Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Sjejelik wa xbʼobʼa nebʼ ja bʼa Biblia

 SJEJEL 60

Jun Gobyerno oj albʼuk bʼa tolabida

Jun Gobyerno oj albʼuk bʼa tolabida

Jun akwal, ja mandaranum Nabucodonosor ajyi jun swayich jel tuk. Jel chamkʼujol ay soka swayichi ja yuj mi xbʼobʼ wayuk. Spaya ja skʼintanumik sok yalyabʼ: «Cholowi kabʼ ja jwayichi». Ja yeʼnle yalawe: «Cholo kabʼtikon jawa wayich, kala kajwal». Pe ja Nabucodonosor yala: «¡Miyuk! Alawik kabʼ weʼnlex ja jas jwaychini. Mikʼa xa walawex, oj jmilex». Yajkʼachil ekʼele yalawe: «Pe alakabʼtikon ja jas awaychini, sok tixa oj kaltikona wabʼ jas stojol». Ja yeʼn sjakʼa: «Ja weʼnlexi wanex slejel modo bʼa oja loʼlayonex. ¡Alwikabʼ ja jas jwaychini!». Ja yeʼnle sjakʼawe: «Mini ay june ja bʼa luʼum it bʼa oj bʼobʼ skʼuluk ja jas waxa kʼana. Mini maʼ oj bʼobʼyuj».

Ja Nabucodonosor jelni tajki sok yaʼa mandar amiljuk ja matik jel bibo ja bʼa chonabʼi. Cha oj miljuke ja Daniel, ja Sadrac, ja Mesac soka Abednego. Pe ja Daniel skʼanayi tʼusan tyempo ja mandaranumi. Anto ja yeʼn soka yamigoʼiki yaweyi orasyon ja Jyoba bʼa skʼanjelyi skoltajele. ¿Jasa skʼulan ja Jyoba?

Bʼa jun nakʼsat, ja Jyoba sjeʼayi ja Daniel ja swayich ja Nabucodonosor sok yalyabʼ jas wa stojolan. Bʼa pilan kʼakʼu, ja Daniel waj yalyabʼ ja yaʼtijum ja mandaranumi: «Moka milex mini june ja matik bibo. Ja keʼn oj bʼobʼ jchol ja swayich ja mandaranumi». Ja aʼtijumi yiʼaje och ja Daniel ja bʼay ja Nabucodonosor. Ja Daniel yalyabʼ: «Ja Dyos ya ta chijkajukawi ja jas oj eka bʼaj. Ja it jawa wayichi: awila jun niwan splanta winik. Ja yolomi bʼa oro, ja sniʼ yaltsili soka skʼabʼi bʼa plata, ja slukum soka yechmali bʼa kobre, ja sat yoki bʼa fierro sok jaxa yoki bʼa fierro sokan sok barro. Ti elkon jun ton bʼa jun wits sok spakʼtsunyi tsats lek ja yoki. Ja splanta winiki poji sok pax tsʼubʼil luʼum, jaxa stsʼubʼili sjuʼu el ja ikʼi. Ja toni pax jun niwan wits bʼa sbʼutʼu el ja luʼumi».

 Tsaʼan, ja Daniel yala: «Ja it ja jas wa stojolan jawa wayichi: jawa mandaraneli jani kʼotel ja olomal bʼa oro. Ja plata kʼotel jun mandaranel oj ajyuk tsaʼan bʼa weʼna. Ja kobre wa stojolan pilan mandaranum oj eljule sok oj skʼul mandar bʼa yibʼanal ja luʼumi. Jaxa jun mandaranum oj snochyi jelni tsats oj kʼotuk jastal ja fierro. Jaxa bʼa xchʼakulabʼil oj ajyuk jun mandaranel jach pilubʼal bʼa parteʼik oj ajyuk tsats jastal fierro sok parteʼik bʼa mi oj ajyuk yip jastal barro. Soka ton pax jun witsi jani ja sGobyerno ja Dyos, bʼa oj xchʼaysnajel spetsanil ja tuk gobyernoʼik sok oj albʼuk bʼa tolabida».

Ja Nabucodonosor koʼ mekʼan bʼa stiʼ sat ja Daniel sok yala: «Jawa Dyosi sjeʼawi ja wayichali. Mini ay pilan dyos jastal Yeʼn». Jaʼukto maʼ oj smil ja Daniel, ja Nabucodonosor ya ochuk olomal bʼa yibʼanal ja matik bibo sok ajwalal bʼa Babilonia. ¿Awila maʼ jastal jakʼjiyi ja yorasyon ja Daniel yuja Jyoba?

«Ti ni mero stzomo sbaje ja ba lugar jau Armagedón sbiil yujile» (Apocalipsis 16:16).