Kaʼax ja bʼa sbʼaʼal

Kaʼax ja bʼa sbʼaʼali

Taʼumantiʼik bʼa Jyoba

Stsajel jun kʼumal tojol-abʼal

 SJEJEL 34

Ja Gedeón skʼulan ganar ja Madián

Ja Gedeón skʼulan ganar ja Madián

Soka tyempo, ja israʼelenyo cha yaʼawekan ja Jyoba sok kʼe yaʼteltaye kʼulubʼal dyosik. Ja swinkil Madián yelkʼan ja xchanteʼe ja israʼelenyo sok xchʼakawe ja sbʼaʼal yalaje, jach skʼulane juke jabʼil. Bʼa skoltajel sbʼaje, ja israʼelenyo wa snakʼa sbʼaje bʼa kʼeʼenik sok bʼa yaxkʼul. Ja yeʼnle kʼe skʼaneyi ja Jyoba bʼa akoltajuke. Ja yuj ja Jyoba sjeka jun yanjel bʼa waj yalyabʼ jun kerem sbʼiʼil Gedeón. Ja anjeli yala: «Ja Jyoba stsaʼuneja bʼa oj kʼotan jun kʼakʼanum jel jawa wip». Ja Gedeón sjobʼo: «¿Jastal oj jkoltay ja Israel ja keʼn? Jelni ajula jbʼaj».

Ja Gedeón wa skʼana oj snaʼe bʼa yeʼn tsaʼubʼal yuja Jyoba. ¿Jasa skʼulan? Yaʼa jun xetʼan stsoʼotsil chej ja bʼa luʼumi sok yala yabʼ ja Jyoba: «Ta ja bʼa saʼan sakbʼel ja stsoʼotsil chej poxel ay yuja tsʼujuli, pe jaxa bʼa luʼumi takin ay, jach oj jnaʼe bʼa waxa kʼana oj jkoltay ja Israel». Yajni el ja kʼakʼu, ja stsoʼotsil cheji poxel ay lek, jaxa luʼumi takin ay. Anto, ja Gedeón skʼana ja bʼa pilan kʼakʼu mok poxuk ja stsoʼotsil cheji, kechan ja bʼa luʼumi. Yuja jach ekʼi, ja yeʼn snaʼa bʼa tsaʼubʼal yuja Jyoba. Tixa stsomo ja skʼakʼanumiki bʼa wajel tiroʼanel soka kʼakʼanumik bʼa Madián.

 Ja Jyoba yalyabʼ ja Gedeón: «Keʼn oj jkoltay ja israʼelenyo bʼa oj skʼuluke ganar. Pe yuja jitsan jawa kʼakʼanum, oj spensaraʼuke yeʼn skʼulane ganar stuchʼile. Ala yabʼye ja matik wa xiwye akumxuk bʼa snaje». Ja yuj kumxiye 22,000 winike, sok kanye 10,000. Jaxa Jyoba cha yala: «Jelto aʼaye. Iʼaj och bʼa yok jaʼ sok ala yabʼye ayuʼe. Kechanta iʼajkan ja matik kʼelan jakan ay soka skontraʼe yajni wane yujel jaʼi». Kechan 300 winike ajyiye kʼelan jakan yajni wane yujeli. Ja Jyoba skʼapa ja chʼin tsome jaw oj skʼuluke ganar ja 135,000 kʼakʼanumik bʼa Madián.

Ja akwal jaw ja Jyoba yala yabʼ ja Gedeón: «Kʼot ja sjutsʼinil bʼa tiroʼanel soka kʼakʼanumik bʼa Madián». Ja Gedeón yayi ja swinik kachoʼik sok jarroʼik bʼa ti chʼikan jun yajlubʼ kʼakʼ ja bʼa yojoli. Ja yeʼn yala: «Kʼelawonik sok jach oja kʼulukex jastal oj jkʼuluk ja keʼn». Ja Gedeón sjuʼu ja skacho, spojo ja jarro, sniktalan ja yajlubʼ skʼakʼi sok awani: «¡Ja yespada ja Jyoba sok ja bʼa Gedeón!». Jach junxta skʼulane ja 300 winike. Ja kʼakʼanumik bʼa Madián jelni xiwye sok mi snaʼa bʼa oj wajukeʼa. Sok yuja jomta lek yolome, yeʼnta kʼe tiroʼanuke. Cha pilan ekʼele, ja Jyoba skolta ja israʼelenyo skʼulajel ganar ja skontraʼe.

«Jaʼ ni mero ba oj iljuc que Dios ni huax yaa ja quipticoni. Mi ni quipuc quenticona» (2 Corintios 4:7).