Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Sjejelik wa xbʼobʼa nebʼ ja bʼa Biblia

 SJEJEL 39

Ja bʼajtan mandaranum bʼa Israel

Ja bʼajtan mandaranum bʼa Israel

Ja Jyoba yayi jwesik ja israʼelenyo bʼa oj tojuke, pe wani skʼanawe jun mandaranum. Ja yuj yalawe yabʼ ja Samuel: «Spetsanil ja tuk chonabʼik ayiʼoje smandaranume. Cha wa xkʼanatikon june ja keʼntikoni». Ja Samuel mini jel lek yabʼi. Tixa yayi orasyon ja Jyoba, jaxa Jyoba sjakʼa: «Keʼn mixa skisawon ja chonabʼi, sok mi weʼnuk. Alayabʼ oj bʼobʼ ajyukyujile jun smandaranume, pe jel jas oj kʼanjukyile». Ama jachuk, ja chonabʼi yala: «¡Ti xyila sbʼaja! ¡Wani xkʼanatikon jun mandaranum!».

Anto ja Jyoba yala yabʼ ja Samuel jun winik sbʼiʼil Saúl yeʼn oj kʼotuk ja bʼajtan mandaranum. Yajni ja Saúl waj yulatay ja Samuel man Ramá, ja Samuel stʼoloyi aseyte ja bʼa yolom ja Saúl bʼa senyaʼan yeʼn oj kʼotuk ja mandaranum.

Jaxa Samuel stsomo ja israʼelenyo bʼa sjejelyi ja yajkʼachil smandaranume. Pe mi staʼawe bʼay ja Saúl. ¿Wan maʼ xa naʼa jas yuj? Yujni ti snakʼa sbʼaj bʼa jun monton bultoʼik. Yajni staʼawe, yawe eljani sok ti yaʼawe tekʼan bʼa snalan ja chonabʼi. Masni jel chaʼan yuja tuki sok jel tsamal. Ja Samuel yala: «Kʼelawik ja maʼ stsaʼunej ja Jyoba». Yajni ja ixuk winik yilawe ja mandaranumi, jel gustoʼaxiye.

Ja bʼajtanto, ja Saúl wani skisa ja Samuel sok kʼuʼabʼal ajyi soka Jyoba. Pe ja yeʼn jomi. Bʼa jun ekʼele, ja Samuel yala yabʼ ja Saúl amajlajuk bʼa skʼapjel ja majtanaliki. Ja mandaranum mini ayiʼoj permiso bʼa skʼapjel ja majtanali. Pe ja Samuel mi kʼot wego, ja yuj ja Saúl skʼapa stuchʼil. ¿Jasa skʼulan ja Samuel? Yala yabʼ: «Tʼilani oja kʼuʼukyi ajyi ja Jyoba, pe mini akʼulan». ¿Oj maʼ snebʼ jun kʼakʼu ja Saúl?

Tsaʼan, ja Saúl waj tiroʼanuk soka swinkil ja Amaleq, jaxa Samuel yala yabʼ mokni maʼ yakan sakʼan. Pe ja Saúl yaʼakan sakʼan ja mandaranum Agag. Anto ja Jyoba yala yabʼ ja Samuel: «Ja Saúl yaʼawontakan, mixa skʼuʼanki». Jel tristeʼaxi ja Samuel, ja yuj yala yabʼ ja Saúl: «Ja Jyoba oj stsaʼ pilan mandaranum yujni ja weʼn mixa xa kʼuʼanyi». Yajni sutu sbʼaj ja Samuel bʼa oj wajuk, ja Saúl syamayi  ja stiʼ spalkʼu, sok xchʼiʼa. Ja Samuel yala yabʼ ja Saúl: «Jach oj sjapawi jawa mandaranel ja Jyoba». Ja jaw wa stojolan ja Jyoba pilan maʼ oj yayi ja mandaranel bʼa meran wa xyajtajiyuj sok wa xkʼuʼajiyuj.

«Ja ajyel kʼuʼabʼal masni lek yuja skʼapjel jun majtanal» (1 Samuel 15:22).