Kaʼax ja bʼa sbʼaʼal

Kaʼax ja bʼa sbʼaʼali

Taʼumantiʼik bʼa Jyoba

Stsajel jun kʼumal tojol-abʼal

 SJEJEL 98

Ja nebʼumanik wajye bʼa jitsan chonabʼik

Ja nebʼumanik wajye bʼa jitsan chonabʼik

Ja jekabʼanumik skʼuʼane ja mandar yaʼa ja Jesús bʼa yijel och ja lekil rason bʼa Dyos bʼa yibʼanal ja luʼum. Ja bʼa jabʼil 47, ja nebʼumanik bʼa Antioquía sjekawe ja Pablo soka Bernabé bʼa oj wajuke jun sbʼejyele bʼa xcholjel. Xchawanile xcholowe kongana yajni ekʼume bʼa yibʼanal ja Asia Menor bʼa lugarik jastal ja Derbe, Listra sok Iconio.

Ja Pablo soka Bernabé xcholowe yabʼ ja ixuk winik: matik riko sok pobre, keremtik akʼixuk sok matik ayxa skʼujole. Jitsan skʼuʼane ja smeranil bʼa Kristo. Ja Pablo soka Bernabé cha xcholowe yabʼ ja gobyerno bʼa Chipre, ja Sergio Paulo, pe jun ajnanum sleʼa modo bʼa oj timjuke. Ja Pablo yala yabʼ: «Ja Jyoba kontra wa xyilawa». Ja bʼa jutsʼin jaw, ja ajnanum tup ja sati. Yajni yila ja jaw, ja gobyerno Sergio Paulo och skʼuʼuk.

Ja Pablo soka Bernabé xcholowe ekʼ chikan bʼaʼa: bʼa naʼitsaltik, bʼa merkadoʼik, bʼa bʼejik sok bʼa sinagogaʼik. Jun ekʼele, yawe tojbʼuk jun renko ja bʼa Listra. Ja ixuk winik matik yilawe skʼuʼane kʼotele dyose sok sleʼawe modo yajelyi stojel. Ja Pablo soka Bernabé mi skʼanawe, sok yalawe: «¡Kechanta oj jtoytik ja Dyosi! Ja keʼntikon kechan kʼotelotikon winik». Anto kʼotye jujuntik judíoʼik sok sjomoweyi yolom ja ixuk winik bʼa kʼe yil-e kontra ja Pablo. Xchʼojowe ton sok skichawe el man spatik chonabʼ bʼa yawekan lajansok chamta. ¡Pe ja Pablo mito xchami! Tixta jakye jujuntik smoj-aljelik bʼa skoltaye sok cha yiʼaje och man chonabʼ. Tsaʼan, ja Pablo kumxi man Antioquía.

Ja bʼa jabʼil 49, ja Pablo cha waj bʼa pilan sbʼejyel. Waj yil ja smoj-aljelik bʼa Asia Menor sok tsaʼan yiʼaj och ja lekil rason bʼa Dyos  man bʼa Europa. Sok waj bʼa Atenas, bʼa Éfeso, bʼa Filipos, bʼa Tesalónica sok bʼa tuk lugarik. Ja bʼa sbʼejyel jaw mojtaji yuja Silas, ja Lucas sok jun kerem sbʼiʼil Timoteo. Aʼtijiye lajan bʼa yajel eluk yajkʼachil kongregasyonik sok skoltaye bʼa yajel ajyuk tsats. Ja Pablo cha ajyi bʼa Corinto sok ti kan tiw jun jabʼil sok snalan bʼa stsatsankʼujolajel ja smoj-aljelik. Xcholo, sjeʼa sok stsʼijbʼan kartaʼik bʼa jitsan kongregasyon. Cha aʼtiji skʼulajel naʼitsik kʼulubʼal sok karpa. Ekʼ ja tyempo, ja Pablo kumxi man Antioquía.

Tsaʼan, ja bʼa jabʼil 52, ja Pablo waj bʼa yoxil ekʼele ja sbʼejyel, ti kʼe bʼa Asia Menor. Waj man bʼa norte, ja bʼay ja Filipos, sok tixa koʼ man Corinto. Ja Pablo ajyi jitsan jabʼil ja bʼa Éfeso bʼa sjejel, skʼulajel milagroʼik sok skoltajel ja kongregasyon. Cha spetsanil ja kʼakʼujik ya ekʼuk loʼilik bʼa wa stsomo sbʼaje ja ixuk winik bʼa jun eskwela. Jitsan skʼuʼane sok stukbʼes ja sakʼanile. Yajni wajta ekʼ xcholjel ja lekil rason bʼa Dyos bʼa jitsan lugar, ja Pablo tixa waj man Jerusalén.

«Caaxic, cax ja ba spetzanil ja lugari ba jachuc oj och jnebumanil ja cristiano» (Mateo 28:19).