Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Sjejelik wa xbʼobʼa nebʼ ja bʼa Biblia

 SJEJEL 35

Ja Ana skʼanayi jun skerem ja Jyoba

Ja Ana skʼanayi jun skerem ja Jyoba

Jun israʼelenyo sbʼiʼil Elcaná ajyi chabʼ xcheʼum: sbʼiʼil Ana sok Peniná. Pe ja yeʼn jani jel syajtay ja Ana. Ja Peniná jel jitsan ja yuntikili, pe meyuk ja bʼa Ana. Ja yuj, ja Peniná jel skʼenay ja Ana. Jabʼil jabʼil, ja Elcaná wa xyiʼaj och ja spamilya man Siló, bʼa stoyjel ja Jyoba ja bʼa tabernáculo. Jun ekʼele, yajni teye tiw, ja Elcaná yila ja yala cheʼum Ana jel tristeʼay. Ti yala yabʼ: «Ana, awa pabor, mok okʼan. Teyona moka, jel xkʼanawa ja keʼn».

Tsaʼan, ja Ana waj yayi orasyon stuchʼil. Wani okʼel yajni wan skʼanjelyi akoltajuk yuja Jyoba. Skʼapayi: «Jyoba, ta awaki jun jkerem, oj kawi bʼa oj yaʼteltaya tolabida ja bʼa sakʼanili».

Ja Elí, ja mero olomal bʼa sacerdote, yila ja Ana wan okʼel sok wan nijkel ja stsʼujmil stiʼi, spensaraʼan yakbʼel ay ja Ana. Ja Ana xcholo yabʼ: «Miyuk, kala kajwal, mi yakbʼelukon. Yujni ay kiʼoj jun niwan wokol sok wanon skʼumajel ja Jyoba». Ja Elí snaʼa mi jachuk jastal spensaraʼan sok yalyabʼ ja Ana: «Ja Jyoba ayawi ja jas akʼanayi». Ja Ana maxa xlikiki yabʼi sok tixa waja. Mi el ja jabʼili, ajyiyuj jun yal skerem sok ya sbʼiʼiluk Samuel. Pensaraʼan, ¿janekʼto maʼ gustoʼaxi ja Ana?

 Ja Ana mi chʼay skʼujol ja jas skʼapunejyi ja Jyoba. Yajni ya elyi smix ja Samuel, yiʼaj och bʼa oj aʼtijuk bʼa tabernáculo. Yala yabʼ ja Elí: «Kayi orasyon ja Jyoba bʼa oj yaki ja yal jkerem it. Sok wanon yajelyi majan ja Jyoba bʼa yibʼanal ja sakʼanili». Ja Elcaná soka Ana wa xyulataye ja Samuel jabʼil jabʼil sok wa xyiʼaje ochyi jun yajkʼachil spalkʼu mey skʼajbʼil. Jaxa Jyoba yatoyi ja Ana oxe skerem sok chabʼ yakʼix.

«Kʼanawik ojni a‘juk awiʼle‘xa. le‘awik ojni ata‘exa» (Mateo 7:7, YD).