Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Sjejelik wa xbʼobʼa nebʼ ja bʼa Biblia

 SJEJEL 58

Ja xchʼakelal ja Jerusalén

Ja xchʼakelal ja Jerusalén

Ja chonabʼ bʼa Judá jitsan ekʼele yawekan yaʼteltajel ja Jyoba sok yaʼteltaye kʼulubʼal dyosik. Jitsan jabʼil, ja Jyoba sleʼa modo oj skoltay. Sjekayi jitsan aluman, pe mini skʼuʼane. Ja yeʼnle stseʼlaye ja alumaniki. Ja Jyoba skʼana oj xchʼaysnajel ja yaʼteltajel kʼulubʼal dyosi. ¿Jastal maʼ oj skʼuluk?

Ja mandaranum bʼa Babilonia, ja Nabucodonosor, och sbʼajukan jujune ja chonabʼiki. Ja bʼajtan ekʼele sbʼajinkan ja Jerusalén, syama ja mandaranum Joaquín, ja olomaliki, ja kʼakʼanumiki sok ja kʼulumanik jastiki, sok yiʼaj och man Babilonia. Cha yiʼaj och ja sbʼaʼal ja stemplo ja Jyoba. Tsaʼan, ja Nabucodonosor ya och mandaranum ja Sedequías ja bʼa Judá.

Ja bʼajtanto, ja Sedequías kʼuʼabʼal ajyi soka Nabucodonosor. Pe ja chonabʼik mojani soka alumanik mi tojuki yalawe yabʼ ja Sedequías mokxa skʼuʼukyi ja Babilonia. Ja Jeremías yala yabʼ: «Ta mi akʼuʼanyi, ojni ajyuk chamwinik, waʼin sok chamel ja bʼa Judá».

Ja bʼa swaxakil jabʼil, ja Sedequías mixa kʼuʼabʼal ajyi soka Babilonia. Sok skʼanayi skoltajel ja kʼakʼanumik bʼa Egipto. Anto, ja Nabucodonosor sjeka ja skʼakʼanumik bʼa waj xchʼak-e ja Jerusalén. Ja kʼakʼanumiki sjoybʼane ja chonabʼi. Ja Jeremías yala yabʼ ja Sedequías: «Ja Jyoba wa xyala ta awaʼabʼaj soka Babilonia, ja weʼn soka chonabʼi ojni kananik sakʼan. Pe ta mi awaʼabʼaj, ja yeʼnle oj stsik-e ja Jerusalén sok oj ijan och preso». Ja Sedequías sjakʼa: «¡Mini oj kaʼ jbʼaj!».

Ekʼ jun jabʼil sok snalan, ja kʼakʼanumik bʼa Babilonia sjemawe ja  sbardaʼil ja Jerusalén. Ochye ja bʼa chonabʼi sok stsikawe. Cha stsikawe ja templo, smilawe jitsan ixuk winik sok jitsan yiʼaje och bʼa preso.

Ja Sedequías spaka ajnel, pe ja kʼakʼanumik bʼa Babilonia yiʼajeyi spatik. Ti syamawe mojan bʼa Jericó sok yiʼaje ochyi ja Nabucodonosor. Ja mandaranum bʼa Babilonia ya yil ja Sedequías jastal chʼak miljuk ja yuntikili. Tixa yaʼakan pakʼa sat sok xchʼika bʼa preso. Ti cham tiw ja Sedequías. Pe ja Jyoba skʼapayi ja it ja chonabʼ bʼa Judá: «Yajni x-ekʼ 70 jabʼil, oj cha ka kumxanik bʼa wa najex bʼa Jerusalén».

¿Jas maʼ oj ekʼ sbʼaje ja keremtik ijiye och bʼa Babilonia? ¿Oj maʼ ajyuke toj soka Jyoba?

«Cajual Dios [Jyoba]. Ja hueni, mi jas mi oj bob ahuuj. Huaxa huaa castigo meran pero sbej ni juntiro ja jas huaxa cʼulani. Toj juntiro huaxa huaa» (Apocalipsis 16:7).