Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Sjejelik wa xbʼobʼa nebʼ ja bʼa Biblia

 SJEJEL 94

Ja nebʼumanik koʼ sbʼaje ja yip ja Dyos

Ja nebʼumanik koʼ sbʼaje ja yip ja Dyos

Ekʼelxa 10 kʼakʼu kumxel ja Jesús man satkʼinal. Anto ja snebʼumanik ja Jesús koʼ sbʼaje ja yip ja Dyos. Jani ja kʼin bʼa Pentecostés bʼa jabʼil 33, sok kʼotele ja bʼa Jerusalén ixuk winik bʼa jitsan lugarik bʼa skʼintajel. Junuk 120 nebʼumanik bʼa Jesús stsomunej sbʼaje ja bʼa kwarto bʼa nalan chaʼan bʼa jun naʼits. Junta chʼaykʼujol, ay jas ekʼ jel cham yabʼjel. Lajansok jastal jun yajlubʼ kʼakʼ sjeʼa sbʼaj ja bʼa yolome jujune ja nebʼumaniki, sok spetsanile kʼe kʼumanuke bʼa tuktukil kʼumal. Chomajkil, yabʼye ja snililel jun tsatsal ikʼ ja bʼa naʼitsi.

Ja ixuk winik matik jakele bʼa tuktukil paisik yabʼye ja snililel sok ajnelxta wajye ja bʼa naʼits bʼa yiljel jasa wan ekʼeli. Jel cham yilawe yajni yabʼye ja nebʼumanik wane kʼumal bʼa tuk kʼumalik. Ja yeʼnle yalawe: «Ja ixuk winike it ti sbʼaje bʼa Galilea, ¿jastal lek wane kʼumal bʼa jkʼumaltik?».

Anto, ja Pedro soka tuk nebʼumanik kʼeye tekʼan bʼa stiʼ sat ja matik teyi. Ja Pedro yala yabʼ ja ixuk winik jastal milji ja Jesús sok ja Jyoba ya  sakʼwuk. Tixa yala ja Pedro: «Ja wego ja Jesús tixa ay man satkʼinal bʼa stojol skʼabʼ ja Dyos. Sok ya koʼ kitikon ja yip ja Dyos jastalni skʼapunej kitikon. Ja yuj awilunejex sok awabʼunejex ja milagroʼik it».

Ja ixuk winik kʼot man skʼujole ja jas yala ja Pedro sok ti sjobʼowe: «¿Jasa oj jkʼuluktikon?». Ja yeʼn sjakʼa: «Asutxuk akʼujolex soka wa mulexi sok iʼajik jaʼ bʼa sbʼiʼil ja Jesús. Sok tixa oj koʼuk abʼajex ja yip ja Dyos». Yiʼaje jaʼ junuk 3,000 ixuk winik ja bʼa kʼakʼu jaw. Man jutsʼin jaw, wegoxta kʼe jitsanbʼuk ja nebʼumanik ja bʼa Jerusalén. Ja jekabʼanumik yawe eluk mas kongregasyonik yuja skoltanel ja yip ja Dyos. Jachuk bʼobʼ sjeʼeyi ja nebʼumanik yibʼanal ja jastik alubʼal yabʼye yuja Jesús.

«Ta huan cʼax el ati que yena ni ja Huajual ja Jesusi, yuj ni huan xa xa cʼuan ja ba hua cʼujol que aaji sac-huuc yuj ja Dios ja yora chami. Malan soc ja jahui, oj ni ataa ja hua coltajeli» (Romanos 10:9).