Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Sjejelik wa xbʼobʼa nebʼ ja bʼa Biblia

 SJEJEL 23

Ay jas skʼapaweyi ja Jyoba

Ay jas skʼapaweyi ja Jyoba

Yajni ekʼelxa chabʼ ixaw elel ja israʼelenyo bʼa Egipto, tixa kʼotye bʼa wits Sinaí sok jijliye tiw. Anto ja Jyoba skʼuman ja Moisés ja bʼa witsi sok yala: «Keʼn jkoltay ja israʼelenyo. Ta kʼuʼabʼal ajyiye jmok sok skʼuʼane ja jleyiki, ojni kʼotuke jchonabʼ tsaʼubʼal». Yajni koʼkon ja Moisés, yala yabʼ ja israʼelenyo ja jas yala ja Jyoba. ¿Jastal sjakʼawe? Yalawe: «Spetsanil ja jas wa xyala kabʼtikon ja Jyoba ojni jkʼuluktikon».

Ja Moisés cha kʼe ja bʼa witsi. Ja tiw, ja Jyoba yala yabʼ: «Bʼa yoxil kʼakʼu oj kʼumuk ja chonabʼi. Alayabʼ ja chonabʼ mok sleʼe modo kʼeʼel ja bʼa wits Sinaí». Ja Moisés koʼkon sok yala yabʼ ja israʼelenyoʼik bʼa a-xchap sbʼaje smaklajel ja Jyoba.

Ja bʼa yoxil kʼakʼu, ja israʼelenyo yilawe lijpelal sok kʼikʼil ason ja bʼa witsi. Cha yabʼye sbʼojtel tsatsal chawuk sok jun yokʼel kacho. Jaxa Jyoba koʼkon ja bʼa witsi bʼa yojol kʼakʼ. Ja israʼelenyo jel xiwye juntiro. Ja witsi tsats lek wan nijkel sok bʼutʼel tabʼ. Ja yokʼel ja kacho wanxta abʼxel mas tsats. Jaxa Dyosi yala: «Keʼnon ja Jyoba. Mokni waʼteltayex pilan dyosik».

Ja Moisés cha kʼe ja bʼa witsi. Jaxa Jyoba yayi ja leyik sbʼaja chonabʼi. Ja leyik jaw yala jastal oj yaʼteltaye sok jastal oj sjeʼe ja smodo. Ja Moisés stsʼijbʼan sok tsaʼan skʼumanyi ja israʼelenyoʼik. Ja yeʼnle skʼapawe: «Spetsanil ja jas wa skʼana ja Jyoba ojni jkʼuluktikon». Jachni skʼapaweyi ja Dyosi. Pe ¿oj maʼ yawe kʼotuk?

«Yaj oja huab ja Huajual Diosi soc spetzanil ja hua cʼujoli, soc spetzanil ja hua hualtzili, soc spetzanil ja hua pensari» (Mateo 22:37).