Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Sjejelik wa xbʼobʼa nebʼ ja bʼa Biblia

 SJEJEL 13

Ja Jacob soka Esaú skʼana sbʼaje perdon

Ja Jacob soka Esaú skʼana sbʼaje perdon

Ja Jyoba skʼapayi ja Jacob bʼa oj stalnay, jastalni skʼulanyi ja Abrahán soka Isaac. Ja Jacob ti kan bʼa jun lugar sbʼiʼil Harán. Ti nupani tiw, ajyi jitsan yuntikil sok jel riko waji.

Ekʼ ja tyempo, ja Jyoba yala yabʼ ja Jacob: «Kumxan ja bʼa slujmal jawa nantati». Jachuk ja Jacob soka spamilya kʼe stuleyi ja sbʼejyele. Jaxa bʼa bʼeji, jujuntik yaʼtijumik ja Jacob waj yal-e yabʼ: «Jawa moj-alijel Esaú ti jakume bʼaytik sok smoj 400 winik». Ja Jacob xiwi bʼa ay jas oj kʼulajukyi ja yeʼn soka spamilya. Ja yuj skʼuman ja Jyoba: «Awa pabor, koltayon ja bʼa skʼabʼ ja jmoj-alijeli». El ja pilan kʼakʼu, ja Jacob sjekayi majtanal ja Esaú: jitsan chejik, chiboʼik, wakaxik, camelloʼik sok burroʼik.

Ja akwal jaw, yajni kan stuchʼil ja Jacob, yila jun anjel. Ti syama sbʼaj soka Jacob. Mini sijpan sbʼaje man sakbʼi. Anima ja Jacob yajbʼikani, mini axwi. Ja anjeli yala yabʼ ja Jacob: «Sijpanon bʼa oj wajkon». Pe ja Jacob sjakʼayi: «Miyuk, man xwa koʼ jlekilal».

Masan ja anjeli ya koʼ slekilal ja Jacob. Ja wego ja Jacob snaʼa mini oj yakan ja Jyoba bʼa oj ixtalajuk yuja Esaú.

Ja sakbʼel jaw, ja Jacob najato yila ja Esaú soka 400 swiniki. Ja Jacob ekʼxa bʼajtan yuja spamilya bʼa wajel staʼ ja Esaú, sok yajni kʼoti koʼ tinan bʼa stiʼ sat juke ekʼele. Ja Esaú ajnelxta waj staʼ ja Jacob sok  stela. Och okʼuke xchawanile sok skʼana sbʼaje perdon. ¿Lek maʼ yila ja Jyoba ja jasa skʼulan ja Jacob?

Tsaʼan, ja Esaú kumxi bʼa snaj. Jaxa Jacob snochoyi ja sbʼejyeli. Ja Jacob ajyi 12 yuntikil: tey ja Rubén, Simeón, Leví, Judá, Dan, Neftalí, Gad, Aser, Isacar, Zabulón, José sok Benjamín. June ja bʼa yeʼnle, ja José, ya makunuk ja Jyoba bʼa yajel el libre ja xchonabʼi. ¿Wan maʼ xa kʼana oja naʼ jastal? La kiltik.

«Yaj xa huab ja hua condraexi. Cʼuman ja Dios yuj ja maʼ huax yilahua coraja. Jach cʼa huaxa cʼulanex, como yuninex nia ja hua Tatex tey ba satqʼuinali» (Mateo 5:44, 45).