Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Sjejelik wa xbʼobʼa nebʼ ja bʼa Biblia

 SJEJEL 47

Ja Jyoba stsatsankʼujolan ja Elías

Ja Jyoba stsatsankʼujolan ja Elías

Ja Jezabel yabʼ ja jas ekʼ sbʼaje ja yalumanik ja Baal sok jel tajki. Ja yuj sjeka jun akʼa rason bʼa waj yalyabʼ ja Elías: «Ojni chaman ja jechel, jastal ja yalumanik ja Baal». Ja Elías jel xiwi sok spaka ajnel man takin kʼinal. Ja yeʼn yayi orasyon: «Jyoba, mixa xkuchkuj mas. Wanxa xkʼana oj chamkon». Ja Elías jelxa yajtik ay sok ochkan swayel bʼa jun yibʼ teʼ.

Jun anjel syujkes ja Elías sok yaʼawxta yala yabʼi: «Kʼeʼan sok waʼan». Ja Elías yila jun setan pan tey bʼa sat jujuntik kʼixin ton, sok jun jarro jaʼ. Ja yeʼn waʼi sok yuʼaj, sok cha wayi. Ja anjel cha syujkes sok yala yabʼ: «Waʼan. Wani xa kʼana oj ajyuka wip ja bʼa wa bʼejyeli». Ja yuj ja Elías och waʼuk tʼusan mas. Tixa bʼejyi 40 kʼakʼu sok 40 akwal masan kʼot ja bʼa wits Horeb. Ti och wayuk bʼa jun kʼeʼen. Anto ja Jyoba yala yabʼ: «¿Jas wanuka jul ja il, Elías?». Ja Elías sjakʼa: «Ja israʼelenyo mi yaʼunejuke kʼotuk ja jas skʼapunejeʼawi. Sjomowe jawa altarik sok smilawe jawa alumaniki. Jaxa wego keʼnxa wa xkʼan smilone».

Ja Jyoba yala yabʼ ja Elías: «Elan sok ti la kan tekʼan ja bʼa witsi». Anto, jak jun tsatsal ikʼ, tixa nijki ja luʼumi sok tsaʼan jun kʼakʼ. Tsaʼan, ja Elías yabʼ jun kʼumal laman sok yaʼawxta. Ja yuj smaka ja sat soka skʼuʼi, el ja bʼa kʼeʼeni sok ti kan tekʼana. Ja Jyoba sjobʼoyi jas yuj wan spakjel ajnel. Jaxa Elías sjakʼa: «Kechanxta keʼn kanelon aluman». Pe ja Jyoba yala: «Mi atuchʼiluk aya. Ayto 7,000 ixuk winik ja bʼa Israel bʼa wa xyaʼteltayone. Kaʼax sok alayabʼ ja Eliseo bʼa yeʼnxa tsaʼubʼal oj ochkan alokʼol». Ja Elías wegoxta waj skʼuluk ja jas aljiyabʼ yuja Jyoba. ¿Oj maʼ cha bʼobʼ skoltaya ja Jyoba ta akʼuʼanyi? Ojniʼa. Ja wego la kiltik jun jasunuk ekʼi ja bʼa styempoʼil mi koʼ jaʼi.

«Chican jastal huax ecʼ ahuujilexi, mix cham acʼujolex. Cʼumanic ja Diosi. Cʼanahuic yi lec pavor ja Dios ba oj scoltayex. Aahuic yi lec stzʼacatal» (Filipenses 4:6).