto ja ixuk winik jelni gustoʼaxiye.

Ja Atalía yabʼ ja sbuya ja ixuk winiki sok ajnelxta waj man templo. Yajni yila ja ajkʼach mandaranum, awani: «¡Kontraʼanum! ¡Kontraʼanum!». Ja olomalik bʼa talnanum syamawe ja Atalía, yawe eluk ja tiw sok smilawe. Pe ¿jas maʼ oj ekʼuk soka jastik jel sjomunejkani?

Ja Jehoiadá skoltay ja chonabʼ bʼa skʼulajel jun trato soka Jyoba. Ja yeʼnle skʼapaweyi ja Dyos bʼa kechan yeʼn oj yaʼteltaye. Ja Jehoiadá ya eluk ja templo bʼa Baal sok ja kʼulubʼal dyosik. Yaʼa sacerdoteʼik sok levitaʼik ja bʼa stemplo ja Jyoba. Jachuk ja ixuk winik ti oj yaweyi stoyjel tiw ja  Jyoba yajkʼachil ekʼele. Cha yaʼa talnanumik ja bʼa templo bʼa mok yawe ochuk jastik bʼa mi lekuk. Jaxa Jehoiadá soka olomalik bʼa talnanum tixa yiʼaje och ja Jehoás bʼa snaj sok yaʼawe bʼa skujlayubʼ. Ja ixuk winik bʼa Judá jelni gustoʼaxiye. Jachuk wanxa xbʼobʼ yaʼteltaye ja Jyoba yuja mixa teyuk ja Atalía soka yaʼteltajel ja Baal. ¿Anke jelni skoltay jitsan ixuk winik ja Jehoiadá yuja mi xiwi?

«Ja matic huas scʼana smil ja jcuerpotiqui, mi lom la xiuyex yuj. Mix bob xchʼay ja caltziltiqui. [...] Xihuanic yuj ja Diosi, porque ja yeni, ay yip ba oj bob xchʼay ja caltziltiqui soc jach ni ja jcuerpotiqui» (Mateo 10:28).