Kaʼax ja bʼa sbʼaʼal

Kaʼax ja bʼa sbʼaʼali

Taʼumantiʼik bʼa Jyoba

Stsajel jun kʼumal tojol-abʼal

 SJEJEL 46

Yaʼawe jun preba ja bʼa wits Carmelo

Yaʼawe jun preba ja bʼa wits Carmelo

Ja mandaranel bʼa 10 kʼole ajyi jitsan mandaranum mi lekuk, pe ja Acab masto jelxi. Nupani sok jun ixuk jel malo bʼa wa xyaʼteltay ja Baal. Sbʼiʼilan Jezabel. Ja Acab soka Jezabel skichawe jitsan ixuk winik bʼa yaʼteltajel ja Baal. Cha smilawe jitsan yalumanik ja Jyoba. ¿Jasa skʼulan ja Jyoba? Sjeka ja aluman Elías bʼa waj yayi jun rason ja Acab.

Ja Elías yalyabʼ ja Acab mi oj ya jaʼ ja bʼa Israel yujni jun mandaranum jel malo. Mas ja oxe jabʼil, mini jas kʼi ja bʼa alaji, jaxa ixuk winik mi ajyi swaʼele. Ja Jyoba sjeka ja Elías bʼa oj waj yalyabʼ pilan ekʼele ja Acab. Ti aljiyabʼ ja Elías yuja Acab: «Kechan waxa waʼa wokol. Spetsanil ja it weʼna mul». Ja Elías sjakʼa: «Mi keʼnuk jmul yuja mi xyaʼa jaʼi. Jani yuja waxa waʼteltay ja Baal. Tsomo ja chonabʼi sok ja alumanik bʼa Baal ja bʼa xchaʼanil ja wits Carmelo. La jkʼuluktik jun preba».

Ja chonabʼi stsomo sbʼaje ja bʼa witsi. Ja Elías yala: «Tʼilani oja tsaʼex. Yujkʼa ja Jyoba yeʼn ja Dyos smeranil, nochowik. Pe ta yeʼn ja Baal, nochowik yeʼna. La jkʼuluktik jun preba: ja 450 aluman bʼa Baal tʼilan oj xchape jun majtanal sok oj skʼumuke ja sdyose. Jaxa keʼn oj cha jchap jun majtanal sok oj jkʼumuk ja Jyoba. Ja dyos maʼ oj sjek kʼakʼi yeʼni ja Dyos smeranil». Ja chonabʼi och akwerdo.

Ja alumanik bʼa Baal xchapawe ja majtanali. Snajtil ja kʼakʼu skʼumane ja sdyose: «¡Ah, Baal, jakʼakitikon!». Pe yuja mi sjakʼa, ja Elías och stselay. Ja yeʼn yala: «Payawik sok spetsanil awipex. Bʼobʼta ochkan swayel sok wa skʼana ay maʼ oj syujkes». Ojxta kʼikʼbʼuk, sok ja yalumanik ja Baal mini xyawekan spayjel, pe mini maʼ sjakʼa.

Ja Elías yaʼa ja majtanal bʼa jun altar sok spekʼayi jitsan jaʼ. Tixa yayi orasyon: «Ah, Jyoba, awa pabor, ayil ja chonabʼi weʼnani ja Dyos smeranil». Jaxa Jyoba wegoxta sjekakon kʼakʼ sok stsika el ja majtanal. Ja ixuk winik awaniye: «¡Ja Jyoba yeʼni ja Dyos smeranili!». Tixa yala ja Elías: «Mokni waʼexkan oj spake ajnel ja yalumanik ja Baal». Ja kʼakʼu jaw smilawe 450 alumanik bʼa Baal.

 Tsaʼan, chiknaji jun yal tsome ason ja bʼa mari. Jaxa Elías yalyabʼ ja Acab: «Ti jakum jun tsatsal chawuk jaʼ. Chapa jawa karro sok kaʼax bʼa wa naj». Ja satkʼinali bʼutʼ kʼikʼil ason, kʼe ajyuk ikʼ sok kʼe ya jun tsatsal jaʼ. Jach tejkʼaji ja takin kʼinali. Ja Acab waj ligero soka skarro. Ja Jyoba skoltay ja Elías bʼa oj ajnuk mas wego yuja karro. Pe ¿ti maʼ chʼak ja swokolik ja Elías? La kiltik.

«Bʼa oj snaʼ ja ixuk winiki ja weʼn, wa bʼiʼil Jyoba, kechan weʼn ja mas niwana bʼa spetsanil ja luʼumkʼinali» (Salmo 83:18).