Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Sjejelik wa xbʼobʼa nebʼ ja bʼa Biblia

 SJEJEL 99

Jun talna preso snebʼa ja smeranil

Jun talna preso snebʼa ja smeranil

Ja bʼa Filipos, ajyi jun mosoʼal akʼix bʼa wa skʼintay ja jastik oj ekʼuki yujni ochel sbʼaj jun pukuj. Jel skʼulan ganar takʼin sbʼaja yajwalik. Yajni ja Pablo soka Silas kʼotye bʼa Filipos, och nochjuke ekʼ bʼa jitsan kʼakʼu. Ja pukuji wa xyaʼakan aʼawanuk: «Ja winike it kʼotele mosoʼalik bʼa Dyos ja maʼ jel niwani». Jaxa ja Pablo tixa yalyabʼ ja pukuji: «¡Wa xkalawabʼ bʼa sbʼiʼil ja Jesús elan ja bʼa akʼixi!». Jaxa pukuji yaʼakan ja akʼixi.

Yajni ja yajwalik ja akʼixi snaʼawe mixa ojto skʼul-e ganar mas takʼin yuja yeʼn, jelni tajkiye. Skichawe och ja Pablo soka Silas man bʼay ja matik ay xchole bʼa xchapjel kʼumal sok yalawe yabʼ: «¡Ja winike it wane skʼokjel ja leyi, sok wane snikjel kʼumal bʼa yibʼanal ja chonabʼi!». Ja matik ay xcholi yaʼawe mandar bʼa a-smakʼe ja Pablo soka Silas sok a-xchʼike bʼa preso. Ja maʼ ay xchol bʼa wa skʼela ja preso ti yaʼa bʼa mas chʼikan ja bʼa preso, ja bʼa mas kʼikʼ ayi. Cha slatsʼayi ja yoke bʼa jun lechan teʼ.

Anto, ja Pablo soka Silas och tsʼebʼanuke bʼa yajelyi stoyjel ja Jyoba malan ja tuk presoʼanumi wane smaklajel. Junta chʼaykʼujol, ja bʼa nalan akwal, jun tsatsal terremoto snijkes ja preso. Chʼak sjam sbʼaj ja pwertaʼiki sok chʼak paʼuk ja kadenaʼiki soka lechanteʼik bʼa latsʼubʼal ja yoke. Ja talna preso ajnelxta och ja bʼa mas chʼikan ja bʼa yojol ja preso sok yila jaman ay ja pwertaʼiki. Spensaraʼan ta spakaweta ajnel yibʼanal ja presoʼanumiki, ja yuj syama jun espada bʼa ojxa smil sbʼaj ajyi.

Ja bʼa jutsʼin jaw, ja Pablo awani: «¡Moka yajbʼes abʼaj! ¡Teyotikon il!». Ja talna preso ajnelxta waj ja bʼay ja Pablo soka Silas sok koʼ mekʼan. Ti sjobʼoʼa: «¿Jasun tʼilan oj jkʼuluk bʼa oj jtaʼ jsakʼanil?». Ja yeʼnle sjakʼawe: «Ja weʼn sok ja matik tey bʼa wa naji tʼilan oja kʼuʼukex bʼa Jesús». Anto, ja Pablo soka Silas kʼe sjeʼeyi ja yabʼal ja Jyoba, jaxa talna preso sok yibʼanal ja matik tey bʼa snaji yiʼaje jaʼ.

«Oj mochjanic, ti oj iijanic ja ba iglesia jumasa. Oj cho aaji ochanic preso ma oj aaji ochanic ja ba sti sat ja maʼ ay yateli soc ja ba sti sat ja gobierno jumasa. Pero jaʼ yuj ja huaxa cʼuanonex ja queni. [...] Soc ja jas huas scʼulanei, oj yabye claro lec ja jas huaxa cʼuanexi» (Lucas 21:12, 13).