Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Sjejelik wa xbʼobʼa nebʼ ja bʼa Biblia

 SJEJEL 61

Mini koʼye sbʼaj mekʼan

Mini koʼye sbʼaj mekʼan

Ekʼ tʼusan tyempo yajni ja Nabucodonosor swaychin ja splanta winiki, sjeka skʼulajel jun niwan kʼulubʼal dyos bʼa oro. Ti yaʼa bʼa lajan kʼinal sbʼiʼil Dura sok stsomo spetsanil ja matik jel tʼilane ja bʼa chonabʼi, tey ja Sadrac, Mesac sok Abednego. Ja mandaranumi yala: «Yajni xa wabʼyex ja yokʼel ja trompetaʼik, ja arpaʼiki sok ja gaitaʼik, koʼanik sbʼaj mekʼan ja kʼulubʼal dyosi. Ja maʼ mi xkoʼ sbʼaj mekʼani ojni jipxuk bʼa yoj orno bʼa kʼakʼ». ¿Oj maʼ koʼuke mekʼan ja oxwane hebreo? ¿Ma kechanta jaʼ oj yaʼteltaye ja Jyoba?

Anto ja mandaranumi yaʼa mandar bʼa oj ya okʼuke ja kʼini. Spetsanile koʼye mekʼan sok yaweyi stoyjel ja kʼulubʼal dyosi. Pe ja Sadrac, ja Mesac soka Abednego mini skʼulane. Jujuntik winike yilawe sok yalawe yabʼ ja mandaranumi: «Ja oxwane hebreo mi xkoʼye sbʼaj mekʼan ja kʼulubʼal dyosi». Ja Nabucodonosor sjeka spayjele sok yala: «Oj kawilex tyempo pilan ekʼele bʼa oj koʼanik sbʼaj mekʼan ja kʼulubʼal dyosi. Ta mi akʼulanex, ojni jipex bʼa yoj orno bʼa kʼakʼ. Mini jun dyos oj bʼobʼ skoltayex ja bʼa jkʼabʼi». Ja yeʼnle sjakʼawe: «Mini xkʼanatikon pilan tyempo. Ja jDyostikoni ojni skoltayotikon. Sok ama mi skoltayotikon, ah, mandaranum, mini oj kokotikon sbʼaj mekʼan ja kʼulubʼal dyosi».

Ja Nabucodonosor jel tajki. Yalyabʼ ja swiniki: «¡Kʼixnayik juke ekʼele mas ja orno sbʼaja janekʼ kʼixin ayi!». Tsaʼan sjeka ja skʼakʼanumi: «Mochowik ja winike it sok jipawik tiw». Yuja jelxelxa ja skʼixnal ja orno, chak chamuke ja  kʼakʼanumik yajni mojxiye ja bʼa stsʼeʼeli. Ja oxwane hebreo mokʼye ja bʼa yoj kʼakʼi. Tsaʼan, ja Nabucodonosor waj yil ja orno sok yila ay chanwane winik wane bʼejyel ekʼe, sok mixa kechan oxwaneʼuk. Jel xiwi sok sjobʼoyi ja skoltumaniki: «¿Mi maʼ kechan oxe winik jchʼikatik ja bʼa yoj kʼakʼi? Wa xkila chanwane, ¡soka juni lajansok jun anjel!».

Ja Nabucodonosor mojxi ja bʼay ja orno sok awani: «¡Elanikjan, yaʼtijumik ja Dyos jel Niwani!». Jelni cham yilawe spetsanile yajni ja Sadrac, ja Mesac soka Abednego elyejan sok mini jas ekʼel sbʼaje. Mini tsikeluk ja sbʼakʼtele mini ja stsoʼotsil yolome sok mini ja skʼuʼe sok mini ayiʼoje yikʼil tabʼ.

Ja Nabucodonosor yala: «¡Ja sDyose ja Sadrac, ja Mesac soka Abednego jel chaʼanyabʼalil juntiro! Sjeka ja yanjel bʼa skoltajel ja yeʼnle. Mey pilan dyos jastal ja sbʼaje».

Ja oxwane hebreo toj ajyiye soka Jyoba, ama chikan jas ekʼi. ¿Wan maxa kʼana toj oj ajyan jastal yeʼnle?

«Ja hua Huajual Diosi, yena ni oj coan mecʼan ja ba sti sati. Ja yeni, jaʼ ni oja huaa cʼujola» (Mateo 4:10).